Ilaak enerieen̄ mè enenwaan̄ ikan ogbanbe
18
Okumugwem onenitumu inyi Mosis ibe 2 itumu inyi ebi Ijeren ibe, “Emi nre Okumugwem Awaji kinyi. 3 Orọmijọn̄ ebi Ijipiti ebi ere enyi egọọkbe iluk cha ekirọ, enyi ikarọ. Ikarọrọ si orọmijọn̄ ebi ido Kenan ere mbasa enyi isi itap. Ikasusun̄ si ikan kiban̄ geege. 4 Ìgban̄ ida n̄a, mè ìkirọ otutuuk ikan nnyibe enyi. Emi nre Okumugwem Awaji kinyi. 5 Ìsun̄ otutuuk ikan n̄a, mè ìkigban̄ ida n̄a, mije, ene geelek òsusun̄ ema môsa me lek kiban̄ iluk ugwem. Emi nre Okumugwem.6 “Ogwu enerieen̄ geege ikamun̄ njak ogwu ngwan̄ kan̄ enenwaan̄. Emi nre Okumugwem.
7 “Kamun̄ njak nga kwun̄, eyi òrere si njak kè nte kwun̄. Nga kwun̄ ke îre, owu òkpomun̄ njak kan̄.
8 “Kamun̄ si njak nwa nte kwun̄, mije, îre njak kè nte kwun̄.
9 “Kamun̄ njak ngwan̄ kwun̄ enenwaan̄, òrere gwun̄ nte kwun̄ mè ìre gwun̄ nga kwun̄, mè ìre ogwu ekaan̄be me uwu mè ìre ogwu ekaan̄be me oyet. Kamun̄ njak kan̄.
10 “Kamun̄ njak gwun̄ enenwaan̄ ogwu gwun̄ kwun̄ enerieen̄ obonbe mè ìyaka ire ogwu gwun̄ kwun̄ enenwaan̄ omanbe, mije, îre njak kwun̄.
11 “Kamun̄ njak gwun̄ enenwaan̄ nwa nte kwun̄, ọmọ ìre gwun̄ nte kwun̄ obonbe, mè ire si ngwan̄ kwun̄. Owu òkpomun̄ njak kan̄.
12 “Kamun̄ njak ngwan̄ nte kwun̄ enenwaan̄, mije, ọmọ melek nte kwun̄ ìre ngwan̄.
13 “Kamun̄ njak ngwan̄ nga kwun̄ enenwaan̄, mije, ọmọ melek nga kwun̄ ìre ngwan̄.
14 “Kamun̄ njak nwa ngwan̄ nte kwun̄, òrere si njak ngwan̄ nte kwun̄ enerieen̄, mije, ogwu enenwaan̄ ya ìre si ngwan̄ nte kwun̄ enenwaan̄.
15 “Kamun̄ njak nwa gwun̄ kwun̄, mije, ọmọ ìre nwa gwun̄ kwun̄. Owu òkpomun̄ njak kan̄.
16 “Kamun̄ njak nwa ngwan̄ kwun̄, mije, îre njak ngwan̄ kwun̄ enerieen̄.
17 “Ire omun̄ njak ogwu enenwaan̄, kamun̄ si njak ogwu gwun̄ enenwaan̄. Kamun̄ njak gwun̄ enenwaan̄ geege òrere gwun̄ gwun̄ ogwu enenwaan̄ ya ogwu enerieen̄ obonbe, mè ìre gwun̄ ogwu gwun̄ enenwaan̄ omanbe. Mije, ema ìre eje ge melek ogwu enenwaan̄ ya. Eya orọ, ire ogbaan̄ njak kiban̄, gwun̄ mè uga, imun̄, eya ìre bukubuku nlilọ.
18 “Kagbaan̄ enenwaan̄ melek ogwu ngwan̄ ìdo me lek nwa, inyi ema ngwan̄ iba enekana uwuk. Kamun̄ njak ngwan̄ nwa kwun̄ mgbọ nwa kwun̄ okupbe me ògat ugwem.
19 “Kamun̄ njak ogwu enenwaan̄ mgbọ îkupbe me irek ebibaan̄, òrere mgbọ îkaan̄be orieen̄ me lek.
20 “Kamun̄ njak nwa ogwu ugbalek kwun̄, mè ìsa me ikeya ìfifila lek kwun̄.
21 “Kasa gwun̄ kwun̄ geege ìnyi mè esa egwa ngwugwa enyi awaji ekigwen Molek,a mè ìsa me ikeya ìchaka mbuban me lek erieen̄ Awaji kinyi. Emi nre Okumugwem.
22 “Kagọọk enerieen̄ ogbo kwun̄ ìlaak ilaak enerieen̄ mè enenwaan̄, mije, ogwu òrọrọ inu òkup ikeya îlọ ijọn̄.
23 “Kagọọk anam geege ìlaak ilaak. Ire orọ, eya ìre filafila. Ofifi si, enenwaan̄ geege ikasa lek kan̄ ìnyi anam geege igọọk ọmọ ilaak, mije, enenwaan̄ geelek òrọrọ inu òkup ikeya îlọ ijọn̄.
24 “Ikarọ inu chi geege, mè ìsa me ikeya ìfifila lek kinyi, mije, îre inu chi orọ ebi ido chi geelek nkilap isan̄a me isi kinyi efifilabe. 25 Sa me ikeya, ijọn̄ kiban̄ si îfifila. Eya orọ emi nsulube ijọn̄ kiban̄ osusut, ijọn̄ kiban̄ ojijit ema ebi ìluk me ere ya. 26 Ire enyi, ìkirọ otutuuk orọmijọn̄ n̄a, mè ìkisun̄ ikan n̄a. Ene geege me etete kinyi, mè ìre gwun̄ owot, mè ìre ogwu ichen òluk me etete kinyi, ikarọ nlilọ inu chi geege. 27 Mije, îre filafila inu chi ke ebi ìdadasi iluk me inyọn̄ ijọn̄ yi me isi kinyi erọ, mè isa ififila ijọn̄ yi. 28 Enyi ikarọ nlilọ inu chi geege, inyi ijọn̄ yi ikafifila, mè ijọn̄ yi ikajit enyi kubọk îjitbe ebi ido cha ìdadasi iluk me ere yi sabum enyi. 29 Mije, ene geelek òrọrọ inu chi geelek, ebesasan̄a ene ya isan̄a me otu ifuk ebi kiban̄. 30 Enyi mêkisun̄ otutuuk ikan nnyibe enyi. Enyi kpeberọ geege me lek nlilọ orọmijọn̄ cha ebi ìdadasi iluk me inyọn̄ ijọn̄ yi erọbe, inyi enyi ekafifila lek kinyi mije orọmijọn̄ cha. Emi nre Okumugwem Awaji kinyi.”