3 Mosis otutumu inyi Erọn. Erọn oyiyik si otitọn̄ cha, utoon̄ kiban̄ okekitoon̄ me agan̄ isi ngugọọn̄ ya, ike Okumugwem onyibe Mosis ida. 4 Ikeyi ke erom ngugọọn̄ ya: Esa alata araran̄ ebọbọn̄ irom ngugọọn̄ ya, ibene me ebon kan̄ ire lek ajakajak kan̄, igọọk me lek mbet eyi Okumugwem ojeen̄be Mosis. Kpesan̄a, kpetap.

5 Okumugwem oneniteme Mosis ibe, 6 “San̄a otutuuk ebi otoko kè Libai sibi me etete ido ebi Ijeren sun̄ esese, mè gbama ema lek, inyi mbuban ikakup ema me lek. 7 Ikeyi ke owu obosa igwọk ema lek: Sa mun̄ ekisa igwọk ene lek nyan gwook ema me lek, mè tumu nyi ema ibe esa akwaan̄ ekwọkọ otutuuk ijeek esan̄a me otutuuk akpalek kiban̄, mè egwọk otutuuk ofọnti mè ekwut kiban̄. Ema isirọ ikeya isan̄a, mbuban ìkpoyaka ikup ema me lek. 8 Ema mênenisa gwun̄ eriembuuk ge inu, mè isa si akpa ekọkọk etapbe aran̄ me lek igbaalek inu, kubọk inu ngwugwa akpa òje me lek eriembuuk ya. Owu me lek kwun̄ mônenisa gwun̄ eriembuuk eyi òso iba inu, eyi mêsabe igwa ngwugwa ijo inu. 9 Owu mônenisa otutuuk ebi otoko kè Libai inu me isi Atanga Chinichini, mè ititiin̄ si otutuuk ido ebi Ijeren me ere ya, 10 mè inisa ebi otoko kè Libai inu me isi Okumugwem. Otutuuk ebi Ijeren mênenitoon̄ ubọk kiban̄ me lek ebi otoko kè Libai cha. 11 Erọn mônenibene ebi otoko kè Libai cha inyi Okumugwem kubọk ngwugwa ewuwuwum, òrere inyinyi òsibi esese, eyi otutuuk ebi Ijeren esabe ijet Okumugwem. Sa me ikeya, ebi otoko kè Libai mênenikana ebi ìkisi ikwaan̄ Okumugwem. 12 Ebi otoko kè Libai cha mênenitoon̄ ubọk kiban̄ me ibot eriembuuk iba cha, sabum mênisa ge igwa ngwugwa ijo inu, mè isa ge keyilọ igwa ngwugwa ewọwọp iriọk, isasa irọ esuuk me ibot ebi otoko kè Libai. 13 Owu mônenisan̄a ebi otoko kè Libai isibi, inyi enekeke me isi kè Erọn mè ebi bọn. Erọn mè ebi bọn mênenibene ema inyi Okumugwem, kubọk ngwugwa ewuwuwum, òrere inyinyi òsibi esese eyi esabe inyi Okumugwem. 14 Sa me ikeyi, owu môsasan̄a ebi otoko kè Libai isibi me etete ebi Ijeren, inyi ema ekup esese esa enyi Okumugwem. Ema mênenikana ebi n̄a ọkpọkpọ.

15 “Osigwọk lek ebi otoko kè Libai isan̄a, mè ibene ema inyi emi kubọk ngwugwa ewuwuwum, òrere inyinyi òsibi esese, îre mgbọ keya ke ema ebenibene ikisi ikwaan̄ me emen Atanga Chinichini. 16 Me etete ebi Ijeren, esasan̄a ema isun̄ ọkpọkpọ inyi emi. Emi m̀mọmọnọ ema inyi lek n̄a me irek otutuuk adasi bọn ebirieen̄ ìchichili owot enenwaan̄ geelek me ido Ijeren. 17 Mije, gwun̄ enerieen̄ geelek òchichili owot ogwu uga me ido Ijeren ìre eyi n̄a ọkpọkpọ, mè ìre ebilene, mè ìre anam. Mgbọ mkpan̄be otutuuk adasi bọn ebirieen̄ geelek me Ijipiti, ǹsasan̄a adasi bọn ebirieen̄ ebi Ijeren isun̄ esese inyi lek n̄a. 18 Mgbọ keyi, m̀bamọmọnọ otutuuk ebi otoko kè Libai isun̄ esese inyi lek n̄a, me irek otutuuk adasi bọn ebirieen̄ geelek ìchili owot enenwaan̄ geelek me ido Ijeren. 19 Eya orọ, nra imọnọ ebi otoko kè Libai isan̄a me etete otutuuk ebi Ijeren, mè iyaka inikana ema inyi Erọn mè bọn ebirieen̄ kan̄, kubọk inyinyi òsibi esese. Îre ebi otoko kè Libai ebekisi ikwaan̄ ebi Ijeren mekisi me emen Atanga Chinichini, mè ikirọ esuuk me ibot ebi Ijeren, inyi ema ekaje ìgbet Ere Mbuban, mè ijo orukan̄ òkpan̄ ene ikakpan̄ ema ìsan̄a.”

20 Mosis mè Erọn melek otutuuk ido ebi Ijeren erọrọ otutuuk inu cha Okumugwem onyibe ida ibe erọ me lek ebi otoko kè Libai. Ike Okumugwem onyibe Mosis ida ibe erọ, ikeya ke ema erọ, kpesan̄a, kpetap. 21 Otutuuk ebi otoko kè Libai egwọgwọk lek kiban̄, mè igwọk otutuuk ofọnti mè ekwut kiban̄. Erọn oyayaka ema inyi Okumugwem kubọk ngwugwa ewuwuwum, mè irọ esuuk me ibot kiban̄, inyi mbuban ita ema me lek. 22 Mgbọ eya orakabe, ebi otoko kè Libai enenibene ikisi ikwaan̄ kiban̄ me Atanga Chinichini. Erọn mè ebi bọn ekekikpọ chieen̄ me lek ikwaan̄ kiban̄, ike Okumugwem onyibe Mosis ida ibe ema erọ.

23 Okumugwem onenitumu inyi Mosis ibe, 24 “Ikan òbokikpulu ikwaan̄ ebi otoko kè Libai ìre ikeyi: Enerieen̄ geelek me etete kiban̄, bene me lek ogwu akọp acha iba mè go fo inyọn̄, môbene ikinu inisi ikwaan̄ me emen Atanga Chinichini. 25 Ogwu enerieen̄ geelek òkisi ikwaan̄ isiso akọp acha go, môsi itap efuuk, ìkpoyaka ikisi ikwaan̄ igak ikeya. 26 Ọmọ môkọt ikigọọk ebi ngwan̄ kan̄ ikibem ere me Atanga Chinichini. Ire, ìkpoyaka ichak ubọk me lek ikwaan̄ geege. Îre ikeyi ke owu, Mosis, obosa idọmọ ikwaan̄ inyi ebi otoko kè Libai.”