2 Ogwu ubọọn̄ Mowabu, òrere Balak gwun̄ kè Jipọ, îmun̄ inu ebi Ijeren erọbe ebi Amọ. 3 Mije keya, ukpook otetet ebi Mowabu enenen, bak me lek ema mîmun̄ ibe ebi Ijeren mîwa enenen. Urimi oninin̄ igak emen ebi Mowabu mije ebi Ijeren.

4 Ebi Mowabu eneniria etip ijet ebi ugane ama Midian ibe, “Ìkpọ, ebi ife chi mêmeen̄ otutuuk ama òkukup ikana eji okokop isan̄a kpai kubọk eriembuuk otaka mbubet imeen̄ isan̄a me oron.”

Mije ufieek-owot ebi Ijeren, Balak gwun̄ kè Jipọ, ogwu òre ogwu ubọọn̄ ebi Mowabu me ike mgbọ ya, 5 oneniria ene ibe esi egwen Balam gwun̄ kè Beyọ enyi ọmọ. Balam ìluk me ama Petọ me inyọn̄ ijọn̄ ebi kiban̄, me agba lek okwaan̄ Yuferetis. Balak ìbe elook Balam ibe ikeyi:

“Îkaan̄ urum ebi ife ge ìnan̄a me Ijipiti isibi inu. Ife chi mîwa enenen, mè ibaan̄ ichit otutuuk inyọn̄ ijọn̄. Me mgbọ keyi, ema me agba lek n̄a ekupbe. 6 Eya orọ, nye lek na, mè na fieek otu nyi ife chi nyi emi, mije, ema mînye lek enenen igak emi. Usini mgbọ, ire ofieek otu inyi ema, emi mâkọt itim akọn̄ ikpan̄ ema, mè irieen̄ ema isan̄a me inyọn̄ ijọn̄ yi. Mije, nriọọn̄ ibe, ene geelek owu ogbanabe, ugbana ìkikukup inyi. Ene geelek si owu ofieekbe otu inyi, ufieek-otu si okikup inyi.”

7 Ebi ugane ama Mowabu mè ebi ugane ama Midian enenimọnọ ikpoko ido-inu ikaan̄ me ubọk, mè inan̄a ije. Mgbọ ema erebe lek kè Balam, ema elolook etip Balak olookbe.

8 Balam onenibe ema, “Ìgọọk emi ìlaak ìwele egwe. Ikaan̄ inu Okumugwem otumube inyi emi, mgbọ egwe isiwele, mâtumu si inyi enyi.” Ebi ibot ido Mowabu cha egọgọọk Balam ikup iwele egwe.

9 Awaji onunu me lek kè Balam, mè inido ọmọ ibe, “Ìre ebi owa ire chi melek kwun̄?”

10 Balam ofọfọọk Awaji ibe, “Îre Balak gwun̄ kè Jipọ, ogwu ubọọn̄ Mowabu oria ema ibe esa etip enelook emi ibe, ke 11 îkaan̄ ebi ge ìnanan̄a me Ijipiti isibi inu, mè inin̄ ijot inyọn̄ ijọn̄ kan̄, mè emi ǹnu ǹnemfieek otu ǹnyi ife cha ǹnyi ọmọ, inyi ọmọ môkọtbe itim akọn̄ ikpan̄ ife cha, mè irieen̄ ema isan̄a me inyọn̄ ijọn̄ kan̄.”

12 Ire, Awaji otutumu inyi Balam ibe, “Kagọọk ema ìje. Kafefieek si otu ìnyi ife cha, mije, ema ìre ebi egbagbana isan̄a.”

13 Me ewelegwe, Balam obobolo chieen̄, mè itumu inyi ebi ibot mkpulu cha Balak oriabe ikwaan̄ ibe, “Ìgwu ikom ìfon, mije, Okumugwem îjit, ìkachieek ibe emi ǹgọọk enyi ǹje.”

14 Ebi ibot mkpulu Mowabu cha egwugwu ikom ifon igọọk Balak, mè isi ilook ọmọ ibe, “Balam îjit igọgọọk eji inu.”

15 Balak okpọkpọk iria ofifi ukpa ebi ibot mkpulu ebi ìwawa igak ebi adasi cha, mè isibi si isi igak ebiba, isi lek kè Balam. 16 Ema erere, mè itumu inyi Balam ibe,

“Balak gwun̄ kè Jipọ ìbe eji enetumu enyi owu ibe, soso, mè owu okachieek ibe inu geege ikput owu igọgọọk eji inu me lek kan̄, 17 mije ke ọmọ môwaak owu ubọk ijaan̄. Ikaan̄ inu geelek owu môtumube, ke ọmọ ìborọrọ inyi owu. Ìbe mè owu ònye lek ògọọk eji ònu, mè ònofieek otu ònyi ife cha, inyi inwọn me lek kan̄.”

18 Ire, Balam ofọfọọk ema ibe, “Ikerere ibe ke Balak ìtatap alata araran̄ mè alata okuket ijot emen otutuuk uwu kan̄ isa inyi emi, m̀kpakọt irọ ofifi inu geege, mè ìre eyi ilile mè ìre eyi sọntiik, ilọ me lek inu eyi Okumugwem Awaji n̄a onyibe ida ibe emi ǹrọ. 19 Mgbọ yi, enyi si, ìlaak me ere keyi ìwele egwe, kubọk ebi ìnunu adasi mgbọ elaakbe, inyi m̀gban̄-nu mè ìre îkaan̄ ofifi inu Okumugwem môyakabe itumu inyi emi.”

20 Awaji onunu me lek kè Balam me eririeen̄ ya, mè initumu inyi ibe, “Mije ebi ife cha ekpọkbe inu inenigwen owu, nan̄a keke gọọk ema je. Ire, inu geelek mâtumube inyi owu, eya ke owu oborọ.”

21 Me ofit iwele kan̄, Balam otititiin̄ inu itoon̄ me inyọn̄ uman inyinya akpan kan̄, mè igọọk ebi ibot mkpulu Mowabu cha ije. 22 Ire, Awaji onanaan̄ ejit enenen inyi Balam me lek ije ya îjebe. Mije keya, ogwu osat Okumugwem okekeke me oniin̄ ikwek ọmọ. Me ike mgbọ ya, Balam ìkilibi me inyọn̄ inyinya akpan kan̄. Ebi ikwaan̄ kan̄ ene iba wa si melek kan̄. 23 Inyinya akpan kè Balam omumun̄ ogwu osat Okumugwem ya okekebe me eden̄ oniin̄, melek oge akọn̄ îwọọkbe ikaan̄ me ubọk. Inyinya akpan ya otọtọp isi ikana, mè ibum inin̄ oron. Balam osusulu inyinya ya, inyi igwu ikom isi ije me lek oniin̄.

24 Ogwu osat Okumugwem ya osisi ikeke me ere oniin̄ ogbabe inwan, me agbagba uko gerep iba ewakbe mgban ikana me agba oniin̄ agan̄ iba cha. 25 Inyinya akpan ya omumun̄ ogwu osat Okumugwem ya okekebe, mè isi ije iriaak me agba lek mgban ya ikichichiki lek iweek iraraka. Ukot kè Balam okwukwuk ifiọọk me lek mgban ya. Balam okpọkpọk isulu inyinya akpan ya.

26 Ogwu osat Okumugwem ya onenije inyi isi, mè isi ikeke me ere oniin̄ ogbabe inwan enenen, kpukpunu ike mêkọtbe iraka me agan̄ ulom mè ìre agan̄ ujit. 27 Mgbọ inyinya akpan ya omun̄be ogwu osat Okumugwem ya, igegele igwook me ijọn̄ melek Balam me inyọn̄ kan̄. Balam onanaan̄ ejit, mè isa mkpat òkup ọmọ me ubọk isulu inyinya akpan ya. 28 Okumugwem onenichili otu inyinya akpan ya, inyi ikọt itumu ikọ. Inyinya akpan ya onenitumu inyi Balam ibe, “Otuuk kè mgbọ ita ire eya owu osulube emi! Tumu-nu, ìre kpasi ijo inu ke emi nrọ owu?”

29 Balam ofọfọọk inyinya akpan ya ibe, “Kpọ-nu ubọk owu orọbe inyi emi ǹkup kubọk ogwu ndide! Mebe nkaan̄ oge akọn̄ me ubọk, kè m̀kpan̄ owu mfiin̄ mgbọ keyi mgbọ keyi.”

30 Inyinya akpan ya ofọfọọk ọmọ ibe, “Ìre ìkare emi nre inyinya akpan kwun̄, eyi òkiben owu karake akat isi ere geelek obosi? Otutuuk mgbọ cha, ìre îkaan̄ mgbọ emi nrakbe irọ owu mbet lek inu òkup ikeyi?”

Balam obebe, “In̄-in̄!”

31 Okumugwem onenichili chieen̄ kè Balam. Balam onenimun̄ ogwu osat Okumugwem okekebe me eden̄ oniin̄, melek oge akọn̄ îwọọkbe ikaan̄ me ubọk. Balam owuwulu isibi me inyọn̄ anam ya, mè ikana isi ichit me ijọn̄.

32 Ogwu osat Okumugwem ya onenitumu inyi Balam ibe, “Keke orọ osulube inyinya akpan kwun̄ otuuk kè mgbọ ita kechi? Emi ǹnu inenigban owu, mije, ukot ije kwun̄ ìkije ikeme emi. 33 Mgbọ ita ke inyinya akpan yi omun̄ emi, mè itọp isi igwu ikom. Mebe ìkatọp isi ìgwu ìkom, sabum mgbọ keyi, kè nra ikpakpan̄ owu iraka, mè itele ọmọ.”

34 Balam onenitumu inyi ogwu osat Okumugwem ibe, “Iin̄, nrọ ilọ! Me atikọ, ǹkariọọn̄ ibe ke îre owu okeke me eden̄ oniin̄ ya ikwek emi. Mgbọ keyi, ire ije n̄a yi ìkatat owu me lek, soso, mâgwu ikom ifo.”

35 Ogwu osat Okumugwem onenitumu inyi Balam ibe, “Gọọk ife chi si ere ya. Gaalek, ikọ mbe owu òtumu, eya ke owu obotumu.” Balam onenigọọk ebi ibot mkpulu kè Balak ije. 36 Mgbọ Balak onọbe ibe ke Balam òkinu me oniin̄, ijeje inin̄ oniin̄ isi ichichini ọmọ me ama ebi Mowabu ge òkup me agba okwaan̄ Anọn, me okike ijọn̄ kan̄.

37 Balak ochichichini Balam me oniin̄, mè inido ọmọ ibe, “Ìre òkabọkọ uyọt uyọt etip nriabe ibe egwen owu enyi emi? Ìre keke orọ mè okanu? Ìre òkachieek me atikọ ibe ke emi mâkọt iwaak owu ubọk ni?”

38 Balam ofọfọọk ibe, “Mgbọ keyi, nra inu ma. Ire, ìre m̀bakpọkpọ itumu inu geelek ònin̄ emi otu ni? In̄-in̄! Îre inu Awaji otapbe emi me otu gaalek ke mbatumu.” 39 Balam onenigọọk Balak ije isi Kiriat Ujot. 40 Balak onenigwu owuwa eriembuuk mè arọọn̄ isa igwa ngwugwa me ere ya, mè iche usini me lek inyi Balam, mè iche si inyi ebi ibot mkpulu ebi melek kan̄. 41 Me ofit iwele kan̄, Balak osasa Balam inene isi Bamot Baali. Balam okukup me ere ya imun̄ okpọkọ me lek ebi Ijeren enyanabe ichit otutuuk ere.