Otita alata okuket
10
Okumugwem onenitumu inyi Mosis ibe, 2 “Sa abaracha bọn̄ alata okuket, mè sa rom otita iba nyi lek kwun̄. Otita chi ke owu obokiwut isa ikigwen otutuuk ido ebi Ijeren, ema si ke obokiwut isa ikilook ebi Ijeren ibe ekat uwu ọfọ kiban̄, mè ejibi ije. 3 Osiwut otita iba cha, eya ìsibi ibe otutuuk ebi Ijeren enetitiin̄ me isi kwun̄ me isotu Atanga Chinichini. 4 Osiwut otita ge gaalek, eya ìsibi ibe ebi ibot otoko geelek me Ijeren gaalek, òrere ebi ibot ido ebi Ijeren, enu enetitiin̄ me isi kwun̄. 5 Osiwut otita ge inye sọntiik mgbidim mgbọ, eya ìsibi ibe otutuuk otoko ebi Ijeren ebi ìgwugwuun̄ uwu ọfọ kiban̄ me agan̄ mbum-ura ekat uwu ọfọ kiban̄, mè ebene ije. 6 Osiwut mgbidim ida otita eyi òso iba, eya ìsibi ibe otoko ebi Ijeren ebi ìgwugwuun̄ uwu ọfọ kiban̄ me agan̄ ichep-ura ekat uwu ọfọ kiban̄, mè ebene ije. Mgbidim ida otita ìre iman̄ òriọọn̄ inyi ema ibe ke mênijibi ije. 7 Mgbọ osiweek itititiin̄ otutuuk ido ebi Ijeren, owu môwut otita cha, ire, ìkpore mgbidim ida. 8 Îre bọn kè Erọn, ebi ngwugwa cha, ebekiwut otita cha. Eyi ìre ikan òbokup ire ukot kinyi geelek.9 “Mgbọ geelek ebi ochicha ebi ìkitutuku enyi isijibi akọn̄ inu me lek kinyi me inyọn̄ ijọn̄ kinyi, ìwut otita cha, ke Okumugwem Awaji kinyi môkeek enyi, mè inyan̄a enyi isibi me ubọk ebi ochicha kinyi. 10 Me mgbọ ijọk kinyi geelek, mè ìre owuwa ijọk echi enyi ekirie me ibot mgbọ, mè ìre ijọk Aya Onyan̄, enyi mêkiwut otita chi mgbọ enyi ekigwa ngwugwa ewọwọp iriọk, mè mgbọ enyi ekigwa ngwugwa esuuk. Eyi môre inu ǹkeek isa inyi enyi me isi Awaji kinyi. Emi nre Okumugwem Awaji kinyi.”
Ebi Ijeren mîjibi ije inan̄a me Saina
11 Me òso akọp usen iba me emen òso onyan̄ iba me òso acha iba karake ebi Ijeren enan̄abe me ido Ijipiti isibi, oduku inyọn̄ ya ojijibi ibene inan̄a me inyọn̄ Akpatan̄ Mbuban eyi Inyan̄a-ibot ya. 12 Ebi Ijeren ejijibi ije inan̄a me emen èwê Saina, mè ijijen̄e mege inire emen èwê agan̄ Paran, ere oduku inyọn̄ ya oyakabe ikeke. 13 Adasi ije yi ema ejebe, eje igọọk me ike Okumugwem onyibe ema ida inan̄a me otu kè Mosis.
14 Egop eyi ọgbọn̄ ebi ìje melek otoko kè Juda odasi ijibi ije, ebi otoko kecha ekekije me urum me urum ikigọọk. Nasiọn gwun̄ kè Aminadap ore ogwu ibot kiban̄. 15 Netanen gwun̄ kè Juwari ore ogwu ibot ebi otoko kè Isaka. 16 Eliabu gwun̄ kè Elọn ore ogwu ibot ebi otoko kè Jebulọn. 17 Ebi ọgbọn̄ keya ijeje isan̄a, enenikpọk Akpatan̄ Mbuban. Mgbọ ekpọkbe isan̄a, ebi owot iman kè Gasiọn mè ebi owot iman kè Merari, ebi ìkiben Akpatan̄ Mbuban ya, enenijibi ije eyi kiban̄.
18 Ebi owot iman kè Gasiọn mè Merari ijeje isan̄a, egop eyi ọgbọn̄ ebi ìje melek otoko kè Ruben onenijibi ije. Ebi kiban̄ ekekije me urum me urum igọọk. Elisuru gwun̄ kè Sediuru ore ogwu ibot kiban̄. 19 Selumien gwun̄ kè Surisadai ore ogwu ibot ebi otoko kè Simiọn. 20 Eliyasafu gwun̄ kè Dewen ore ogwu ibot ebi otoko kè Gadi.
21 Ebi ọgbọn̄ keya inanan̄a isan̄a, ebi owot iman kè Koyat, ebi ìkibeme otutuuk inu òkup mbuban ichit, enenijibi ije eyi kiban̄. Ere geelek ebetap efuuk, ekidadasi igwuun̄ Akpatan̄ Mbuban isan̄a sabum ebi ìbeme inu mbuban cha ekinije ire ere ya.
22 Ebi owot iman kè Koyat ijeje isan̄a, egop eyi ọgbọn̄ ebi ìje melek otoko kè Iferem onenijibi ije. Ebi kiban̄ ekekije me urum me urum igọọk. Elisama gwun̄ kè Amiyudu ore ogwu ibot kiban̄. 23 Gamalien gwun̄ kè Pedajuru ore ogwu ibot ebi otoko kè Manasi. 24 Abidan gwun̄ kè Gidiọn ore ogwu ibot ebi otoko kè Benjamin.
25 Me òta kan̄, egop eyi ọgbọn̄ ebi ìje melek otoko kè Dan, ìrere ebi ìkichit udun̄ otutuuk urum ebi Ijeren, onenijibi ije. Ebi kiban̄ ekekije me urum me urum igọọk. Îre ọgbọn̄ kè Dan obieen̄ udun̄ otutuuk ọgbọn̄ kechilọ. Ayejeri gwun̄ kè Amisadai ore ogwu ibot kiban̄. 26 Pagien gwun̄ kè Okaran ore ogwu ibot ebi otoko kè Ase. 27 Ayira gwun̄ kè Enan ore ogwu ibot ebi otoko kè Nafitali. 28 Eyiyi ore onineen̄ ike ebi Ijeren esabe ije me oniin̄ ije kiban̄ mgbọ ema ejibibe ije inan̄a me Saina.
29 Mosis onenitumu inyi ogwu ugot kan̄ ge ekigwen Yobabu, gwun̄ kè Rewena ogwu Midian, ogwu nte nwa kè Mosis, ibe, “Mgbọ keyi eji mêninan̄a me ere keyi ije ifo inyọn̄ ijọn̄ ere Okumugwem otumube ibe ke ọmọ môsa inyi eji. Na, na gọọk eji je si ere ya, ke eji mêriọọn̄ ubọk ikpọ owu. Mije, Okumugwem îchieek use ibe ke ọmọ môrọ inyi inu ije ijaan̄ me lek kiji ebi Ijeren.”
30 Yobabu ofọfọọk ibe, “In̄-in̄, m̀kpagọọk enyi ije. Kpan̄asi ikeya, mâgwu ikom ifo inyọn̄ ijọn̄ ido kiji, mè ama iman n̄a.”
31 Ire, Mosis otutumu inyi ọmọ ibe, “Soso, kanan̄a ìtele eji. Mije, owu oriọọn̄ ere eji mêkọtbe igwuun̄ uwu ọfọ kiji me emen èwê. Ire ogọọk eji ije, owu môkana chieen̄ inyi eji me emen èwê. 32 Ire owu ogọọk eji ije, ata inu geelek Okumugwem môsabe igbana eji, eji mêche si inyi owu.”
33 Ema enenijibi ije ije inan̄a me lek ogoon̄ Okumugwem, mè ikup me oniin̄ ije usen ita. Okop inyan̄a-ibot Okumugwem okekije me isi kiban̄ otutuuk usen ita cha ikiweek ere ema mêtapbe efuuk. 34 Mgbọ geelek ema ejibibe ije inan̄a me ere egwugwuun̄be uwu ọfọ kiban̄, oduku inyọn̄ Okumugwem îra ikije me isi kiban̄ egwe geelek.
35 Mgbọ geelek okop inyan̄a-ibot ya isijibi ije, Mosis îra itumu ibe,
“Nan̄a keke, jei Okumugwem,
mè yiyala ebi ochicha kwun̄,
mè rọ inyi ebi oriara kwun̄
eliin̄ enan̄a me isi kwun̄.”
36 Okop inyan̄a-ibot ya isiyaka ikeke, Mosis îra itumu ibe,
“Gwu kom ka na, jei Okumugwem,
me etete ogbogbo
obop obop ebi Ijeren.”b