3 “Usen gweregwen ke enyi ebekisa irọ ikwaan̄ kinyi geelek. Òso usen jaaba ìre Usen Mbuban eyi itap-efuuk, usen enyi mêkinin̄ ntitiin̄ mbuban. Enyi kpebekirọ ikwaan̄ kinyi geege me usen ya me ere geelek enyi ekupbe. Mije, usen ya ìre Usen Mbuban isa inyi Okumugwem.

4 “Echichi ìre ijọk Okumugwem, òrere ntitiin̄ mbuban echi enyi mêkinin̄ me ibot mgbọ kiban̄ me acha geelek. 5 Ijọk Iraraka eyi Okumugwem ìbobene me otu ikakwun̄ akọp mè usen ini eyi adasi onyan̄ me acha. 6 Ijọk Fituru Kpunu Olat ìbobene me òso akọp mè usen go me emen onyan̄ yaage, òrere adasi onyan̄ me acha. Bene me usen ya, fituru kpunube olat me lek gaalek ke enyi ebekirie usen jaaba. Ijọk keyi si ìre ijọk Okumugwem. 7 Me adasi usen me lek usen jaaba cha, enyi mênin̄ ntitiin̄ mbuban. Enyi kpeberọ ikwaan̄ geege. 8 Me otutuuk usen jaaba cha, enyi mêkigwa ngwugwa ukan̄ inyi Okumugwem. Me òso usen jaaba ya, enyi mênin̄ si ntitiin̄ mbuban, enyi kpeberọ ikwaan̄ kinyi geege.”

9 Okumugwem otutumu si inyi Mosis ibe 10 itumu inyi otutuuk ebi Ijeren ibe, “Mgbọ enyi isire inyọn̄ ijọn̄ ya mbanyi enyi, mè iwop mfut me uko me inyọn̄ ijọn̄ ya mè irọkọ, enyi mêsa adasi efit akpa enyi mêrọkọbe ijet ogwu ngwugwa. 11 Ogwu ngwugwa mônenibene efit akpa ya, mè iwuwum me isi Okumugwem, inyi Okumugwem ibọkọ itap me ibot kinyi. Ìbore me usen ògọgọọk Usen Mbuban ke ogwu ngwugwa obowuwum efit akpa ya. 12 Me usen yaage enyi ewuwumbe efit akpa ya, enyi mêsa gwun̄ arọọn̄ òsoso acha ge, eyi kpunube ìroon̄ geege me lek inigwa ngwugwa ewọwọp iriọk inyi Okumugwem. 13 Enyi mêgwa si ngwugwa akpa òje me lek ngwugwa ewọwọp iriọk ya. Mêsa iko akpa ekọkọk ini mè mgbidim eyi etapbe aran̄ me lek igwa ngwugwa ya kubọk ngwugwa ukan̄ inyi Okumugwem, òrere ngwugwa òkidun̄u utop olu. Mêsa si iko miin̄ ge inigwa ngwugwa miin̄ egwogwook òje me lek ngwugwa akpa ya. 14 Enyi kpebetaka aya akpa, mè ìre eyi kpetem, mè ìre eyi ewọwọp, mè ìre eyi esabe irọ fituru, mege ire usen ya eyi enyi mêgwabe ngwugwa yi inyi Awaji kinyi. Eyi ìre ikan òbokup ire mgbọ geelek me ukot kinyi geelek me ere geelek enyi mêlukbe.

15 “Bene me usen ewuwumbe efit akpa ya, òrere usen ògọgọọk Usen Mbuban, enyi mêfuk òjot òjot Usen Mbuban jaaba, òrere nde jaaba. 16 Enyi isifuk akọp usen go, eyi môsabe enyi inire usen ògọgọọk Usen Mbuban eyi òso jaaba kan̄, me ofit iwele kan̄, enyi mênenigwa ngwugwa aya akpa inyi Okumugwem. 17 Me ere geelek enyi elukbe, enyi mêsa owut fituru iba ebesa igwa ngwugwa ewuwuwum inu. Mêsa iko atalek akpa ekọkọk ini mè mgbidim irọ owut fituru ge, mè itap olat me lek, mè iwọp me emen oriọọn̄ fituru. Ngwugwa keyi ìbore ngwugwa adasi mfut inyi Okumugwem.

18 “Enyi mêsa bọn arọọn̄ jaaba òsoso acha ge ge, echi kpunube ìroon̄ geege me lek, mè gwun̄ orie eriembuuk ge, mè orie arọọn̄ iba igbaalek fituru iba cha inigwa ngwugwa ewọwọp iriọk mè ngwugwa akpa òje me lek, mè igwook si miin̄ òje me lek inyi Okumugwem. Otutuuk ngwugwa cha mônenire ngwugwa ukan̄, eyi òkidun̄u utop olu òkibele Okumugwem ejit. 19 Enyi mêsa si orie ebot ge inigwa ngwugwa ijo inu, mè isa bọn orie arọọn̄ iba òsoso acha ge ge igbaalek inigwa ngwugwa esuuk. 20 Ogwu ngwugwa mônenigbaan̄ bọn arọọn̄ iba cha melek fituru eyi adasi mfut ya iwuwum kubọk ngwugwa ewuwuwum me isi Okumugwem. Echi ìre ngwugwa òkup me mbuban inyi Okumugwem. Inu ngwugwa cha ìkup inyi ogwu ngwugwa. 21 Enyi mênin̄ si ntitiin̄ mbuban me usen yaage. Enyi kpeberọ ikwaan̄ kinyi geege me otuuk usen ya. Eyi ìre ikan òbokup ire mgbọ geelek me ukot kinyi geelek me ere geelek enyi elukbe.

22 “Mgbọ enyi isikirọkọ mfut uko me ijọn̄ kinyi, ikakirọkọ mfut òkup me oke utọn̄ ijọn̄ uko kinyi. Ikakirọọn̄ si ten̄eten̄e mfut cha òkiyaak igwook me ijọn̄ mgbọ ekirọkọ mfut me uko. Enyi mêtele echicha inyi ebi ugbọọn̄ mè ebi ichen ìluk me etete kinyi. Emi nre Okumugwem Awaji kinyi.”

23 Okumugwem onenitumu si inyi Mosis ibe 24 itumu inyi ebi Ijeren ibe, “Adasi usen me onyan̄ jaaba me acha geelek ìbore usen itap-efuuk òsibi esese, mè ire si usen ijọk ikekeek inyi enyi. Enyi mêkiwut otita isa ikirie ijọk ya. Me usen ya si, enyi mênin̄ ntitiin̄ mbuban. 25 Enyi kpeberọ ikwaan̄ geege me usen ya kubọk enyi ekirọ me usen geelek. Ire, enyi mêgwa ngwugwa ukan̄ inyi Okumugwem.”

26 Okumugwem onenitumu inyi Mosis ibe, 27 “Akọp usen me onyan̄ jaaba yaage si ìre Usen Irọ-esuuk. Usen ya ìbore usen ufieejit mè usen ijin-otu, enyi kpeberie inorie geege otutuuk usen ya. Enyi mênin̄ ntitiin̄ mbuban me usen ya, mè igwa ngwugwa ukan̄ inyi Okumugwem. 28 Enyi kpeberọ ikwaan̄ geege me usen ya, mije, îre Usen Irọ-esuuk, eyi mêrọbe esuuk me ibot kinyi me isi Okumugwem Awaji kinyi. 29 Ene geelek òchachak inorie me otu me usen ya, ebesasan̄a ene ya isan̄a me otu ifuk ebi kiban̄. 30 Ene geelek òrọrọ chieen̄ ikwaan̄ geelek me usen ya, emi mâsan̄a ugwem ene ya isan̄a me etete ebi kiban̄. 31 Enyi kpeberọ ikwaan̄ geege me usen ya. Eyi ìre ikan òbokup ire mgbọ geelek me ukot kinyi geelek me ere geelek enyi elukbe. 32 Bene me ikakwun̄ usen onaan̄ge me onyan̄ jaaba ya mege ire ikakwun̄ ofit iwele kan̄ ìbore Usen Mbuban eyi itap-efuuk inyi enyi. Enyi kpeberọ ikwaan̄ geege, kpebechak si inorie geege me otu. Enyi mêsun̄ usen ya kubọk Usen Mbuban inyi lek kinyi.”

33 Okumugwem onenitumu inyi Mosis ibe 34 itumu inyi otutuuk ebi Ijeren ibe, “Me akọp mè usen go me onyan̄ jaaba yaage si, ijọk Uwu Nlak môbene, mè ikup usen jaaba. Eyi si ìre ijọk Okumugwem. 35 Me adasi usen eyi ijọk ya, enyi mênin̄ ntitiin̄ òkup mbuban. Enyi kpeberọ chieen̄ ikwaan̄ kinyi geege me usen ya. 36 Usen geelek me emen usen jaaba eyi ijọk ya, enyi mêkigwa ngwugwa ukan̄ inyi Okumugwem. Me òso usen jeeta, enyi mêkpọk inin̄ si ntitiin̄ mbuban, mè igwa si ngwugwa ukan̄ inyi Okumugwem, mije, ntitiin̄ usen ya ìre ntitiin̄ isasa ichit ijọk ya. Me usen ya si, enyi kpeberọ chieen̄ ikwaan̄ geege.

37 “Echichi ore ijọk Okumugwem echi enyi ebekinin̄ ntitiin̄ mbuban me lek, mè ikigwa ngwugwa ukan̄ inyi Okumugwem, mè ikigwa si ngwugwa ewọwọp iriọk mè ngwugwa akpa mè ofifi esese chieen̄ ngwugwa geelek mè ngwugwa miin̄ egwogwook, me usen me usen ike usen geelek odobe. 38 Otutuuk ijọk mè ngwugwa kechi ìkakup me lek Usen Mbuban enyi ekisun̄ inyi Okumugwem, mè esese inyinyi enyi ekinyi, mè inyan̄a-ibot enyi ekinyan̄a, mè otutuuk inyinyi ata ejit echi enyi ekinyi Okumugwem.

39 “Eya orọ, bene me akọp mè usen go me onyan̄ jaaba yaage, mgbọ enyi isirọkọ otutuuk mfut uko kinyi isan̄a, enyi mêrie ijọk Okumugwem usen jaaba. Adasi usen ijọk ya ìbore usen itap-efuuk òkup esese. Ikeya si, òso usen jeeta, òrere òta usen ijọk ya, ìbore usen itap-efuuk òkup esese. 40 Bene me adasi usen ijọk ya, enyi mêmọnọ ata mfut ònan̄a me lek uti òjajaan̄, mè isọp nlak, mè isọp si otu agọọk uti ilip òkaan̄ inwan̄ iwa me lek, mè otu agọọk uti wilo òkitibi me agba mun̄, ikaan̄ me ubọk, isa ikibele ejit inwọọn̄ unwọọn̄ me isi Okumugwem Awaji kinyi otutuuk usen jaaba eyi ijọk ya. 41 Enyi mêkirie ijọk yi inyi Okumugwem usen jaaba me emen onyan̄ jaaba me acha geelek. Eyi ìre ikan òbokup ire mgbọ geelek me ukot kinyi geelek. 42 Enyi otutuuk bọn owot ebi Ijeren mêkiluk me uwu nlak usen jaaba, 43 inyi bọn ebi ukot kinyi geelek esa eriọọn̄ ibe ke îre me emen uwu nlak ke emi nrọ inyi ebi Ijeren eluk mgbọ nsan̄abe ema isibi me ido Ijipiti. Emi nre Okumugwem Awaji kinyi.”

44 Mosis obeben otutuuk nteme òfo me lek ijọk Okumugwem chi ikpa isan̄a inyi ebi Ijeren.