2 Bejalen ìsa alata araran̄ mè eri oluku oluku mè echi irio irio mè echi eje eje, mè atalek lilin̄ eyakabe ijaan̄ irọ mgbidim ofọnti ikwaan̄. 3 Ebọbọn̄ alata araran̄ ikup nseen̄ nseen̄, mè inibak isiik kubọk eri. Inenisa eri alata araran̄ cha ikpa itap me etete eri oluku oluku mè echi irio irio mè echi eje eje mè atalek lilin̄. Eyi ìre ubọk ikwaan̄ ogwu usọ ikwaan̄ ekwut. 4 Mîrọ ubọk ofọnti ya echi mêjeen̄be me oguga agan̄ iba, mè isa ichim iriaak me otu utọn̄ kan̄ agan̄ iba. 5 Ema egbagbaan̄ mgbidim ofọnti ya mè fanti òje me lek irọ, kperọ ema esese esese. Chieen̄ fanti ya ìre lek ge melek ofọnti ya, esa alata araran̄ mè eri oluku oluku mè echi irio irio mè echi eje eje mè atalek lilin̄ eyakabe ijaan̄ irọ, ike Okumugwem onyibe Mosis ida.

6 Ema enenisa ewuuk unye otu ewe ekigwen onikisi irọ iman̄ òriọọn̄, mè isa alata araran̄ ikpa ikana ewuuk cha, inyi itet inye, mè initibi erieen̄ bọn ebirieen̄ kè Ijeren me inyọn̄. 7 Ema enenisa ewuuk unye otu ewe cha inwaan̄ me lek ubọk ofọnti ya me inyọn̄ oguga agan̄ iba mgbidim ofọnti ikwaan̄ ya, inyi ema enekana inu ebekisa ikeek bọn kè Ijeren, ike Okumugwem onyibe Mosis ida.

8 Bejalen onenirọ ekwut isi ejit, kubọk ubọk ikwaan̄ atalek ogwu usọ ikwaan̄. Ubọk erọbe mgbidim ofọnti ikwaan̄ ya ke erọ si ekwut isi ejit yi. Esa alata araran̄ mè eri oluku oluku mè echi irio irio mè echi eje eje mè atalek lilin̄ eyakabe ijaan̄ irọ. 9 Erọ ekwut isi ejit yi ìkike me agba ini kan̄. Ujọn̄ọ kan̄ mè uwele kan̄ ìre agbagba otubọk ge ge. Egbagba ekwut kan̄ mgbugbak iba isa irọ. 10 Ema enenigban ewuuk unye otu ewe ugban ini me inyọn̄ ekwut isi ejit ya. Ewuuk òkukup me adasi ugban ìre echi ekigwen rubi mè topaji mè berin. 11 Ewuuk òkup me ugban òso iba ìre tọkwọyis mè safaya mè emeran. 12 Ewuuk òkup me ugban òso ita ìre jasinti mè aget mè ametis, 13 sà echi òkup me ugban òso ini ore karasolet mè onikisi mè jasipa. Esa alata araran̄ ikpa ikana me utọn̄ ewuuk cha isa itet ema igọm me lek ekwut isi ejit ya. 14 Erọ ewuuk cha akọp mè iba, igọọk me otu ifuk bọn ebirieen̄ kè Ijeren. Etibi erieen̄ kiban̄ ge ge kubọk iman̄ òriọọn̄ me inyọn̄ ewuuk cha, kpa erieen̄ kpa ewuuk eyi kan̄, mege iso akọp mè otoko iba kiban̄.

15 Ema enenisa alata araran̄ eyi kpewọlọ ikpa mkpọn ekpakpa kubọk olik isa igbaka utọn̄ ekwut isi ejit ya. 16 Ema enenisa si alata araran̄ ikpa inu iba ekisa itet ewuuk ikaan̄, mè isa irom si ògbọ iba, mè iniben ògbọ alata araran̄ iba cha ijeen̄ me ibot usọk agan̄ iba me lek ekwut isi ejit ya, 17 mè inisa ibot mkpọn alata araran̄ iba cha igọbọ me lek ògbọ cha me ibot usọk iba eyi ekwut isi ejit ya. 18 Ema esa ibot mkpọn iba agan̄ kechilọ cha igọbọ me lek alata araran̄ ekpabe ikana me utọn̄ ewuuk iba cha, mè isa me ikeya igọbọ ewuuk cha ikam me inyọn̄ oguga mgbidim ofọnti ikwaan̄ ya agan̄ iba me agan̄ isi ofọnti ya. 19 Ikeya si ke ema enisa alata araran̄ irọ ògbọ iba, mè isa igọbọ me ibot usọk iba kechilọ me lek ekwut isi ejit ya me utọn̄ agan̄ emen echi òkup iriaak me lek mgbidim ofọnti ikwaan̄ ya. 20 Ubọk yaage ke ema enisa alata araran̄ irọ ofifi ògbọ iba, mè isa ichim itoon̄ me lek oguga iba eyi mgbidim ofọnti ikwaan̄ ya me ntut ijọn̄ kan̄ me agan̄ isi. Echim ògbọ cha igbet lek usọk ofọnti ikwaan̄ ya, inyi ibene sọnja inan̄a me lek fanti eyi ofọnti ya. 21 Ema enenisa eri oluku oluku itobo ògbọ òkup me lek ekwut isi ejit ya ikam me lek echi òkup me lek mgbidim ofọnti ikwaan̄ ya, inyi ekwut isi ejit ya ire ge melek fanti ofọnti ikwaan̄ ya, mè ekwut isi ejit ya ikajene ìnan̄a me lek ofọnti ikwaan̄ ya. Erọ otutuuk inu chi geelek ike Okumugwem onyibe Mosis ida.

22 Ema enenisa ekwut oluku oluku ichim àwurukù inyọn̄ eyi môjebe me lek mgbidim ofọnti ikwaan̄ ya. Eyi ìre ubọk ikwaan̄ atalek ogwu usọ ikwaan̄ ekwut. 23 Mîsan̄a ere ebekitap ibot itibi me eden̄ eden̄ àwurukù inyọn̄ ya. Elọlọk ebek ofọnti ya, mè ifan̄a igwook ikat ikana ere ebekitap ibot ya, inyi ikagwak. 24 Ema enenisa eri oluku oluku, mè echi irio irio, mè echi eje eje ilọk mfut pomegaranet ijijen ikana me otu utọn̄ àwurukù inyọn̄ ya, 25 mè inisa alata araran̄ eyi kpewọlọ irọ asabọn egiriga, mè isa itobo ikana si me otu utọn̄ àwurukù inyọn̄ ya, me etete mfut pomegaranet cha. 26 Ejijen egiriga alata araran̄ ge ge igọọk mfut pomegaranet ge ge ikeya ikana me otu utọn̄ àwurukù inyọn̄ ya eyi ogwu òban Awaji obokitap isa isi ikwaan̄. Erọ inu chi geelek igọọk me ike Okumugwem onyibe Mosis ida.

27 Ema enenisa atalek lilin̄ irọ ofọnti irak inyi Erọn mè ebi bọn. Ebi usọ ikwaan̄ ekwut elọk ofọnti cha. 28 Ikeya si ke ema enisa atalek ekwut lilin̄ irọ okpibot, mè irọ si akisi lilin̄, mè inisa atalek lilin̄ eyakabe ijaan̄ irọ ekwut-edim mgbidim ukot. 29 Esa ekwut chieen̄ oluku oluku mè echi irio irio mè echi eje eje mè atalek lilin̄ eyakabe ijaan̄ irọ fanti ike Okumugwem otemebe Mosis. Eyi si ìre ubọk ikwaan̄ ogwu usọ ikwaan̄ ilọk-ekwut.

30 Ema enenisa alata araran̄ eyi kpewọlọ irom sọntiik uwot akpakpa ge, òrere ọgbọn ubọọn̄ òkup mbuban, mè itibi iman̄ òriọọn̄ me lek ibe: ÌKUP MBUBAN INYI OKUMUGWEM. 31 Enenisa olik oluku oluku itobo me ibot akpakpa uwot alata araran̄ ya agan̄ iba, mè isa initobo ikam me lek okpibot kè Erọn, ike Okumugwem onyibe Mosis ida.

32 Sa me ikeyi, otutuuk ikwaan̄ Akpatan̄ Mbuban ya, òrere si Atanga Chinichini, otata. Ebi Ijeren mîrọ otutuuk inu geelek iso. Ike Okumugwem onyibe Mosis ida ibe erọ, ikeya ke ema erọ. 33 Ema esasa Akpatan̄ Mbuban ya ijet Mosis. Mîsa akpatan̄ ya me lek kan̄ mè otutuuk nroon̄ òje me lek inyi Mosis. Nroon̄ cha ìre ebi kè ugọbọ kan̄ mè agbasi kan̄ mè mgbugban kan̄ mè atà kan̄ mè urak òje me lek kiban̄; 34 mè ochichit ya esabe ikpa orie arọọn̄ ekpan̄be chieen̄ ikana araran̄ irọ, mè ochichit eyi esabe ikpa ima irọ, mè ekwut mgban ya; 35 mè okop ata-ikọ mè ogboon̄ nsan òje me lek, mè ogbugboon̄ kan̄ cha; 36 mè ikasi Fituru Isi Awaji mè otutuuk nroon̄ òje me lek, mè Fituru Isi Awaji; 37 mè ngugọọn̄ mkpukan̄ ya esabe alata araran̄ eyi kpewọlọ irọ, mè otutuuk otitọn̄ kan̄ me onineen̄ kiban̄, mè otutuuk nroon̄ òje me lek ngugọọn̄ ya, mè aran̄ ekisa imin mkpukan̄ cha; 38 mè ntook alata araran̄ ya, mè aran̄ mbuban, mè nsensi utop olu cha, mè ekwut isotu akpatan̄ ya me lek kan̄; 39 mè ntook esabe ekwe irọ, mè odidọ òje me lek eyi esabe ekwe si irọ, mè ogbugboon̄ kan̄ cha, mè otutuuk nroon̄ òje me lek ntook ya; mè okwa igwọk-lek, mè urak kan̄; 40 mè otutuuk ekwut ukwek esabe igbaka ikana oyet egep ya, mè otutuuk atà kiban̄ mè urak òje me lek kiban̄; mè ekwut isotu otunchit oyet egep ya mè olik òje me lek, mè otutuuk okpọ̀kọ kan̄; mè otutuuk nroon̄ ikwaan̄ Akpatan̄ Mbuban ya, òrere si Atanga Chinichini; 41 mè ujuja ofọnti elọlọk cha, echi mêkisa isi ikwaan̄ me Ere Mbuban, mè ofọnti mbuban echimbe inyi Erọn ogwu òban Awaji, mè echi echimbe inyi ebi bọn, inyi ema eketap esa ekesi ikwaan̄ kubọk ebi ngwugwa.

42 Ebi Ijeren mîrọ otutuuk ikwaan̄ Akpatan̄ Mbuban ya igọọk me ike Okumugwem onyibe Mosis ida. 43 Mosis onenikpọ otutuuk ubọk ikwaan̄ cha, mè imun̄ ibe ke mîrọ otutuuk inu cha ike Okumugwem onyibe ida. Mosis onenigbana otutuuk ebi Ijeren.