4 Mgbọ Mosis onọbe ikọ yi, inanan̄a irọn̄ me ijọn̄, mè ikana isi ichit, 5 mè itumu inyi Kora mè otutuuk ebi melek kan̄ ibe, “Ewelegwe iyakwut, Okumugwem môjeen̄ ogwu òrere eyi kan̄, mè ogwu òkukup mbuban. Môrọ ibe ene ya ije igbet ọmọ ere me lek. Mgbọ ya, ene geelek Okumugwem môgobobe, ogwugwa ore ogwu ìborọ ibe ije igbet ọmọ ere me lek. 6 Owu Kora, mè otutuuk ebi melek kwun̄, inu enyi eberọ ìre ikeyi: Ogwu ikup, imọnọ ngigọ nsensi kan̄. 7 Isire iyakwut, ene geelek itap ukan̄ me emen ngigọ nsensi kan̄, mè igwook nsensi me lek ukan̄ ya, mè iben isi ikeke me isi Okumugwem. Ene geelek Okumugwem môgobobe, ogwugwa ore ogwu òkup mbuban. Enyi bọn kè Libai kechi, enyi migana!”

8 Mosis onenitumu inyi Kora ibe, “Enyi bọn kè Libai, ìgban̄ utọn̄. 9 Ìre ìkafat ìjot enyi owot ibe ke Awaji ebi Ijeren îsan̄a enyi me etete ebi ido Ijeren isun̄ esese, mè itaba enyi iriaak me lek kan̄, inyi enyi ekesi ikwaan̄ me Uwu Mbuban Okumugwem, mè enyi ekekeke me isi ebi ido Ijeren ekesi ikwaan̄ enyi ema? 10 Okumugwem îtaba owu melek ebi ngwan̄ kwun̄ ebi otoko kè Libai melek kwun̄ iriaak me lek kan̄. Mgbọ yi, ìre enyi eyaka ikiweek irek ebi ngwugwa igbaalek si? 11 Ǹdo-nu owu. Ìre Erọn ìre ekene, eyi enyi ekinunuun̄ ikeme? Eya orọ, îre Okumugwem me lek kan̄ ke owu mè ebi melek kwun̄ egbaan̄ ititiin̄ ikeme.”

12 Mosis oneniria ikwaan̄ ibe egwen Datan mè Abiram bọn kè Eliabu enyi ọmọ. Ema ejijit, mè ibe, “Eji kpebenu. 13 Eyi owu okpulube eji isibi inan̄a me inyọn̄ ijọn̄ ya òkisibi anam mè mfut uti ibosa inikpan̄ isan̄a me emen èwê, ìre eya ìkajot owu owot? Mgbọ keyi si, ìre owu òboyaka inisa lek kwun̄ ito kubọk ogwu ibot inyi eji ni? 14 Ògak ge, ìkare inyọn̄ ata ijọn̄ òkisibi anam mè mfut uti ke osa eji inu, òkanyi eji ijọn̄ geege me ìrot, òkanyi si eji uko gerep kubọk ochieekbe use. Ìre owu òbonirọkọ ife chi chieen̄ itap ema tuntun ni? In̄-in̄, eji kpebenu kubọk ge.”

15 Mosis onanaan̄ ejit enenen, mè itumu inyi Okumugwem ibe, “Okumugwem, kabọkọ ngwugwa geege me ubọk ife chi. Ǹkabọkọ kubọk inyinya akpan ge ikeyi me ubọk kiban̄, ìkakakaan̄ si ene ge kiban̄ nrọbe ijo inu.”

16 Mosis onenitumu si inyi Kora ibe, “Iyakwut, owu melek otutuuk ebi melek kwun̄ cha, enyi mêsibi inu me isi Okumugwem. Erọn mônu si. 17 Ogwu ikup iben ngigọ nsensi kan̄ ikaan̄ me ubọk, mè igwook nsensi me emen iwọp, mè isa inu me isi Okumugwem. Otutuuk efit ene iba mè akọp go cha mêsibi inu, kpa ogwu mè ngigọ nsensi kan̄ me ubọk kan̄, òsisibi efit ngigọ nsensi iba mè akọp go. Owu si môkaan̄ eyi kwun̄. Erọn si môkaan̄ eyi kan̄.” 18 Ema otutuuk ene ebeben ngigọ nsensi kiban̄, mè itap ukan̄ me emen, mè igwook nsensi me lek ukan̄ ya, mè isa inikeke me otu isotu Atanga Chinichini, kpa ogwu mè eyi kan̄. Mosis mè Erọn esasa si eyi kiban̄ inu. 19 Kora ofafiat ejit otutuuk ebi ido Ijeren ikeme Mosis mè Erọn, mè igwen ema otutuuk ititiin̄ me otu isotu Atanga Chinichini. Mgbọ yaage, ujamgbugbo Okumugwem okakana isibi me isi otutuuk ebi ido Ijeren cha ìtitiin̄ me ere ya. 20 Okumugwem otutumu inyi Mosis mè Erọn ibe, 21 “Ngwa, ìgwat lek, ìche lek kinyi ìsan̄a me lek otutuuk ebi ido Ijeren chi, inyi m̀kpan̄ ema ǹsan̄a mgbọ yaage.”

22 Mosis mè Erọn enanan̄a irọn̄ me ijọn̄, mè ikana isi ichit, mè ikiriaak Okumugwem ibe, “Jei, Awaji! Owu Awaji ogwu ònyinyi otutuuk ebilene efuuk ugwem! Ire ene ge irọ ijo inu, ìre owu môsa mije ijo inu ene ge ya gaalek orọbe igwuku unaan̄-ejit kwun̄ ibook me lek otuuk kè ido?”

23 Okumugwem ofọfọọk Mosis ibe, 24 “Tumu nyi otutuuk ebi ido Ijeren ibe eda lek ebọkọ me lek uwu ọfọ kè Kora, mè eyi kè Datan mè eyi kè Abiram.”

25 Mosis onanan̄a ikeke, mè ije isi lek kè Datan mè Abiram. Ebi ugane Ijeren egbugbuku igọọk ọmọ me udun̄. 26 Mosis otutumu inyi otutuuk ebi ido Ijeren cha ibe, “Soso, ìda lek ìsan̄a me lek uwu ọfọ ebi ijo ife chi. Ikachachak si ubọk me lek inu kiban̄ geege, inyi osusut ijo inu kiban̄ ikarie enyi si ìgbaalek.” 27 Otutuuk ene edada lek ibọkọ me lek uwu ọfọ kè Kora mè eyi kè Datan mè eyi kè Abiram. Datan mè Abiram esisibi inikeke me isi uwu ọfọ kiban̄, ema mè nwa kiban̄ mè bọn kiban̄ mè asa nsabọn kiban̄.

28 Mosis onenitumu inyi otutuuk ene ibe, “Sa me ikeyi ke enyi eberiọọn̄ ibe ke îre Okumugwem oria emi ibe emi ǹrọ otutuuk inu chi geelek nkirọ, ke ìkare emi nkisa me nkeek ejit n̄a gaalek ikirọ. 29 Ìkpọ, ire ife chi ikwaan̄ mkpa me oniin̄ otutuuk ebilene ekikwaan̄, mè ifon kubọk otutuuk ebilene ekifon, ìriọọn̄ ibe ke ìkare Okumugwem oria emi. 30 Ire, ire Okumugwem inirọ ayaya inu, mè irọ inyi ijọn̄ ichili otu, mè iben ema imeen̄, ema mè otutuuk inu geelek ema ekaan̄be, mè ema eje me ògat ugwem efon ama ekwukwu, mgbọ keya ke enyi mêriọọn̄ ibe ke îre Okumugwem ke ife chi ekpọ chieen̄ isiki.”

31 Ikọ ya òkitata Mosis me otu, ijọn̄ otọtọbọ ibum iba me irak kiban̄, 32 mè ika otu. Otutuuk kiban̄ erọrọn̄ inin̄ me emen, ema melek otutuuk ebi ototun̄ ukan̄ kiban̄, igbaalek kè Kora, mè otutuuk ebi melek kan̄ cha mè otutuuk inu ema ekaan̄be. 33 Ikeyi ke otutuuk kiban̄ eje me ògat ugwem ifon ama ekwukwu. Ijọn̄ ochichit otu ikwek ema me irak, ema melek otutuuk inu ema ekaan̄be. Sa me ikeya ke ema enan̄a me etete ebi Ijeren ichieen̄ ita dìp dìp. 34 Mgbọ ife cha ekitaan̄ ukpo, otutuuk ebi ido Ijeren cha ìkukup ikana me ere ya ebebene ikiliin̄ iweek agan̄ ebetap ibot, mè ikitaan̄ ukpo ibe, “Ijọn̄ mônimeen̄ eji si igbaalek!”

35 Okumugwem oraria ukan̄ inu, itataka otutuuk efit ene iba mè akọp go cha iriọk me ere ya ema ekupbe ikiwọp nsensi.

36 Okumugwem otutumu inyi Mosis ibe, 37 “Tumu nyi Elieja gwun̄ kè Erọn ogwu ngwugwa ibe ititen̄e ngigọ nsensi cha isan̄a me etete nkwukwu ife cha ukan̄ otakabe ikpan̄, mije ke ngigọ cha ìkup mbuban, mè iyiyala ukan̄ ya ikana. 38 Ngigọ nsensi chi ìre ngigọ ebi ìrọrọ ijo inu, mè isa ebek ugwem kiban̄ ibọkọ osusut. Eya orọ, mêsa abaracha ibọn̄ ngigọ cha ikana akpakpa, mè isa iwele ichit inyọn̄ ntook ngwugwa, mije, ema mîkana inu òkup mbuban, bak me lek esabe ema igwa ngwugwa inyi Okumugwem. Eyi môkana inu ikween̄-inu inyi ebi Ijeren.”

39 Elieja ogwu ngwugwa otititiin̄ ngigọ cha esabe ekwe irọ, echi ebi ife cha esabe inu sabum ekwaan̄be. Enenibọn̄ ngigọ cha ikana akpakpa, inyi mêsabe iwele ichit inyọn̄ ntook ngwugwa, 40 kubọk Okumugwem onyibe ida ibe irọ inan̄a me otu kè Mosis. Eyi ìre inu ǹkeek inyi otutuuk ebi Ijeren ibe ke kpunu ofifi ene geege òbokiwọp nsensi inyi Okumugwem, ilọ me lek ogwu owot iman kè Erọn. Ogwu ikpaka ibot, mè irọ, inu òrọrọ Kora mè ebi melek kan̄ môrọ si ene ya.

41 Me ofit iwele kan̄, otutuuk ebi Ijeren etititiin̄, mè ikitumu ikeme Mosis melek kè Erọn ibe, “Enyi mîkpan̄ ebi eyi Okumugwem.”

42 Mgbọ ema etitiin̄be, mè ikitumu ikeme Mosis melek kè Erọn, mè inikana isi ikpọ agan̄ Atanga Chinichini ya, me ekakpọge chieen̄, oduku inyọn̄ oduduku ikana ichit atanga ya ke bùk. Ujamgbugbo eyi Okumugwem okakana isibi. 43 Mosis mè Erọn ejeje inu isi Atanga Chinichini ya. 44 Okumugwem otutumu inyi Mosis ibe, 45 “Je nan̄a me etete ife chi, inyi m̀kpan̄ ema ǹsan̄a mgbọ yaage.” Mosis mè Erọn enanan̄a irọn̄ me ijọn̄, mè ikana isi ichit. 46 Mosis otutumu inyi Erọn ibe, “Gwat let mọnọ ngigọ nsensi kwun̄, mè lọbọ ukan̄ me inyọn̄ ntook tap me emen, mè gwook nsensi me lek, mè sa libi kana me etete ebi ife chi, mè rọ esuuk me ibot kiban̄. Mije, unaan̄-ejit Okumugwem îra ikpọkpọk isan̄a. Ijo orukan̄ îra ibene me etete ebi ife chi.” 47 Erọn omọmọnọ ngigọ nsensi kan̄, ike Mosis otumube, mè ilibi ekot ekot inin̄ etete ebi urum ene cha. Sabum mgbọ ya, ijo orukan̄ îra iwuuk lek ibebene me etete ebi ife cha. Erọn osasa nsensi ya irọ esuuk me ibot ebi ido Ijeren cha. 48 Me ike mgbọ ya, Erọn ìyaka inikeke me etete ebi ìkup me ugwem mè ebi ìkwakwaan̄. Ijo orukan̄ ya oyayaka ikeya, ìkayaka ìkpan̄ ene ofifi. 49 Otu ifuk ebi ìkwakwaan̄ me emen ijo orukan̄ ya ìre akọp mè obop ene ini mè efit jaaba, kpefuk ebi ìkwakwaan̄ mije unye-ibot kè Kora. 50 Ijo orukan̄ ya otata. Erọn onenigwu ikom igọọk Mosis me isotu Atanga Chinichini ya.