3 “Tumu nyi ema ibe, me ukot kiban̄ geelek, ogwu enerieen̄ geelek me owot iman kiban̄ òsasa mbuban me lek ije igbet lek inyinyi òkup me mbuban echi ebi Ijeren esan̄abe isun̄ esese inyi Okumugwem, ke ebererieen̄ ogwu òkup ikeya isan̄a me isi n̄a. Emi nre Okumugwem.

4 “Ogwu owot iman kè Erọn geelek òkakaan̄ orukan̄ inyakpa me lek, mè ìre nke nke inu okisibi me lek ebirieen̄ kan̄, ene ya ìkporie inorie ngwugwa òkup mbuban geege, mege ire mgbọ mbuban môtabe ọmọ me lek. Gwun̄ kè Erọn geelek si òchachak ubọk me lek inu geelek òchachak me lek nkwukwu ene mè ichaka mbuban, mè ìre ìchak ubọk me lek enerieen̄ ogwu uyọ osibibe me lek me mfat, 5 mè ìre ogwu òchachak ubọk me lek inu geelek òkinyinyọnọ me ijọn̄ eyi òchachaka ọmọ mbuban me lek, mè ìre ìchak ubọk me lek ogwu ebilene òchachaka ọmọ mbuban me lek, mè ìre oniin̄ geelek mbuban ojebe ire ọmọ lek, ogwu òkup ikeya ìkporie inorie ngwugwa òkup me mbuban. 6 Ogwu ngwugwa geelek òchachak ubọk me lek inu òkup ikecha môkaan̄ mbuban me lek ire ikakwun̄. Ìkporie geege me lek inorie cha òkup me mbuban, îtata ìkeken mun̄ igwọk lek kan̄, 7 mè ikup mege ire mgbọ ura mônimbe, sabum mbuban mônita ọmọ me lek. Mgbọ ya, ọmọ mônenirie inorie òkup me mbuban ya, mije, îre inorie kan̄ ke îre. 8 Ìkpotaka anam geelek òkwukwu me lek kan̄, mè ìre eyi anam-unye ochimbe ikpan̄, inyi ikachaka mbuban me lek bak me lek anam cha. Emi nre Okumugwem.

9 “Ebi ngwugwa mêkigban̄ utọn̄ me lek otutuuk nteme n̄a geelek, mè ikirọ, inyi ema ekarọn̄ ikan, mè ìfifila lek kiban̄, mè ìkwaan̄. Emi nre Okumugwem ogwu òsasan̄a ema isun̄ esese, inyi ema ekup me mbuban.

10 “Ene geelek ikarege ogwu ngwugwa ìkporie inorie mbuban cha. Ikeya si, ogwu ichen isotu uwu ogwu ngwugwa, mè ìre ogwu ikwaan̄ kan̄ si, ìkpoborie. 11 Ire, ogwu usun̄ ogwu ogwu ngwugwa osabe ikpoko kan̄ ilep, mè ogwu usun̄ geelek emanbe me uwu kan̄, ebiba mêkọt irie inorie mbuban cha, mije, îre inorie ogwu ngwugwa ya.

12 “Gwun̄ enenwaan̄ ogwu ngwugwa òbabat ogwu ìkare ogwu ngwugwa, ìkporie inorie mbuban cha. 13 Ire gwun̄ enenwaan̄ ogwu ngwugwa ikana nwakpa, mè ìre ogwu olom ìjijit me ikakaan̄ge gwun̄ geege, mè ire gwun̄ enenwaan̄ ya igwu ikom ika inu me uwu ogwu ute me mgbọ nsabọn ibaan̄ kan̄, gwun̄ enenwaan̄ ya môkọt irie inorie mbuban cha, òrere inorie nte kan̄. Ire, ene geelek ogwu ìkare ogwu ngwugwa, ìkporie inorie cha òkup mbuban.

14 “Ire ogwu ikarege ogwu uwu ogwu ngwugwa irie inorie mbuban ya me ikariọọn̄ge, ene ya môkpe useen̄ inorie ya îriebe inyi ogwu ngwugwa ya, mè itap si irek ge me irek go eyi inorie ya isọkọ me lek. 15 Ebi ngwugwa ekachaka mbuban me lek inyinyi òkup mbuban ebi Ijeren esabe inu, echi ebenebe ifo inyọn̄ inyi Okumugwem, 16 sa me itetele ibe ebi Ijeren ebi kpere ebi ngwugwa erie inorie òkup mbuban cha. Ire ife cha irie inorie mbuban ya, awọ môtet ema, eyi môdobe ibe ema ekpe mkpukpe.^a Emi nre Okumugwem ogwu òkirọ inyi ngwugwa cha ikup me mbuban.”

17 Okumugwem onenitumu inyi Mosis ibe 18 itumu inyi Erọn mè ebi bọn ebirieen̄, mè itumu si inyi otutuuk ebi Ijeren ibe, “Ene geelek me etete kinyi ebi ototun̄ ukan̄ kè Ijeren, mè ìre ogwu ichen òluk me etete ebi Ijeren, ogwu òsasa inu ngwugwa inu ibe esa egwa ngwugwa ewọwọp iriọk enyi Okumugwem, mè ìre mije inyan̄a-ibot înyan̄abe, mè ìyaka ire inyinyi ata ejit, 19 ene ya môsa orie anam eyi kpunube ìroon̄ geege me lek inu, mè ìre eriembuuk, mè ìre ebot, mè ìre arọọn̄, inyi Okumugwem ibọkọ ngwugwa ya itap me ibot kinyi. 20 Ikasa anam geege òkaan̄ ìroon̄ me lek ìnu, mije, Okumugwem ìkpobọkọ ngwugwa òkup ikeya itap me ibot ene ya. 21 Ene geelek òbogwa ngwugwa esuuk inyi Okumugwem isasa irọ inyan̄a-ibot kan̄ iso, mè ìyaka ire inyinyi ata ejit, ene ya môsa eriembuuk mè ìyaka ire ebot mè ìre arọọn̄ eyi kpunube ìroon̄ geege me lek inu, mije, anam geelek òkakaan̄ ìroon̄ me lek, Okumugwem ìkpobọkọ. 22 Anam geelek òrere ǹnàan̄, mè ìre akọọk, mè ìre eyi unan osakbe me lek, mè ìre eyi òkaan̄ ǹrọọn̄ me lek, mè ìre eyi inya okigbuk mun̄ isibi me lek, mè ìre eyi mfem okupbe me lek, kpebesa ije igbet me isi Okumugwem. Ikerere ngwugwa ukan̄, kpebesa anam òkup ikecha inigwa me inyọn̄ ntook inyi Okumugwem. 23 Mêkọt isa orie eriembuuk mè ìre gwun̄ arọọn̄ òkaan̄ ìroon̄ me lek mè ìre eyi òkup m̀kpumkpu ininyi inyinyi ata ejit. Ire, kpebekọt isa irọ inyan̄a-ibot iso. Okumugwem ìkpobọkọ. 24 Anam geelek ichip okpok kan̄ ofiọọkbe, mè ìre ìkpukpukpuku, mè ìre ìgwagwaka, mè ìre ìfefieek, kpebesa inigwa ngwugwa inyi Okumugwem. Ikerere me inyọn̄ ijọn̄ kinyi, enyi kpebesa ojelek anam òkup ikeya ije igbet me isi Okumugwem. 25 Enyi kpebebọbọkọ si ojelek anam òkup ikecha kubọk inorie me ubọk ogwu ichen òluk me etete kinyi isa inigwa ngwugwa inyi Awaji kinyi, mije, anam cha îkaan̄ ìroon̄ me lek. Okumugwem ìkpobọkọ ngwugwa òkup ikecha itap me ibot kinyi.”

26 Okumugwem onenitumu inyi Mosis ibe, 27 “Ayaya gwun̄ orie eriembuuk, mè ìre ebot mè ìre arọọn̄, môkup melek ogwu uga usen jaaba. Bene me òso usen jeeta, mêkọt isa inigwa ngwugwa ukan̄ inyi Okumugwem, mè Okumugwem obọkọ ngwugwa ya. 28 Ikagbaan̄ eriembuuk, mè ìyaka ire arọọn̄, mè ogwu gwun̄ ìkpan̄ usen yaage.

29 “Ire enyi ibegwa ngwugwa onirọ inyi Okumugwem, ìgwa ngwugwa ya me oniin̄ eyi Okumugwem môbọkọbe itap me ibot kinyi. 30 Mêrie inorie ngwugwa ya isan̄a usen yaage, inu geege ikasik me lek ìwele egwe. Emi nre Okumugwem.

31 “Ìkirọ ikọ geelek ntọbe ibe erọ, mè ìkiluk ugwem ìkpọ me lek kiban̄. Emi nre Okumugwem. 32 Ikachaka mbuban me lek erieen̄ n̄a òkup mbuban, inyi ǹkup me mbuban me etete ebi Ijeren. Emi nre Okumugwem ogwu òkirọ enyi ekup me mbuban, 33 mè ogwu òsasan̄a enyi isibi me ido Ijipiti, inyi emi ǹnenkana ǹre Awaji kinyi. Emi nre Okumugwem.”