Mkpat kè Erọn îsek inwan̄
17
Okumugwem onenitumu inyi Mosis ibe, 2 “Tumu nyi otutuuk ebi Ijeren ibe ogwu ibot otoko geelek inyi owu mkpat ge me ibot otoko kan̄. Osibọkọ mkpat cha, òsisibi akọp mè mkpat iba igọọk me otu ifuk otoko ebi Ijeren, ge erieen̄ ogwu ibot geelek me lek mkpat kan̄. 3 Owu môge erieen̄ kè Erọn me lek mkpat ebi otoko kè Libai. Ogwu ibot otoko ge ìbonyi owu mkpat ge. 4 Osibọkọ otutuuk mkpat cha, owu môkpulu ema isi igwook me emen Atanga Chinichini me isi okop inyan̄a-ibot, ere nkinichichini melek kwun̄. 5 Ene geelek mâgobobe, mkpat kè ogwugwa môsek inwan̄ me lek. Sa me ikeyi, mâtap okputut inyi nuunuun̄ ebi Ijeren ekinunuun̄ ikeme enyi, inyi ikayaka ìre emi utọn̄ ìgak ikeya.”6 Mosis oneniben ikọ ya isi itumu inyi ebi Ijeren. Otutuuk ebi ibot otoko cha enyinyi Mosis mkpat. Ogwu ikup, onyi mkpat ge me ibot otoko kan̄. Otutuuk osisibi akọp mè mkpat iba. Mkpat kè Erọn si me otu ifuk mkpat cha. 7 Mosis okpukpulu mkpat cha isi igwook me isi Okumugwem me emen Atanga Inyan̄a-ibot.a
8 Me ofit iwele kan̄, Mosis ojeje isi emen Atanga Inyan̄a-ibot ya, mè isi imun̄ ibe ke mkpat kè Erọn, eyi òkeke inyi otoko kè Libai, îsek inwan̄ me lek, mè itibi oduk, mè igwook ajakajak ijot lek, mè ito si owuwa mfut alimọn òreren̄e me lek. 9 Mosis onenikpulu otutuuk mkpat cha isa inan̄a me isi Okumugwem isibi isi ijeen̄ otutuuk ebi Ijeren. Ema emumun̄. Ene geelek omọmọnọ mkpat kan̄.
10 Okumugwem otutumu inyi Mosis ibe, “Sa mkpat kè Erọn gwu kom si sun̄ me isi okop inyan̄a-ibot ya, inyi ire inu ikween̄-inu inyi otutuuk ebi unye-ibot ebi Ijeren. Sa me ikeyi, mâtap okputut inyi nuunuun̄ ebi Ijeren ekinunuun̄ ikeme emi, inyi ema ekakwaan̄ ìta.” 11 Mosis orọrọ ike Okumugwem onyibe ọmọ ida.