6 “Owu môben ntook ngwugwa ya iniyik me isi isotu otunchit eyi oyet egep Akpatan̄ Mbuban ya, òrere si Atanga Chinichini, 7 mè iben okwa igwọk-lek ya iniyik me etete akpatan̄ ya me lek kan̄ melek ntook ngwugwa, mè itap mun̄ me emen okwa ya. 8 Owu môgwuun̄ ogọ oyet egep Atanga Chinichini ya ikat ikana, mè isa ekwut isotu igbaka ichit otunchit oyet egep ya.

9 “Owu môsa aran̄ mbuban ya inyan igwook me lek akpatan̄ ya mè lek otutuuk inu geelek òkup me emen kan̄, mè isa me ikeya igbama lek akpatan̄ ya mè otutuuk nroon̄ òje me lek, inyi ikup mbuban. 10 Owu môsa aran̄ mbuban ya inyan si me lek ntook ngwugwa ya mè lek otutuuk nroon̄ òje me lek, mè isa me ikeya igbama lek ntook ya, inyi ikana inu òkup mbuban ichit. 11 Owu mônyan si aran̄ ya igwook me lek okwa igwọk-lek ya mè urak kan̄, mè isa me ikeya igbama lek okwa ya.

12 “Osirọ inu kechi isan̄a, owu mônenisa Erọn mè ebi bọn inu me otu isotu akpatan̄ ya, mè inisa mun̄ igwọk ema lek, 13 mè initap Erọn ofọnti mbuban cha, mè initọkọ ọmọ aran̄ me ibot, mè isa me ikeya igbama ọmọ lek, inyi ikisi ikwaan̄ inyi emi kubọk ogwu ngwugwa. 14 Osigbama Erọn lek isan̄a, owu mônenisa ebi bọn inu si, mè initap ema ofọnti irak cha, 15 mè initọkọ ema aran̄ me ibot kubọk otọkọbe me ibot nte kiban̄, inyi ema ekesi ikwaan̄ enyi emi kubọk ebi ngwugwa. Itọkọ-aran̄ me ibot keyi môrọ inyi ebi owot iman kiban̄ ekana ebi ngwugwa isi ire ukot geelek.” 16 Mosis orọrọ otutuuk inu cha geelek ike Okumugwem onyibe ọmọ ida.

17 Sa me ikeya ke Mosis ogwuun̄ Atanga Chinichini me adasi usen eyi adasi onyan̄, me òso acha iba ema esibibe me Ijipiti. 18 Mosis îgwuun̄ Akpatan̄ Mbuban ya, mè iyik urak cha me irek kiban̄, mè igwuun̄ agbasi cha me emen urak cha, mè inigwuun̄ atà cha, mè inisa mgbugban cha igban. 19 Mgbọ îrọbe isan̄a, inenisa ochichit cha iwele ikana ichit inyọn̄ akpatan̄ ya, ge me inyọn̄ ge, ike Okumugwem onyibe ọmọ ida.

20 Inenimọnọ ewuuk iba Akọp Ikan cha okupbe me lek initap me emen okop inyan̄a-ibot ya, mè inisa ogbugboon̄ iba cha inwunwan̄ me lek okop ya, mè iniben ochichit kan̄ isa ichit me inyọn̄, 21 mè iniben okop inyan̄a-ibot ya initap me emen akpatan̄ ya, mè inijeen̄ ekwut mgban ya ikwek okop ata-ikọ ya, (òrere si okop inyan̄a-ibot), ike Okumugwem onyibe ọmọ ida.

22 Mosis oneniben ikasi Fituru Isi Awaji ya iniyik me emen Atanga Chinichini ya, me agan̄ inyọn̄ me emen akpatan̄ ya, me udun̄ ekwut mgban ya, 23 mè inineen̄ fituru cha me inyọn̄ ikasi ya, me isi Okumugwem, ike Okumugwem onyibe ọmọ ida.

24 Ineniben ngugọọn̄ mkpukan̄ ya initap me emen Atanga Chinichini ya, mè isa iniyik me usaba agan̄ ikasi Fituru Isi Awaji ya, eyi òrere agan̄ osiki me emen akpatan̄ ya, 25 mè inineen̄ otitọn̄ cha isun̄ me isi Okumugwem, ike Okumugwem onyibe ọmọ ida. 26 Ineniben si ntook nsensi esabe alata araran̄ irọ ya initap me emen Atanga Chinichini ya, mè isa iniyik me agan̄ isi ekwut mgban ya, 27 mè iniwọp nsensi òkidun̄u utop olu cha me inyọn̄ ntook ya, ike Okumugwem onyibe ọmọ ida, 28 mè inisa ekwut isotu ichit isotu akpatan̄ ya.

29 Mosis oneniben ntook ngwugwa ya iniyik me isotu Akpatan̄ Mbuban ya òrere si Atanga Chinichini, mè inigwa ngwugwa ewọwọp iriọk mè ngwugwa eyi akpa me inyọn̄ ntook ya, ike Okumugwem onyibe ọmọ ida.

30 Ineniben okwa igwọk-lek ya initap me emen Atanga Chinichini ya, mè isa iniyik me etete akpatan̄ ya melek ntook ngwugwa ya, mè initap mun̄ me emen, inyi mêkisa igwọk lek. 31 Mosis mè Erọn mè ebi bọn esasa mun̄ òkup me emen okwa ya igwọk ubọk kiban̄ mè ukot kiban̄. 32 Mgbọ geelek ema enin̄be emen Atanga Chinichini ya, mè ìre mgbọ ebeje igbet lek ntook ngwugwa ya, ema ekidadasi isa mun̄ emen okwa ya igwọk lek kiban̄, ike Okumugwem onyibe Mosis ida.

33 Mosis oneniwak ogọ oyet egep ya ikat ikana akpatan̄ ya me lek kan̄ melek ntook ngwugwa ya okokop, mè initap ekwut isotu me otunchit oyet egep ya. Sa me ikeya, Mosis orọrọ otutuuk ikwaan̄ iso, me ntuun̄ me ntuun̄, ike Okumugwem onyibe ọmọ ida.

34 Mgbọ yaage Mosis orọbe inu cha isan̄a, oduku inyọn̄ okakana ichit Atanga Chinichini ya ke bùk. Ujamgbugbo eyi Okumugwem ojojot emen akpatan̄ ya. 35 Mosis me lek kan̄ ìkakọt ìnin̄ emen Atanga Chinichini ya, mije, oduku inyọn̄ ìkakana ichit Akpatan̄ ya, ujamgbugbo Okumugwem oninin̄ ijot emen Atanga Chinichini ya.

36 Bene me mgbọ ya nyi isi, me otutuuk ije kiban̄, ìkire, mgbọ geelek oduku inyọn̄ ya isibene inan̄a me inyọn̄ akpatan̄ ya, ebi Ijeren mîra ibene ije kiban̄ ikije inyi isi. 37 Ire oduku inyọn̄ ya ìkabene ìnan̄a me inyọn̄ akpatan̄ ya, ema kpekijibi ije. Mêkup mege ire mgbọ oduku inyọn̄ ya isibene inan̄a me inyọn̄ akpatan̄ ya sabum ema enebene ije kiban̄. 38 Sa me ikeyi, oduku inyọn̄ eyi Okumugwem okekikup me inyọn̄ akpatan̄ ya me ikarek, ukan̄ okekikup me inyọn̄ akpatan̄ ya me eririeen̄. Ikeyi ke îkikup me isi ebi Ijeren me otutuuk ije kiban̄.