3 Mosis ogbagban̄ ida Okumugwem, mè iria ebi ife cha isibi inan̄a me emen èwê agan̄ Paran. Ema otutuuk ìre ebi ibot ebi Ijeren. 4 Erieen̄ ebirieen̄ cha me otoko me otoko ìre ikeyi:

16 Ebirieen̄ chi ebi ebakbe erieen̄ kiban̄ ke Mosis oria ibe esi ejijen̄e ekana ekpọ ijọn̄ Kenan. Mosis oneninyi Osiya gwun̄ kè Nun aya erieen̄, Josuwa.^a

17 Mgbọ Mosis oriabe ebirieen̄ cha isibi ibe esi ekpọ ijọn̄ Kenan, îtumu inyi ema ibe, “Enyi mênan̄a me ere yi ije isi ntut agan̄ inyọn̄, ikifo èwê agan̄ osiki, mè ije inene isi agan̄ inyọn̄ ijọn̄ ogoon̄ ogoon̄. 18 Ìgwuun̄ chieen̄ ìkpọ ike ijọn̄ ya okupbe. Ìweek ìriọọn̄ si mè ìre ebi ido ya mînye lek mè ìre kpenye lek, mè ìre ema mîwa me otu ifuk, mè ìre kpewa. 19 Ìweek ìriọọn̄ si ubọk ijọn̄ kiban̄ okupbe, mè ìre ata ijọn̄, mè ìre ijo ijọn̄. Ìkpọ si ubọk ama ile cha ema elukbe me emen okupbe, mè ìre mîwak mgban akọn̄ ikana ama cha, mè ìre kpewak. 20 Ìkpọ si mè ìre ijọn̄ kiban̄ ìre ijọn̄ òkitibi inu, mè ìkare, mè ìre uti îtibi iwa me inyọn̄ ijọn̄ ya, mè ìre ìkatibi. Ìnye lek ìsa usini mfut ònan̄a me inyọn̄ ijọn̄ ya ìkaan̄ me ubọk ìka.” Ibot mgbọ ya ìre mgbọ gerep obenebe ikiren̄e.

21 Ebirieen̄ cha enanan̄a ije, mè isi ikijijen̄e ikana me inyọn̄ ijọn̄ ya, ibene me èwê Jin òkup me agan̄ osiki isi igwook me Reyobu òkup me oniin̄ òkisi Lebo Amat me agan̄ inyọn̄. 22 Ema ebebene me èwê agan̄ osiki, mè ije mege isi ire Eburọn, ere ebi Ayiman mè ebi Sesai mè ebi Talimai, ìrere ebi otoko ebi Anak ebi ujọn̄ọ ile cha, elukbe. Edadasi inama ama Eburọn acha jaaba iraka sabum eninama ama Sowan eyi òkup me ido Ijipiti. 23 Mgbọ ema ejebe inire iteke Esikon, ema efefieek otu agọọk olik gerep ge òtoto njọ gerep ge òmimin ire lek ene iba esabe uti itap itibi, mè irak itoon̄ me oguga. Ema mîgbeme si mfut pomegaranet mè mfut figi igbaalek. 24 Egwen ere ya iteke Esikon,^b mije njọ gerep ile ya eyi ebi Ijeren efieekbe me ere ya. 25 Ebi enun̄unun̄ cha enenigwu ikom ika. Ije kiban̄ ìben ema akọp usen ini.

26 Ebi enun̄unun̄ cha eneninu me lek kè Mosis melek Erọn mè otutuuk ido ebi Ijeren me Kades eyi òkup me emen èwê agan̄ Paran, mè inikpa otutuuk inu geelek ema emun̄be inyi ema, mè isan̄a si mfut cha ònan̄a me inyọn̄ ijọn̄ ya isibi ijeen̄ ema. 27 Ema ekpa inyi Mosis ibe, “Eji mîsi ire inyọn̄ ijọn̄ ya eyi oriabe eji isi. Me atikọ, ijọn̄ ya ìre atalek ijọn̄ òkisibi inu ijaan̄, mè ire si ata ijọn̄ òkisibi anam mè mfut uti. Kpọ mfut ònan̄a me inyọn̄ ijọn̄ ya ire echi. 28 Ire, ebi ìluk me inyọn̄ ijọn̄ ya ìre atalek ebi unye. Ama kiban̄ si îmiin̄ enenen. Ewawak atalek mgban akọn̄ ikana otutuuk ama cha. Ògak ge, eji mîmun̄ ebi Anak ebi ujọn̄ọ ile cha elukbe me inyọn̄ ijọn̄ ya. 29 Ebi Amalek eluk me èwê agan̄ osiki me inyọn̄ ijọn̄ ya, ebi Et mè ebi Jebus mè ebi Amọ eluk me agan̄ inyọn̄ ogoon̄ cha, sà ebi Kenan eluk me agba okwaan̄ Mediterenia mè agba okwaan̄ Jodan.”

30 Kelep otutumu ikọ me isi kè Mosis isa itap ebi ene unye me emen, mè ibe ema, “Ngwa, eji eneje esi ebọkọ inyọn̄ ijọn̄ ya me ìrot. Me atikọ, eji mêkọt ibọkọ ijọn̄ ya.”

31 Ire, ebi melek kan̄ esibe ije ya etutumu ibe, “Eji kpebekọt ikeke ida ife cha kubọk ge, mije, ife cha mînye lek enenen igak eji.” 32 Ebi melek kan̄ cha esasa ijo etip òfo me lek inyọn̄ ijọn̄ ya ema esibe itap ukpook ijot lek otutuuk ebi Ijeren. Ema ekitumu ibe, “Inyọn̄ ijọn̄ ya eji ejijen̄ebe ikana michat, ijọn̄ ya môkọt isa uraafiọọn̄ ikpan̄ ebi geelek ìluk me inyọn̄ kan̄ isan̄a kpai. Ògak ge, otutuuk ebi eji emun̄be me inyọn̄ ijọn̄ ya ìre ebi ujọn̄ọ ile ebi ujọn̄ọ ile. 33 Me ere ya, eji mîmun̄ ebi ujọn̄ọ ile, ebi owot iman kè Anak, ìrere ebi ido ebi ujọn̄ọ ujọn̄ọ cha. Me chieen̄ kiji, eji ekup kubọk akaka me isi kiban̄. Ikeya si ke ema ekimun̄ eji.”