Ikpọkpọ chieen̄ me lek mkpukan̄ isi Okumugwem
24
Okumugwem onenitumu inyi Mosis ibe, 2 “Nyi ebi Ijeren ida ibe enyi owu aran̄ olifu eyi kpewọlọ, eyi esan̄abe me lek mfut olifu ekpukpukpuku, inyi mêkisa imin otitọn̄ òkilomo mgbọ geelek me emen Atanga Chinichini. 3 Erọn môneen̄ otitọn̄ cha isun̄ me irek kiban̄ me agan̄ isi ekwut mgban inyan̄a-ibot ya me emen Atanga Chinichini bene me ikakwun̄ iwele egwe, inyi ikilomo me isi Okumugwem mgbọ geelek. Eyi ìre ikan òbokup ire mgbọ geelek me ukot kinyi geelek. 4 Erọn ìbokineen̄ otitọn̄ cha isun̄ me inyọn̄ ngugọọn̄ mkpukan̄ ya esabe alata araran̄ eyi kpewọlọ irom, inyi ikilomo me isi Okumugwem mgbọ geelek.Fituru isi Okumugwem
5 “Owu môtọ akpa ekọkọk isa iwọp akọp mè owut fituru iba, iko akpa ekọkọk ini mè mgbidim me owut fituru ge ge, 6 mè inisun̄ ema me onineen̄ iba, owut fituru gweregwen me onineen̄ ge, me inyọn̄ ikasi ya esabe alata araran̄ eyi kpewọlọ irom me isi Okumugwem. 7 Me onineen̄ fituru cha geelek, owu môgwook farankinsens eyi kpewọlọ, kubọk okpọkọ emen akpan, eyi mêwọpbe me useen̄ fituru cha kubọk ngwugwa ukan̄ ewọpbe inyi Okumugwem. 8 Me Usen Mbuban geelek mêkibọkọ fituru cha me ubọk ebi Ijeren isa ikineen̄ ikeya me isi Okumugwem mgbọ geelek. Eyi ìre inyan̄a-ibot òbokup mgbọ geelek. 9 Fituru cha ìkup inyi Erọn mè ebi bọn. Ema ebekikup me ere òkup mbuban irie. Mije, me lek kè Erọn, eyi îre inorie òkup mbuban ichit eyi ònan̄a me lek ngwugwa ukan̄ egwabe inyi Okumugwem.”
Osusut òkup inyi ogwu òchaka mbuban me lek erieen̄ Okumugwem
10 Me ike mgbọ ya, ogwu enerieen̄ ge ogwu uga orebe ogwu Ijeren, sà ogwu ute ore ogwu Ijipiti, onenitim etim me lek ogwu Ijeren ge me emen ere m̀gba-ǹgwele ukan̄ ema elukbe. 11 Ogwu enerieen̄ ya ogwu ogwu uga gaalek orebe ogwu Ijeren, otutumu erieen̄ Okumugwem ifiat, mè ifieek otu igbaalek. Etataba ogwu enerieen̄ ya inu me isi kè Mosis. Nga ogwu enerieen̄ ya ìre Selomit, gwun̄ kè Dibiri ogwu otoko kè Dan. 12 Enenikana gwun̄ enerieen̄ ya itap me ubọk ebi ene ibe ekpọ chieen̄ me lek, inyi eweek eriọọn̄ inu eberọ ọmọ inan̄a me otu Okumugwem.
13 Okumugwem onenitumu inyi Mosis ibe, 14 “San̄a ogwu ògbo ene ya sibi fo udun̄ ama, mè otutuuk ebi ìnọnọ mgbọ îtumube otutuuk inu cha etoon̄ ọmọ ubọk me ibot, mè otutuuk ebi ido Ijeren eteen̄ ewuuk esa etọbọ ọmọ ekpan̄. 15 Owu, tumu nyi ebi Ijeren be, ‘Ogwu ifieek otu inyi Awaji, ijo inu kan̄ ìbotoon̄ ọmọ me ibot. 16 Ogwu itumu erieen̄ Okumugwem ifiat, ekpakpan̄. Otutuuk ebi ido Ijeren eteen̄ ewuuk esa etọbọ ene ya ekpan̄. Mè ìre gwun̄ owot Ijeren, mè ìre ogwu ichen, ene geelek òtutumu erieen̄ Okumugwem ifiat, ekpakpan̄.
17 “ ‘Ogwu isulu ogwu ebilene ikpan̄, ekpakpan̄. 18 Ogwu ikpan̄ anam ofifi ene, ìbokpekpe chieen̄ anam yaage me useen̄. Ire ofiat ugwem, ugwem si ke obosa ikpe useen̄. Useen̄ mè useen̄. 19 Ogwu isak ene unan me lek, unan îsakbe me lek ofifi ene ke ebesak ọmọ si me lek. 20 Mêfan̄a ene ukwuuk me useen̄ ukwuuk ene ofan̄abe ogwu ofifi ene. Ikeya si, ogwu irọkọ ene chieen̄, mêrọkọ ene ya si chieen̄ me useen̄. Ogwu ifan̄a ene ejeek, mêfan̄a ene ya si ejeek me useen̄. 21 Ogwu ikpan̄ anam ofifi ene, môsa chieen̄ anam yaage ikpe useen̄. Ire, ogwu ikpan̄ ene, ebekpakpan̄ ene ya me useen̄. 22 Ikan yaage okup inyi enyi otutuuk ene. Ikan òtet gwun̄ owot Ijeren otet si ogwu ichen, mije, emi nre Okumugwem Awaji kinyi.’ ”
23 Mosis onenitumu inu Okumugwem otumube inyi ọmọ inyi ebi Ijeren. Ema etetet ogwu enerieen̄ òtutumu erieen̄ Okumugwem ifiat ya isa isibi ifo udun̄ ama, mè isa ewuuk itọbọ ikpan̄ ike Okumugwem onyibe Mosis ida ibe erọ.