5 “Ebi ngwugwa geege kpebekọọk ijeek me ibot kiban̄, kpebekpaan̄ si otu utọn̄ ifet kiban̄, kpebeseke si iman̄ geege me lek kiban̄, isasa ijeen̄ ibe ke ema ekup me ufieejit mkpa ene. 6 Ema mêsun̄ lek kiban̄ me mbuban inyi Awaji kiban̄. Ema kpebefiat erieen̄ Awaji kiban̄, mije, îre ema ekigwa ngwugwa ukan̄ inyi Okumugwem, eyi òrere inorie ebi ene ekisa ijet Awaji kiban̄. Eya orọ, ema mêkup me mbuban.

7 “Ogwu ngwugwa ìkpodo ogwu enenwaan̄ geege òfififila lek kan̄ me òje oyet, ìkpodo si enenwaan̄ geege ogwu olom ojitbe, mije, ogwu ngwugwa ìkup me mbuban inyi Awaji kan̄. 8 Enyi otutuuk ebi Ijeren mêmọnọ si ogwu ngwugwa kubọk ogwu òkup me mbuban, mije, otutuuk inorie enyi ekisa ijet Awaji kinyi, îre ọmọ okisa inyi Awaji. Eya orọ, ìkimọnọ ogwu ngwugwa geelek kubọk ogwu òkup me mbuban, mije, emi Okumugwem, ogwu òkirọ mè enyi ekup mbuban, emi si ìre ogwu òkup me mbuban.

9 “Ire gwun̄ enenwaan̄ ogwu ngwugwa ibubat isi ije oyet, gwun̄ enenwaan̄ ya îfifila ogwu ute. Eya orọ, ebetatap ukan̄ iwọp gwun̄ enenwaan̄ ya ikpan̄.

10 “Ogwu òban Awaji geelek ogwu egobobe me etete ebi ngwan̄ kan̄, mè itọkọ aran̄ me ibot, mè ifaka ikwaan̄ itap me ubọk, inyi ikitap ofọnti ogwu òban Awaji, ìkpojijaka ijeek ibot kan̄, ìkpotataba si ofọnti òkup me lek kan̄ igwak, mije ufieejit mkpa ene. 11 Ogwu òban Awaji ìkponin̄ uwu ere nkwukwu ene okupbe. Ikerere ogwu ute mè ìre ogwu uga okwu, ìkponin̄ uwu ere esun̄be nkwukwu kiban̄, inyi ikachaka mbuban me lek kan̄. 12 Ogwu òban Awaji ìkponan̄a me Uwu Mbuban isibi, ìkpofifila si Uwu Mbuban Awaji kan̄, mije, aran̄ Awaji kan̄ ọmọ òwa me ibot kan̄ okupbe. Emi nre Okumugwem.

13 “Ogwu òban Awaji ìbodo gaalek obaak enenwaan̄ ikariọọn̄ge enerieen̄. 14 Ìkpodo nwakpa, mè ìre enenwaan̄ ogwu olom ojitbe, mè ìre ogwu enenwaan̄ òjeje oyet ififila lek kan̄. In̄-in̄, ìkpodo geege me etete ebibaan̄ ìkup ikechi. Îre obaak enenwaan̄ ikariọọn̄ge enerieen̄ ke ìbomọnọ, me etete ebi kiban̄, ido me lek nwa, 15 inyi ikafifila bọn owot iman kan̄ me etete ebi kiban̄. Mije, emi nre Okumugwem ogwu òkirọ inyi ọmọ ikup me mbuban.”

16 Okumugwem onenikpọk itumu inyi Mosis ibe 17 itumu inyi Erọn ibe, “Me ukot kinyi geelek, ogwu enerieen̄ owot iman kwun̄ geelek òkaan̄ ìroon̄ me lek, ikaje ìgbet ìnisa inorie ìnyi Awaji kan̄. 18 Mije, enerieen̄ geelek òkakaan̄ ìroon̄ me lek ìkpoje igbet lek ntook inigwa ngwugwa. Ogwu ǹnàan̄ mè ìre ogwu akọọk, mè ìre ogwu òkaan̄ ìroon̄ me isi kan̄, mè ìre ogwu geelek òkaan̄ ofifi chieen̄ ìroon̄ geelek me akpalek kan̄, ikaje ìgbet lek ntook ìnigwa ngwugwa. 19 Ikeya si, ogwu ukot ofan̄abe, mè ìre ogwu ubọk ofan̄abe, 20 mè ìre ogwu ekpuk, mè ìre ogwu m̀kpumkpu, mè ìre ogwu òkaan̄ ìroon̄ me chieen̄, mè ìre ogwu òkaan̄ inya mè ìre ugwe me akpalek kan̄, mè ìre ogwu ichip okpok kan̄ okpukpukube, ìkpoje igbet lek ntook ya ìnigwa ngwugwa. 21 Ene geelek òkakaan̄ ìroon̄ me lek me etete ebi owot iman kè Erọn ogwu ngwugwa, ìkpoje igbet lek ntook ngwugwa inigwa ngwugwa ukan̄ inyi Okumugwem. Ene ya îkaan̄ ìroon̄ me lek. Eya orọ, ìkponyi Awaji kan̄ inorie. 22 Ogwu òkup ikeya môkọt irie inorie esabe igwa ngwugwa inyi Awaji kan̄, echi òkup mbuban, mè echi òkup mbuban ichit. 23 Ire, mije ìroon̄ òkup ọmọ me lek, ogwu òkup ikeya ìkpoje igbet lek ekwut mgban, ìkpoje si igbet lek ntook inigwa ngwugwa, inyi ikachaka mbuban me lek Uwu Mbuban n̄a, mije, emi nre Okumugwem ogwu òkirọ ema ekup me mbuban.”

24 Mosis obeben otutuuk inu chi itumu inyi Erọn mè ebi bọn ebirieen̄, mè otutuuk ebi Ijeren.