4 Mosis onenitumu inyi ebi Ijeren ibe erie ijọk Iraraka ya. 5 Ebi Ijeren enenirie ijọk Iraraka ya me emen èwê Saina, bene me otu ikakwun̄ me akọp mè usen ini me adasi onyan̄ me acha ya. Ebi Ijeren erie ijọk ya igọọk ubọk Okumugwem onyibe Mosis ida ibe erọ, kpesan̄a, kpetap.

6 Ire, îkaan̄ usini ebi ene ebi kpekọt igọọk irie ijọk ya me usen ya, mije, ema mîchaka mbuban me lek kiban̄ bak me lek ema echakbe ubọk me lek nkwukwu ene. Ife chi ejeje isi lek kè Mosis mè Erọn me usen yaage, 7 mè initumu inyi ibe, “Eji mîchaka mbuban me lek kiji mije eji echakbe ubọk me lek nkwukwu ene. Ire, ìre ejeje igban eji ibe eji ekagọọk otutuuk ebi Ijeren ìgbaan̄ ìgwa ngwugwa ìnyi Okumugwem me ibot mgbọ yi?”

8 Mosis ofọfọọk ema ibe, “Ìkweek sọnja ìban emi, inyi mâsi iweek iriọọn̄ inu enyi eberọ inan̄a me otu Okumugwem.” 9 Okumugwem onenitumu inyi Mosis ibe 10 itumu inyi ebi Ijeren ibe, “Me etete kinyi, mè ìyaka ire me etete bọn kinyi me ukot geelek, ene geelek òchaka mbuban me lek kan̄ mije îchakbe lek me lek inu òkwukwu, mè ene geelek òkup me ujọn̄ọ ere me oniin̄ ije me ike mgbọ ekirie ijọk Iraraka, ene ya môrie si ijọk Iraraka inyi Okumugwem. 11 Onyan̄ eyi otutuuk ebi Ijeren egbaan̄be irie ijọk ya isiraka, ìbore me onyan̄ ògọgọọk, me akọp mè usen ini, me otu ikakwun̄ kan̄ ke ife cha eberie ijọk Iraraka eyi kiban̄. Ema mêsa fituru kpunube olat me lek mè ujat inwan̄ igbaalek irie ijọk ya. 12 Ema ebererie otutuuk inorie ijọk ya isan̄a me ikakwun̄ usen ya, geege ìkposik iwele egwe. Kpebefan̄a si ukwuuk geege me lek anam ijọk ya ema ekpan̄be isa irie ijọk ya. Eberie ijọk ya igọọk me ikan ijọk Iraraka.

13 “Ire, ire ene ìkachaka mbuban me lek kan̄, ìkakup si me oniin̄ ije me mgbọ ijọk ya, mè ire ene ya ijit igọgọọk irie ijọk Iraraka ya me mgbọ otutuuk ene ekirie, ebesasan̄a ogwu òkup ikeya isan̄a me otu ifuk ebi kiban̄, mije, ìkagwa ngwugwa Okumugwem me ibot mgbọ kan̄. Mije keya, ijo inu kan̄ ìbotoon̄ me ibot kan̄ gaalek.

14 “Ire ogwu ichen òluk me etete kinyi iweek igọgọọk irie ijọk Iraraka yi inyi Okumugwem, enyi ikajit. Ìtele inyi igọọk enyi irie. Ire, ogwu ichen ya ìborie ijọk ya igọọk me lek ikan mè nteme òkikpulu ijọk ya. Mije, ikan yaage obokikpulu ebi ìberie ijọk ya, mè ìre bọn owot, mè ìyaka ire ebi ichen.”

15 Me usen egwuun̄be Akpatan̄ Mbuban ya, òrere si Atanga Inyan̄a-ibot, oduku inyọn̄ ìduduku ichit uwu ya ke bùk. Me ikakwun̄, oduku inyọn̄ ya okekilomo kubọk ukan̄, mè ikup ikeya iwele egwe. 16 Ikeya ke oduku inyọn̄ ya okpọkpọ ikeke ibia me inyọn̄ uwu ya. Isire eririeen̄, îra ikilomo kubọk ukan̄. 17 Mgbọ geelek oduku inyọn̄ ya isijibi ibene inan̄a me inyọn̄ Akpatan̄ Mbuban ya, otutuuk ebi Ijeren mîra ijibi ije ikije igọọk oduku inyọn̄ ya. Ere geelek oduku inyọn̄ ya oyakabe ikeke, ere keya ke ebi Ijeren ebegwugwuun̄ uwu ọfọ kiban̄, mè ikup itap efuuk. 18 Mgbọ geelek Okumugwem isinyi ida ibe eje, ebi Ijeren mîra ijibi ije. Mgbọ Okumugwem isiyaka inyi ida ibe etap efuuk, ebi Ijeren mîra iyaka itap efuuk.

Otutuuk mgbọ geelek eyi oduku inyọn̄ ya okekebe ibia me inyọn̄ Akpatan̄ Mbuban ya, otutuuk ebi Ijeren ebeluluk ibia me uwu ọfọ kiban̄ me ere m̀gba-ǹgwele ukan̄ geelek ema ekupbe. 19 Ike oduku inyọn̄ ya okekebe ifiin̄ me inyọn̄ Akpatan̄ Mbuban ya me ere ge, ikeya si ke otutuuk ebi Ijeren ebesiki ibot inyi ida Okumugwem, mè iluk ibia me ere ya, kpebejibi ije isi ere geege. 20 Usini mgbọ, oduku inyọn̄ ya ìkikeke me inyọn̄ Akpatan̄ Mbuban ya usen inen mè inen gaalek, sabum ònojibi òbene. Ikerere ikeya, ebi Ijeren ekigwugwuun̄ uwu ọfọ kiban̄ mgbọ Okumugwem obe egwuun̄, mè ijibi ije mgbọ Okumugwem obe ejibi ije. 21 Usini mgbọ, oduku inyọn̄ ya môkeke ibene me otu ikakwun̄ iwele egwe gaalek, mè ijibi ibene me ewelegwe. Oduku inyọn̄ ya isijibi ibene, mgbọ yaage, ebi Ijeren mîra ijibi ije. Mè ìre ikarek mè ìre eririeen̄ ke oduku inyọn̄ ya ojibi ibene, ebi Ijeren ebejijibi si ije igọọk oduku inyọn̄ ya me udun̄. 22 Mè ìre oduku inyọn̄ ya ìkeke me inyọn̄ Akpatan̄ Mbuban ya usen iba, mè ìre onyan̄ ge, mè ìre ogbogbo usen, mgbọ geelek oduku inyọn̄ ya ojibibe ibene, mgbọ ya si ke otutuuk ebi Ijeren ebejibi ije. Ire oduku inyọn̄ ya ìkajibi ìbene, ema kpebejibi ije. 23 Me otutuuk ije kiban̄, ema ekigban̄ ida Okumugwem inan̄a me otu kè Mosis. Mgbọ Okumugwem isinyi ema ida ibe etap efuuk, ema mîra itap efuuk. Mgbọ Okumugwem isiyaka inyi ema ida ibe ejibi ije, ema mîra ijibi ije.