Ebi Ijeren mîkpaka ibot
14
Me eririeen̄ usen ya, otutuuk ebi ido Ijeren ekekitaan̄ ukpo ito ito, mè ito ito iwele egwe. 2 Otutuuk ebi Ijeren ekekinunuun̄, mè ikinaan̄ ejit inyi Mosis mè Erọn, mè ikitumu ibe, “Mebe eji mîkwaan̄ ita me Ijipiti, mè ìyaka ire me emen èwê yi, eya kè ònwọn ogak ikeyi! 3 Ìre keke orọ Okumugwem obosa eji isi inyọn̄ ijọn̄ ya, inyi eji esi ekwaan̄ eta me otu oge akọn̄, mè ebi nwa kiji mè asa nsabọn kiji esi ekana inu efumbe me akọn̄? Ìre igwugwu ikom ifo Ijipiti kpomofat inwọn me lek kiji igak ikeyi?” 4 Ema ebebene ikitumu inyi ebi melek kiban̄ ibe, “Ngwa, eji enegobo ofifi ogwu ibot enyi lek kiji, mè eji enegwu ekom efon Ijipiti.”5 Mosis mè Erọn enanan̄a irọn̄ ikana isi ichit me ijọn̄ me isi otutuuk ebi Ijeren, me ere ya ema etitiin̄be. 6 Josuwa gwun̄ kè Nun melek Kelep gwun̄ kè Jefune, ebi ìgọgọọk isi enun̄unun̄ ya, esasa me ufieejit itaba ofọnti òkup ema me lek igwak, 7 mè ikitumu inyi otutuuk ebi Ijeren ìtititiin̄ ijot ere ya ibe, “Ikagban̄. Inyọn̄ ijọn̄ ya eji egọọkbe ijijen̄e ikana îjaan̄ enenen. 8 Ire ejit Okumugwem ibele melek kiji, ọmọ me lek kan̄ môsa eji ije isi inyọn̄ ijọn̄ ya, mè isa ijọn̄ ya inyi eji. Ijọn̄ ya ìre ijọn̄ òkisibi inu enenen, ata ijọn̄ òkisibi anam mè mfut uti. 9 Gaalek, ikakpaka ibot ìnyi Okumugwem. Ikatet si ukpook, mije, eji ebeteteen̄ ebi ìluk me inyọn̄ ijọn̄ ya imeen̄ isan̄a kpai. Ema kpekaan̄ ukput-lek geege. Eyi kiji, Okumugwem ọmọ òwa melek kiji. Ikatet ukpook me lek ife cha.”
10 Otutuuk ido ebi Ijeren ekekitumu ibe ke mêsa ewuuk itọọn̄ ema ene iba cha ikpan̄. Mgbọ yaage, ujamgbugbo Okumugwem osisibi itoon̄ me Atanga Chinichini ya me isi otutuuk ebi Ijeren. 11 Okumugwem otutumu inyi Mosis ibe, “Ìre ife chi ebekpọ emi chieen̄ isiki ire mgbọ owa ni? Sà ìre ife chi ebejit ichechieek me lek n̄a isi ire mgbọ owa, me lek otutuuk inu ukechieen̄ kechi nkirọ me etete kiban̄? 12 Mâria ijo orukan̄ itap me etete ife chi, mè ikpan̄ ema otutuuk isan̄a kpai, mè irọ owu òkana ikpele ido òmimin, mè inye lek igak ema.”
13 Mosis otutumu inyi Okumugwem ibe, “Ire orọ, ebi Ijipiti mênọ. Mije, îre me unye kwun̄ ke osa isan̄a ife chi isibi me irak ubọk kiban̄. 14 Ebi Ijipiti mêneniben etip inu yi ikpa inyi ebi ido ìluk me inyọn̄ ijọn̄ keyi. Ema ebi ìluk me inyọn̄ ijọn̄ yi mîwuuk lek inọ ibe ke owu, Okumugwem, òwa me etete ebi ife chi, ebi owu okisibi inu me isi kiban̄ isi me isi. Ema mînọ si ibe ke oduku inyọn̄ kwun̄ ìkije me inyọn̄ ibot kiban̄, ke owu òkije me isi kiban̄ me emen ujọn̄ọ efit oduku inyọn̄ me ikarek, mè emen ujọn̄ọ efit ukan̄ me eririeen̄. 15 Ire owu ogbaan̄ otutuuk ife chi ikpan̄ isan̄a mgbọ yaage, ebi ido chi geelek ìwuwuuk lek inọ etip kwun̄ mêtumu ibe, 16 ke owu, Okumugwem, òkakọt ìsa ebi ife chi ìsi ìtap me inyọn̄ ijọn̄ ya eyi owu ochieekbe ema use, ke îre eya orọ owu okpan̄be ema isan̄a me emen èwê.
17 “Eya orọ, Okumugwem, soso jeen̄ ikpele unye kwun̄ ya. Ke îre owu otumu ibe, 18 ‘Okumugwem ìkakigwat lek ìnaan̄ ejit. Okumugwem îjot me atata nnwọn, mè ikitele inu ikpak mè unye-ibot inyi ebi ene. Ire, ìkakilọlọ isusulu ogwu òrọ ijo inu osusut ògbegbe. Ìkisa mkpukpe ijo inu eyi ute orọbe ikpe nsabọn kan̄ mè bọn bọn kan̄ mege ire ukot òso ita, mè ukot eyi òso ini.’ 19 Mije ikpele ejit nsan kwun̄, soso, tele inu ikpak ebi ife chi nyi ema, kubọk owuukbe lek ikitele inyi ema bene me karake Ijipiti mege inire mgbọ keyi.”
20 Okumugwem onenifọọk Mosis ibe, “Nra itele inyi ema ike owu obeekbe. 21 Ire, nnyan̄a ibot ibe, kè lek ugwem n̄a, kè lek ujamgbugbo n̄a eyi òjojot otutuuk linyọn̄, 22 otutuuk ebi ìsasa chieen̄ imun̄ ujamgbugbo n̄a, mè imun̄ si otutuuk uyeke uyeke inu nrọbe me Ijipiti, mè echi nrọbe me emen èwê, mè igen si ibak ikitọ emi ikpọ, eyi mè ọmọ oso akọp mgbọ, mè ijit igbagban̄ ida n̄a, 23 kpunu ene geege ikeyi me etete kiban̄ òbosa chieen̄ imun̄ ijọn̄ ya eyi nnyan̄abe ibot inyi ebi nte nte kiban̄ ibe mâsa inyi ema. Kpunu ene geege ogwu òkpọkpọ emi chieen̄ isiki òborieen̄ chieen̄ me lek ijọn̄ ya. 24 Ire, ogwu usun̄ n̄a Kelep îkaan̄ ugwem òsisibi esese, mè ikigọọk emi me udun̄ me oniin̄ geelek me otutuuk ejit kan̄. Mije keya, mâsa ọmọ isi itap me inyọn̄ ijọn̄ ya eyi îsabe ukot kan̄ ije inin̄. Bọn owot iman kan̄ ebekaan̄ si ijọn̄ ya me ìrot. 25 Ebi Amalek mè ebi Kenan ekiluk me iteke ijọn̄ yi. Eya orọ, me iyakwut, ìgwu ìkom ìje ìfo agan̄ emen èwê, mè ìsi ìje me oniin̄ òkup me agba okwaan̄ Anyiaan̄.”
26 Okumugwem onenitumu inyi Mosis mè Erọn ibe, 27 “Ìre emi m̀bame nuunuun̄ ebi ijo ife chi ekinunuun̄ isi ire mgbọ owa mọnọ? Nuunuun̄ ebi Ijeren ekinunuun̄ ikeme emi îra ijot emi utọn̄. 28 Tumu nyi ema ibe ke emi nnyan̄a ibot ibe, kè lek ugwem n̄a, ikọ cha geelek nnọbe enyi ekitumu, emi mârọ si ikeya inyi enyi. Emi Okumugwem ntumu. 29 Otutuuk kinyi ebi ìnununuun̄ ikeme emi cha, ibene me lek ebi akọp acha iba ifo inyọn̄, ebi efukbe me mgbọ efukbe ene, enyi mêkwaan̄ ita kpai me emen èwê keyi. Nkwukwu kinyi môlilam ikana ere me emen èwê. 30 Kpunu ene geege me etete kinyi cha òbonin̄ inyọn̄ ijọn̄ ya, eyi mbenebe ubọk n̄a isa inyan̄a ibot ibe ke mâkpulu enyi isi itap, ilọ me lek kè Kelep gwun̄ kè Jefune mè Josuwa gwun̄ kè Nun gaalek. 31 Asa nsabọn kinyi cha ebi enyi ebe ke mêkana inu efumbe me akọn̄, emi mâsa ema isi itap me inyọn̄ ijọn̄ ya, inyi ema erie utop ijọn̄ ya eyi enyi ejitbe. 32 Ire enyi, emen èwê keyi ke nkwukwu kinyi oborurọn̄ọ igwook. 33 Nsabọn kinyi mêkana ebi òkpukpo arọọn̄ me emen èwê akọp acha ini. Ema mêmun̄ ukwook mije unye-ibot kinyi, mege ire mgbọ nkwukwu mgburudun̄ ene me etete kinyi ebi nte kiban̄ môlaakbe inyana me emen èwê. 34 Akọp usen ini ke enyi esa isi enun̄unun̄ me inyọn̄ ijọn̄ ya. Ikeya si, enyi mêbọkọ ufialek akọp acha ini mije unye-ibot kinyi, acha ge me ibot usen ge. Nsirọ inu mbarọ enyi isan̄a, mgbọ ya ke enyi mêniriọọn̄ ibe ke îfieek enenen enyi isasa emi irọ ogwu ochicha kinyi. 35 Emi Okumugwem ntumu. Emi m̀kpalọlọ si irọrọ inu chi me lek otutuuk ebi ijo ife cha me etete kinyi, ebi ìgbagbaan̄ ititiin̄ ikije ikeme emi. Emen èwê keyi ke ema ebeta. Ere keyi ke ema otutuuk ebekwaan̄ isan̄a kpai.”
36 Ebirieen̄ cha ebi Mosis oriabe ibe esi ejijen̄e ekana ekpọ inyọn̄ ijọn̄ ya, ebi ìkaka, mè inikpa ijo etip ofolek ijọn̄ ya ikana me etete ebi ido Ijeren, eyi ebi Ijeren esabe me ikeya inunuun̄ ikeme Mosis, 37 otutuuk kiban̄ ekwakwaan̄ isan̄a mgbọ yaage. Ijo orukan̄ ìkpọkpọk iso etete kiban̄, mè ikpan̄ ema otutuuk isan̄a me isi Okumugwem, mije ijo etip ema enilook ofolek ijọn̄ ya. 38 Me otu ifuk otutuuk ebi ìsisi enun̄unun̄ ya, îtata Josuwa gwun̄ kè Nun mè Kelep gwun̄ kè Jefune gaalek ekup me ògat ugwem.
39 Mosis oneniben ikọ cha Okumugwem otumube isi ikpa inyi ebi Ijeren. Uga ufieejit mè ito oninin̄ ijot emen otutuuk ene. 40 Me ata otu ewelegwe ofit iwele kan̄, ema ebebem lek isan̄a, mè ikije ifo inyọn̄ ogoon̄ ya, mè ikitumu ibe, “Kpọ eji ire ebi. Eji mîbem lek ijeje inene isi inyọn̄ ijọn̄ ya, eyi Okumugwem ochieekbe use inyinyi eji. Eji mîrọ ijo inu.”
41 Ire, Mosis otutumu inyi ema ibe, “Sà eyi ye? Enyi ekikpaka ibot me ida ikọ Okumugwem. Inu yi enyi ekirọ, ìkpokaan̄ ibot. 42 Ikalululuk ìje. Okumugwem ìkakup melek kinyi. Ebi ochicha kinyi mêtim ikpan̄ enyi mgbọ yaage. 43 Kpọ, ebi Amalek mè ebi Kenan òwa me isi kinyi. Mêkpan̄ enyi isan̄a me otu oge akọn̄ kiban̄. Mije, eyi enyi ejitbe Okumugwem itele, ọmọ ìkpokup melek kinyi.”