Adasi nriran Balam obenbe
23
Balam onenitumu inyi Balak ibe, “Nama ntook jaaba nyi emi me ere keyi, mè gwu eriembuuk jaaba mè orie arọọn̄ jaaba gbaalek nyi emi.” 2 Balak orọrọ ike Balam otumube. Ema ene iba enenisa anam cha igwa ngwugwa me inyọn̄ ntook ngwugwa cha, eriembuuk ge mè orie arọọn̄ ge me inyọn̄ ntook ge.3 Balam onenitumu inyi Balak ibe, “Keke me ere keyi me agba lek ngwugwa ewọwọp iriọk kwun̄ ban emi, inyi mâda lek ibọkọ, mè isi ikpọ-nu mè ìre Okumugwem môsibi inu inichichini melek n̄a. Ikaan̄ inu geelek îchilibe ijeen̄ emi, mânu inikpa inyi owu.” Inanan̄a ije inene ifo inyọn̄ ibot ogoon̄ ya, ọmọ gaalek. 4 Awaji osisibi ichichini melek kè Balam. Balam otutumu inyi Awaji ibe, “Nra inama ntook jaaba, mè igwu si eriembuuk ge ge mè orie arọọn̄ ge ge me inyọn̄ ntook jaaba cha.”
5 Okumugwem onenitap etip me otu kè Balam ibe, “Gwu kom si lek kè Balak, mè sa etip keyi si look ọmọ.”
6 Balam ogwugwu ikom, mè isi imun̄ Balak okpọkpọ ikeke me agba lek inu ngwugwa ewọwọp iriọk kan̄, ọmọ melek ebi ibot mkpulu Mowabu. 7 Balam oneniben etip nriran kan̄ ilook Balak ibe,
“Balak osa emi me Aram isibi inu,
ogwu ubọọn̄ Mowabu osa emi
me inyọn̄ ogoon̄ agan̄ mbum-ura inu,
mè ibe emi, ‘Na, na fieek otu nyi Jekọp nyi emi,
na, na gbo Ijeren nyi emi.’
8 Ìre m̀bajeje ifieek otu inyi ife cha
ebi Awaji ìkafieek otu ìnyi?
Ìre m̀bajeje igbo ife cha
ebi Okumugwem ikagboge?
9 Ǹkup me inyọn̄ ibot ogoon̄
ewuuk ewuuk imun̄ ema,
ǹkup me ere ubene ubene imọọn̄ ema.
Mmun̄ ife ebi ìluk ọkpọkpọ,
kpefuk lek kiban̄ itap
kubọk ebi ido geege.
10 Ìre ekene obokọt ifuk ebi egep kè Jekọp
ìwa kubọk nkwukwuuk mfuun̄,
ikerere irek ge me lek irek ini
me otu ifuk ebi Ijeren,
ìre ekene obokọt ifuk?
Tele ǹkwu mkpa ebi ata irọrọ,
kè òta mgbọ me ugwem n̄a ikup kubọk eyi kiban̄!”
11 Balak onenibe Balam, “Ìre kpasi inu ke owu orọ emi ikeyi? Ǹsa owu inu ibe owu ònofieek otu ònyi ebi ochicha n̄a. Kpan̄asi ikeya, owu òyaka ìnikigbagbana ema.”
12 Balam ofọfọọk ọmọ ibe, “Ìre ìkare inu Okumugwem otapbe emi me otu ke mbagwuun̄ chieen̄ me lek itumu?”
Òso nriran iba Balam obenbe
13 Balak onenitumu inyi Balam ibe, “Na, inyi eji esi ofifi ere, ere owu môkọtbe ikup imun̄ ife cha, ubọk geelek ikarege ema otutuuk ke obomun̄, owu mômun̄ usini kiban̄. Eji isi ire, kup me ere keya fieek otu nyi ema nyi emi.” 14 Balak onenisa Balam ije inene isi lek oron Jofim me inyọn̄ ibot ogoon̄ Pisiga, mè inama ntook ngwugwa jaaba me ere ya, mè inigwu eriembuuk ge ge mè orie arọọn̄ ge ge me inyọn̄ ntook jaaba cha iso.
15 Balam onenitumu inyi ogwu ubọọn̄ Balak ibe, “Kup me agba lek ngwugwa ewọwọp iriọk kwun̄ ban emi, inyi mâsi ichichini melek Awaji me ere keyilọ.”
16 Okumugwem onenisibi ichichini melek Balam, mè initap ọmọ ikọ me otu ibe, “Gwu kom si lek kè Balak, mè sa etip keyi jet.”
17 Balam ogwugwu ikom isi, mè isi imun̄ Balak okpọkpọ ikeke me agba lek inu ngwugwa ewọwọp iriọk kan̄, ọmọ melek ebi ibot mkpulu Mowabu. Balak ododo Balam ibe, “Ìre keke ke Okumugwem otumu?”
18 Balam oneniben etip nriran kan̄ ilook ibe,
“Balak, nan̄a keke, mè gban̄,
gwun̄ enerieen̄ kè Jipọ, nọ ikọ mbatumu.
19 Awaji ìkare ebilene
kubọk môkọtbe ikan̄ ataak,
ìkarere si gwun̄ ogwu ebilene
kubọk môkọtbe inwene ejit.
Ìre Awaji îkitumu ikọ,
mè itele irọrọ?
Sà ìre îkichieek use,
mè itele irọrọ iso ni?
20 Awaji înyi emi ida ibe emi m̀gbana,
ọmọ îra igbagbana isan̄a,
emi m̀kpakọt ifaan̄.
21 “Awaji ìkamun̄ nlilọ inu geege me emen kè Jekọp,
ìkamumun̄ si ufialek geege me Ijeren.a
Okumugwem Awaji kiban̄ òwa melek kiban̄,
ema ekekibọn̄ okoko
inyi Okumugwem ogwu ubọọn̄ kiban̄.
22 Îre Awaji osan̄a ema isibi me Ijipiti,
mè ikup me etete kiban̄
kubọk iko orie eriembuuk.
23 Kpunu ibọk geege òbokọt ireke me lek kè Jekọp,
kpukpunu si ido-inu geege òbokọt itet ebi Ijeren.
Mgbọ keyi, mêkitumu ikọ ibak Jekọp,
mè itumu si ibak Ijeren ibe,
‘Ìkpọ ubọk ikwaan̄ Awaji!’
24 Kpọ, ife chi mêtọbọ ijibi
kubọk uman egbe àtat,
mè ijibi lek ibene
kubọk orie egbe àtat,
eyi ìkakisiki efuuk,
îtata ìgwagwak anam îchimbe itaka isan̄a,
mè inwọ eje anam îtetbe ire ubọk.”
25 Balak onenitumu inyi Balam ibe, “Ire ikeya ke îkup, kafieek otu ìnyi ema, ire, kagbagbana si ema!”
26 Balam oyayaka inifọọk Balak ibe, “Ìre ǹkatumu ìnyi owu ibe ke inu geelek Okumugwem môtumube, ke îre eya ke mbarọ?”
Òso nriran ita Balam obenbe
27 Balak onenitumu inyi Balam ibe, “Na mè nsa owu ǹsi ofifi ere. Usini mgbọ, môneme Awaji ibe owu òkup me ere ya òfieek otu ònyi ife cha ònyi emi.” 28 Balak onisa Balam inene isi inyọn̄ ibot ogoon̄ Peyọ òkibene isi ikpọ emen èwê.