6 “Ire ebesa orie arọọn̄ igwa ngwugwa ya, mêsa iko atalek akpa ekọkọk ini esabe iko aran̄ olifu ge mè ntiko ita igbaalek ifuku. 7 Mêsa si iko miin̄ ge mè ntiko ita igbaalek inigwa ngwugwa miin̄ egwogwook òje me lek ngwugwa yi, eyi òkidun̄u utop olu òkibele Okumugwem ejit.

8 “Ire ebesa gwun̄ eriembuuk igwa ngwugwa ewọwọp iriọk mè ìre ofifi chieen̄ ngwugwa ukan̄, eyi ebesa irọ otu inyan̄a-ibot iso, mè ìre ngwugwa esuuk inyi Okumugwem, 9 me ibot gwun̄ eriembuuk ya, ogwu òbogwa ngwugwa ya môsa iko akpa ekọkọk gweregwen mè mgbidim esabe iko aran̄ olifu iba igbaalek ifuku inu, mè esa egwa ngwugwa akpa òje me lek ngwugwa ukan̄ ya. 10 Ogwu òbogwa ngwugwa ya môsa si iko miin̄ iba inu, mè esa egwa ngwugwa miin̄ egwogwook òje me lek ngwugwa ukan̄ ya, eyi òkidun̄u utop olu òkibele Okumugwem ejit. 11 Ikeyi ke ebekirọ me lek eriembuuk geelek, mè ìre orie arọọn̄ geelek, mè ìre gwun̄ arọọn̄ geelek, mè ìre gwun̄ ebot geelek ebesa inigwa ngwugwa òkup ikechi. 12 Mêkigwa chieen̄ ngwugwa òje me lek cha igọọk me otu ifuk anam esabe inigwa ngwugwa, mè ìre anam ge mè ìyaka ire owuwa anam.

13 “Ikeyi ke otutuuk bọn owot Ijeren ebekirọ mgbọ geelek ene geelek me etete kiban̄ obogwa ngwugwa òkidun̄u utop olu eyi òkibele Okumugwem ejit. 14 Me ukot geelek, ogwu ichen geelek mè ìyaka ire ene geelek ònunu inikup me etete kinyi, ogwu òbogwa ngwugwa ukan̄ òkidun̄u utop olu òkibele Okumugwem ejit, ubọk yaage enyi ekirọ ke ene ya si oborọ, kpebesasan̄a, kpebetatap si. 15 Ikan ge yi gaalek ke ebi ido Ijeren ebekisa ikpulu otutuuk ene, mè ìre bọn owot mè ìre ebi ichen. Eyi môre ikan òbokup ire mgbọ geelek me otutuuk ukot kinyi geelek. Ike îkupbe inyi bọn owot, ikeya si ke îkup inyi ebi ichen me isi Okumugwem. 16 Nteme yaage mè ikan yaage obokup inyi enyi mè ebi ichen ìluk me etete kinyi.”

17 Okumugwem onenitumu inyi Mosis ibe 18 itumu inyi ebi Ijeren ibe, “Mgbọ enyi isinin̄ inyọn̄ ijọn̄ ya mbasa enyi isi itap, 19 mè ibene ikirie inorie ònan̄a me ijọn̄ ya, enyi mêsan̄a usini me lek isa iche inyi Okumugwem kubọk inyinyi. 20 Enyi isirọ fituru, enyi mêsan̄a fituru ge me lek adasi owut akpa ekọkọk kinyi, mè isa iche inyi Okumugwem kubọk inyinyi. Ike enyi ekinyi Okumugwem inyinyi ònan̄a me ere ekigen̄ akpa, ikeya si ke enyi ebekinyi inyinyi keyi. 21 Enyi mêkinyi Okumugwem inyinyi yi ònan̄a me lek adasi owut akpa ekọkọk kinyi ire ukot kinyi geelek.

22 “Ire enyi itele irọrọ usini me lek otutuuk ikọ chi Okumugwem otọbe inyi Mosis, me enyi kpegegen ibak irọ, 23 mè ìre me lek otutuuk inu Okumugwem onyibe Mosis ida ibe enyi erọ, bene me chereyi si re ukot kinyi geelek, 24 mè ire erọ inu yi me kpegegen ibak, me ebi ido Ijeren kperiọọn̄, otutuuk ebi ido Ijeren mêsa gwun̄ eriembuuk ge inigwa ngwugwa ewọwọp iriọk eyi òkidun̄u utop olu òkibele Okumugwem ejit, mè igwa si ngwugwa akpa òje me lek, mè ngwugwa miin̄ egwogwook òje me lek ike ikan odobe, mè isa si orie ebot ge igwa ngwugwa ijo inu igbaalek. 25 Ogwu ngwugwa mônenirọ esuuk me ibot otutuuk ebi ido Ijeren. Okumugwem mônenitele inyi ema, mije, kpegegen ibak irọ inu ya. Ema si mîsa inu ngwugwa kiban̄ inu, inyi esa egwa ngwugwa ukan̄ enyi Okumugwem, mè igwa si ngwugwa ijo inu kiban̄ me isi Okumugwem, mije inu ema erọbe ilọ me ekariọọn̄ge. 26 Okumugwem mônenitele inyi otutuuk ebi ido Ijeren melek ebi ichen ìluk me etete kiban̄, mije, inu ya erọbe me ekariọọn̄ge îken otutuuk ene iso.

27 “Ire ke îre ene ge gaalek orọ ilọ me ikariọọn̄ge, ene ya môsa uman ebot acha ge inu inigwa ngwugwa ijo inu. 28 Ogwu ngwugwa mônenirọ esuuk me ibot ogwu ene ya òrọrọ ilọ me ikariọọn̄ge me isi Okumugwem. Isirọ esuuk isan̄a, Okumugwem mônenitele inyi ene ya. 29 Mè ìre gwun̄ owot Ijeren mè ìre ogwu ichen òluk me etete kinyi orọ ijo inu me ikariọọn̄ge, nteme ge yi gaalek okup inyi ema.

30 “Ire, ire ikaan̄ ogwu igen ibak irọn̄ ikan, mè ìre ene ya ìre gwun̄ owot mè ìyaka ire ogwu ichen, ìsibi ibe ke ene ya îkpọ Okumugwem isiki chieen̄. Ebesasan̄a ogwu òkup ikeya isan̄a me otu ifuk ebi kiban̄. 31 Mije, îre ikọ Okumugwem ke ene ya okpọ isiki chieen̄. Îre si ikọ Okumugwem otọbe ke îkpaka ibot me lek. Ogwu òkup ikeya, ebefefieek isan̄a. Awọ îbia ọmọ me ibot.”

32 Me mgbọ ebi Ijeren ekupbe me emen èwê, ema enenimun̄ ogwu enerieen̄ ge okititen̄e iye me Usen Mbuban. 33 Ebi ìmumun̄ ọmọ okiteen̄ iye ya, etetet ọmọ isa isi me isi kè Mosis mè Erọn me ere otutuuk ido ebi Ijeren etitiin̄be. 34 Etetet ọmọ ikaan̄ ikikpọ chieen̄ me lek, mije, Okumugwem ìkatumu-nu inu eberọ ọmọ. 35 Okumugwem onenitumu inyi Mosis ibe, “Mkpa okup inyi ene ya. Otutuuk ebi ido Ijeren etaba ene ya esibi udun̄ ama, mè eteen̄ ewuuk esa etọbọ ọmọ ekpan̄ me ere ya.” 36 Otutuuk ebi ido Ijeren etataba ene ya isibi ifo udun̄ ama, mè iteen̄ ewuuk isa itọbọ ọmọ, ike Okumugwem onyibe Mosis ida ibe erọ. Ene ya okwukwu.

37 Okumugwem onenitumu inyi Mosis ibe 38 itumu inyi ebi Ijeren ibe, “Mege ire ukot kinyi geelek, ene geelek ikitap afilafa òkididen̄ me otu utọn̄ ofọnti kan̄, mè isa eri oluku oluku igbaalek ikpa olik cha geelek. 39 Sa me ikeyi, enyi mêkaan̄ afilafa otu utọn̄ ofọnti chi mgbọ geelek. Mgbọ geelek enyi mêrieen̄be chieen̄ me lek olik cha, enyi mêkikeek otutuuk ikọ Okumugwem otọbe, inyi enyi ekerọ ikọ cha, mè ekakitele ema, mè ìkibubat ìkana ìgọọk inu ekiket kinyi okitọ inyi enyi, mè inu chieen̄ kinyi okimun̄. 40 Sa me ikeyi ke enyi ebekikeek otutuuk ikọ cha Okumugwem otọbe inyi enyi, mè ikirọ, mè isa me ikeya ikup me mbuban inyi Awaji kinyi. 41 Emi nre Okumugwem Awaji kinyi, ogwu òsasan̄a enyi isibi me ido Ijipiti, inyi emi ǹnenkana ǹre Awaji kinyi. Emi nre Okumugwem Awaji kinyi.”