Ntook ngwugwa ewọwọp iriọk
38
Bejalen onenisa uti akasia inama ntook ngwugwa. Ìnama ntook ya ìkike me ujọn̄ọ mè uwele. Ujọn̄ọ kan̄ ìre ejit ge mè agbagba otubọk iba, uwele kan̄ ìre si ejit ge mè agbagba otubọk iba. Ubene kan̄ onenire agbagba otubọk gweregwen. 2 Înama iko ini me ibot usọk ini eyi ntook ya. Ìgbagbaan̄ ntook ya melek oguga kan̄ cha inama, mè inisa ekwe ichọkọ ichit lek. Ìkanama ema esese esese. 3 Esa ekwe irọ otutuuk nroon̄ ikwaan̄ òje me lek ntook ya, òrere ebi kè okwa ekisa itap ntọn̄ ngwugwa, mè òcha ekisa ichibi ntọn̄, mè ewop inyan eje, mè ochichim ekisa ichim anam, mè alala ekisa ilọbọ ukan̄. 4 Bejalen onenisa ekwe irọ odidọ, mè iben itap me irak ukpọk-otu ntook ya, mè ibieen̄ ikwala itap ire ìkike iba ntook ya, 5 mè inisa ekwe irọ ògbọ ini, mè itap ge ge me ibot usọk ini eyi odidọ ya, inyi mêkisa itap ogbugboon̄ iben ntook ya. 6 Esa uti akasia irọ ogbugboon̄ iba cha, mè inisa ekwe ichọkọ ichit lek. 7 Enenitap ogbugboon̄ cha itibi chieen̄ ògbọ cha me agba owot ntook ya agan̄ iba, inyi mêkitet isa ikiben ntook ya. Esa uwot irọ ntook ya, emen kan̄ ofok.Okwa igwọk-lek
8 Bejalen onenisa ekwe irom okwa ge eyi mêkisa itap mun̄ igwọk lek, mè isa si ekwe irom urak kan̄. Ìsa umọọn̄ îbọkọbe me ubọk ebibaan̄ ebi ìkisi ikwaan̄ me otu isotu Atanga Chinichini ya irọ okwa ya mè urak kan̄.
Oyet egep Akpatan̄ Mbuban
9 Bejalen onenirọ oyet egep Akpatan̄ Mbuban ya. Me agan̄ osiki, ìsa ekwut ukwek eyi atalek lilin̄ eyakabe ijaan̄ igbaka chit. Ujọn̄ọ ekwut ukwek agan̄ ya ìre akọp ejit iba mè go. 10 Inenisa ekwe irọ akọp atà iba mè akọp urak iba òje me lek kiban̄, mè inisa alata okuket irọ ugọbọ mè ndali echi mêsabe ijeen̄ ekwut ukwek ya me ibot atà cha òkup me agan̄ osiki ya. 11 Ujọn̄ọ oyet egep ya me agan̄ inyọn̄ ìre si akọp ejit iba mè go. Inenisa ekwe irọ akọp atà iba mè akọp urak iba òje me lek kiban̄, mè inisa alata okuket irọ ugọbọ mè ndali echi mêsabe ijeen̄ ekwut ukwek me ibot atà cha òkup me agan̄ inyọn̄ ya.
12 Ujọn̄ọ oyet egep Akpatan̄ Mbuban ya me agan̄ ichep-ura ìre akọp mè ejit iba mè okpọkọ. Inenirọ akọp atà mè akọp urak òje me lek kiban̄ inyi agan̄ ya, mè inisa alata okuket irọ ugọbọ mè ndali echi mêsabe ijeen̄ ekwut ukwek me ibot atà òkup me agan̄ ichep-ura ya. 13 Ujọn̄ọ agan̄ mbum-ura ìre si akọp mè ejit iba mè okpọkọ. 14 Me agba lek isotu agan̄ ge me lek oyet egep Akpatan̄ Mbuban ya, mîtap atà ita mè urak ita òje me lek kiban̄, mè isa ekwut ukwek eyi ujọn̄ọ kan̄ orebe ejit ita mè agbagba otubọk gweregwen igbaka ichit. 15 Me agba lek isotu agan̄ keyilọ, mîtap si atà ita mè urak ita òje me lek kiban̄, mè isa si ekwut ukwek eyi ujọn̄ọ kan̄ orebe ejit ita mè agbagba otubọk gweregwen igbaka ichit. 16 Esa atalek lilin̄ eyakabe ijaan̄ ilọk otutuuk ekwut ukwek esabe igbaka ichit otutuuk oyet egep Akpatan̄ Mbuban ya. 17 Esa ekwe irọ otutuuk urak òkup me ebon otutuuk atà cha, mè isa alata okuket irọ otutuuk ugọbọ etọkọbe ikam me ibot atà cha, mè isa si alata okuket irọ ndali òje me lek, mè inisa si alata okuket ichọkọ ichit inyọn̄ ibot atà cha. Sa me ikeya, otutuuk atà esabe iwak ikana oyet egep ya okakaan̄ ndali alata okuket me ibot. 18 Ekwut isotu esabe ifieek ikwek otunchit oyet egep Akpatan̄ Mbuban ya ìre ubọk ikwaan̄ atalek ogwu usọ ikwaan̄ ekwut. Esa eri oluku oluku mè echi irio irio, mè echi eje eje, mè atalek lilin̄ eyakabe ijaan̄ irọ. Ujọn̄ọ ekwut ya ìre ejit go, sà ubene kan̄ (òrere uwele ekwut ya) ore ejit ge mè agbagba otubọk iba, inyi ije ìkike melek ubene otutuuk ekwut ukwek esabe igbaka ikana otutuuk oyet egep Akpatan̄ Mbuban ya. 19 Esa ekwe irọ atà ini mè urak ini òje me lek kiban̄, mè isa alata okuket irọ ugọbọ kan̄ mè ndali echi òje me lek kiban̄, mè inisa si alata okuket ichọkọ ichit inyọn̄ ibot atà cha. 20 Otutuuk okpọ̀kọ Akpatan̄ Mbuban mè okpọ̀kọ oyet egep òkakana ọmọ okokop, esa ekwe irọ.
Nroon̄ esabe inama Akpatan̄ Mbuban
21 Eyiyi ìre otu ifuk nroon̄ ikwaan̄ esabe inama Akpatan̄ Mbuban, ere esun̄be okop inyan̄a-ibot, eyi efukbe igọọk me ifuk Mosis onyibe ebi otoko kè Libai ida ibe efuk. Îre Itama gwun̄ kè Erọn ogwu òban Awaji okup me isi irọ ifuk ya. 22 Îre Bejalen, gwun̄ kè Uri, gwun̄ kè Uru, ogwu otoko kè Juda, orọ otutuuk inu cha Okumugwem onyibe Mosis ida ibe erọ. 23 Ogwu òtatap ubọk inyi ọmọ ìre Oyoliabu gwun̄ kè Ayisamak, ogwu otoko kè Dan. Oyoliabu ìre ogwu usọ ikwaan̄, mè ogwu òkikọt ililọkọ chieen̄ inu geelek, mè ire si ogwu usọ ikwaan̄ ekwut òrọriọọn̄ ikwaan̄ ekwut me chieen̄ me chieen̄, kubọk echi chieen̄ oluku oluku, mè echi irio irio, mè echi eje eje, mè echi atalek lilin̄. 24 Otutuuk alata araran̄ ebi Ijeren esabe inu ininyi Okumugwem kubọk ngwugwa ewuwuwum, inyi esa erọ ikwaan̄ òkup mbuban chi, îlobo iso obop kilo ge, igọọk me ubọk itọ-inu eyi Uwu Mbuban.
25 Otutuuk alata okuket ebọkọbe me ubọk ebi Ijeren, ebi efukbe me ifuk-ene ya, ìre obop kilo alata okuket ita mè efit ini mè akọp ita, igọọk me ubọk itọ-inu eyi Uwu Mbuban. 26 Ene geelek efukbe, ìnyi mbubak ikpoko alata okuket gea igọọk me ubọk itọ-inu eyi Uwu Mbuban. Otu ifuk otutuuk ebi efukbe cha, bene me lek ebi akọp acha iba fo inyọn̄, ìre efit obop ene gweregwen mè obop ene ita, mè efit go, mè akọp go, ebirieen̄ gaalek. 27 Obop kilo alata okuket ita mè efit ini cha ke esa irọ otutuuk urak echi òkup me Ere Mbuban, mè echi òkup me ebon atà ejeen̄be ekwut mgban ya me lek. Otutuuk urak cha ìre efit ge. Esa akọp kilo alata okuket ita mè ini irọ urak ge ge. 28 Akọp kilo alata okuket ita òsisik ke Bejalen osa irọ ugọbọ esabe itọkọ ikam me lek atà cha, mè isa ichọkọ ichit lek atà cha, mè isa si irọ ndali kan̄.
29 Otu ifuk ekwe esabe inu ininyi Okumugwem kubọk ngwugwa ewuwuwum ìre obop kilo ekwe iba, mè efit ini, mè akọp iba mè go. 30 Îre ekwe chi ke Bejalen osa irọ urak ebon atà òkup me isotu Atanga Chinichini ya, mè isa si irọ ntook ngwugwa mè odidọ kan̄, mè otutuuk nroon̄ òje me lek ntook ya, 31 mè isa si irọ otutuuk urak òkup me ebon atà esabe iwak ogọ ikana oyet egep ya, mè ebon atà echi otunchit oyet egep ya, mè isa si irọ otutuuk okpọ̀kọ òkup me lek Akpatan̄ Mbuban ya, mè echi òkup me lek ogọ ewakbe ikana oyet egep Akpatan̄ Mbuban ya.