Ifafaka lek isun̄ esese inyi Okumugwem
6
Okumugwem onenitumu inyi Mosis ibe 2 itumu inyi ebi Ijeren ibe, “Enerieen̄ mè ìre enenwaan̄ geelek, òweweek inyanyan̄a ibot òkup uyọt uyọt, òrere inyan̄a-ibot eyi ifafaka lek isun̄ esese inyi Okumugwem, kubọk ebi ìkup ọkpọkpọ inyi Okumugwem ekinyan̄a, 3 ene ya ìkponwọ miin̄ geege òkikana ene me chieen̄, mè ìre eyi esabe mfut gerep irọ, mè ìre miin̄ ònan̄a me lek inu geelek ekisa irọ unye miin̄. Ene ya ìkponwọ si mun̄ gerep geege, ìkporerie si mfut gerep geege, mè ìre eyi njijoon̄ mè ìre eyi eduduk. 4 Me otutuuk mgbọ ene ya môkupbe me irak inyan̄a-ibot eyi ifafaka lek isun̄ esese inyi Okumugwem, ìkpoborie inu geege ònan̄a me lek mfut gerep, bene me ukwuuk kan̄ re ikpọk kan̄. 5 Me otutuuk usen ene ya môkupbe me irak inyan̄a-ibot eyi ifafaka lek isun̄ esese inyi Okumugwem, akwaan̄ ìkpore ọmọ ibot. Mege ire usen inyan̄a-ibot kan̄ môsobe, ọmọ ìbokup me mbuban inyi Okumugwem. Eya orọ, ìbotetele inyi ijeek ibot kan̄ itibi ijọn̄ọ, ìkposọsọp kubọk ge. 6 Otutuuk mgbọ ene ya môkupbe esese inyi Okumugwem, ìkaboje igbet lek nkwukwu ene, 7 ikerere nkwukwu ogwu ute mè ìre nkwukwu ogwu uga mè ìre nkwukwu ogwu ngwan̄ enerieen̄ mè ìre nkwukwu ogwu ngwan̄ enenwaan̄, inyi mbuban ikachaka ọmọ me lek bak me lek mkpa ebi uwu kiban̄. Mije, inyan̄a-ibot eyi irere ogwu òkup esese inyi Awaji kan̄ ọmọ òwa me ibot kan̄ okupbe. 8 Otutuuk mgbọ ene ya môkupbe me inyan̄a-ibot kan̄ ya, ọmọ ìbokup me mbuban inyi Okumugwem.9 “Ire ene ikpọkpọ inigak ikwu me agba lek kan̄ me ekakpọge chieen̄, mè ichaka mbuban me lek ibot kan̄ eyi òkup esese ya, ọmọ môkup usen jaaba, inyi mbuban ita ọmọ me lek, mè inikwọkọ otutuuk ijeek ibot kan̄ isan̄a. 10 Me òso usen jeeta, ọmọ mônenisa ekerekwukwu iba, mè ìre bọn elesia iba, inu me isi ogwu ngwugwa me isotu Atanga Chinichini. 11 Ogwu ngwugwa mônenisa ekerekwukwu ge igwa ngwugwa ijo inu, mè inisa eyilọ igwa ngwugwa ewọwọp iriọk isa irọ esuuk me ibot kan̄ mije îkupbe me agba lek nkwukwu ene. Me usen ya, ọmọ môneniyaka ikpọk isun̄ ibot kan̄ me mbuban, 12 mè iyaka ikpọk ibene otu ifuk usen inyan̄a-ibot kan̄ ya me ibot. Mije, eyi adasi mgbọ ya îfiat bak me lek nkwukwu ene ya. Me usen ya, ọmọ môsa gwun̄ arọọn̄ acha ge inu, inyi mêsabe igwa ngwugwa awọ. Otu ifuk usen îkupbe esese inyi Okumugwem me adasi mgbọ ya ìchechep, mije inyan̄a-ibot kan̄ keya ofifilabe nan̄a me lek nkwukwu ene ya.
13 “Eyi ore ikan òkikpulu inyan̄a-ibot eyi ogwu òfaka lek kan̄ isun̄ esese inyi Okumugwem. Me mgbọ otu ifuk usen inyan̄a-ibot ogwu òfaka lek kan̄ isun̄ esese inyi Okumugwem isiso, mêsa ene ya inu me isotu Atanga Chinichini. 14 Me ere ya, ene ya mônenisa inu ìbosa igwa ngwugwa inyi Okumugwem inu. Môsa gwun̄ orie arọọn̄ acha ge eyi kpunube ìroon̄ geege me lek inu, inyi mêsabe igwa ngwugwa ewọwọp iriọk, mè isa si gwun̄ uman arọọn̄ ge eyi kpunube ìroon̄ geege me lek inu, inyi mêsabe igwa ngwugwa ijo inu, mè isa si orie arọọn̄ ge eyi kpunube ìroon̄ geege me lek inu, inyi mêsabe igwa ngwugwa esuuk. 15 Ene ya môsa si ngwugwa akpa mè miin̄ ebegwook me ijọn̄ eyi òje me lek ngwugwa cha igbaalek inu. Môsa si òjot òjot okwun fituru kpetap olat me lek inu. Fituru cha ìbore unin̄i fituru eyi esabe atalek akpa ekọkọk etapbe aran̄ me lek irọ, mè nchicha echiọọkbe aran̄ me lek.
16 “Ogwu ngwugwa mônenisa inu ngwugwa cha inu me isi Okumugwem, mè inisa igwa ngwugwa ijo inu mè ngwugwa ewọwọp iriọk, 17 mè isa orie arọọn̄ ya melek okwun fituru kpetap olat me lek ya igwa ngwugwa esuuk, mè ngwugwa akpa òje me lek, mè igwook si miin̄ òje me lek.
18 “Ogwu ngwugwa isigwa ngwugwa cha isan̄a, ogwu ònyan̄a ibot eyi ifafaka lek kan̄ isun̄ esese inyi Okumugwem ya mônenikwọkọ ijeek isan̄a kpai me ibot kan̄ ya eyi òkup ìnyi Okumugwem, mè inikpulu ijeek cha òkup mbuban itap me emen ukan̄ òkisak me irak ngwugwa esuuk ya òkup me inyọn̄ ntook, me otu isotu Atanga Chinichini.
19 “Mgbọ ogwu òfaka lek kan̄ isun̄ esese inyi Okumugwem ya isikwọkọ ijeek kan̄ cha òkup mbuban isan̄a, ogwu ngwugwa mônenimọnọ ubọk orie arọọn̄ ya ge eyi etetem, mè imọnọ owut unin̄i fituru ge melek akpọk nchicha ge, echi kpunu olat me lek, me emen okwun ya, mè isa ema initap me akajit ubọk iba ogwu òfaka lek kan̄ isun̄ esese inyi Awaji ya. 20 Ogwu ngwugwa mônenibọkọ otutuuk inu cha iwuwum, kubọk ngwugwa ewuwuwum me isi Okumugwem. Inu ngwugwa cha ìre inu òkup mbuban. Inu cha ìkup inyi ogwu ngwugwa, igbaalek ngọ ejit anam ya eyi ngwugwa ewuwuwum, mè ukot anam ngwugwa inyinyi ya. Isigwa ngwugwa chi isan̄a kpai, ogwu ònyan̄a ibot ifafaka lek kan̄ isun̄ esese inyi Okumugwem ya mônenikọt ibene iyaka ikinwọ miin̄.
21 “Echichi ore ikan òkup inyi ene geelek ònyanyan̄a ibot ifafaka lek kan̄ isun̄ esese inyi Okumugwem. Ire, ire ene ya iyaka inichieek ofifi use igbaalek, igọọk me ike ubọk kan̄ osoon̄be, ene ya môsan̄a si use îchieekbe igọọk me ike ikan ifafaka lek kan̄ isun̄ esese inyi Okumugwem odobe.”
Uriaak ogwu ngwugwa obokisa igbana ene
22 Okumugwem onenitumu inyi Mosis ibe 23 itumu inyi Erọn mè ebi bọn ebirieen̄ ibe, “Enyi isibegbana ebi Ijeren, ìkitumu ìnyi ema ibe,
24 “ ‘Okumugwem igbana owu,
mè ichit owu.
25 Okumugwem ikaan̄ ata ejit me lek kwun̄,
mè inwọn melek kwun̄.
26 Okumugwem ikpọ owu chieen̄ me lek,
mè irọ inyi owu òkup me esuuk.’
27 “Ema isitan̄a erieen̄ n̄a igwook me lek ebi Ijeren, isa igbana ema, emi me lek n̄a si mâgbana ema.”