24
Eyi mgbọ keyi, Balam îmun̄ ibe ke îneme Okumugwem igbagbana ebi Ijeren. Eya orọ, ìkayaka ìje ìsi ìdo ido-inu kubọk îkiwuuk lek îrọ. Kpan̄asi keya, igwugwu isi ikana ikpọ agan̄ èwê. 2 Mgbọ Balam obenebe chieen̄ imun̄ ebi Ijeren egwugwuun̄be uwu ọfọ kiban̄ me otoko me otoko ijot otutuuk ere, Ekwukwu Awaji onunu me lek kan̄. 3 Ibebene ikilook etip nriran kan̄ ibe,“Eyi ìre nriran kè Balam gwun̄ kè Beyọ,
etip ogwu chieen̄ kan̄ okimọọn̄ inu ijaan̄,
4 etip ogwu òkinọ ikọ inan̄a me otu Awaji,
ogwu òkimun̄ ilaak ọkpọchieen̄
ònan̄a me ubọk Awaji Ogwu Òkaan̄ Unye Geelek,
ogwu ògegele igwook,
ire, mè ibum chieen̄.
5 “Ìkpọ-nu ike uwu ọfọ kinyi osabe ijaan̄,
enyi bọn kè Jekọp!
Ìkpọ-nu ike ere nluk kinyi osabe ibele,
enyi bọn kè Ijeren!
6 “Ema enyanyana isi igwook
kubọk owuwa iteke ijọn̄,a
ema ekijaan̄ lek kubọk uko agba okwaan̄,
kubọk uti alò Okumugwem
osabe ubọk kan̄ gaalek iwop,
ema ebet lek uti olik
òtibi me agba ògbugbuk mun̄.
7 Mudim môkinan̄a me emen okwa kiban̄ igbuk isibi,
ukwuuk uti kiban̄ ebekikakaan̄ mudim ogbogbo.
“Ogwu ubọọn̄ kiban̄ mômin igak Agagi,
mkpulu kiban̄ ìbore mkpulu òwewele ebon.
8 “Îre Awaji osan̄a ema isibi me Ijipiti,
mè ikup me etete kiban̄ kubọk iko orie eriembuuk.
Ema ekiloloon̄ ido ebi ochicha kiban̄ imeen̄ isan̄a,
ekiloloon̄ si ukwuuk kiban̄ ibak ikpukpuku,
mè èfaan̄ oraan̄ kiban̄ egwook.
9 Ema mîlilam inyana me ijọn̄,
mè ituun̄ kubọk orie egbe àtat,
mè ituun̄ kubọk uman egbe àtat.
Ìre ekene obonye ejit ije isi iriki ema?
“Kè Awaji igbana ogwu ògbana enyi,
mè ifieek otu inyi ogwu òfieek otu inyi enyi!”
10 Balak onanaan̄ ejit enenen inyi Balam, mè igbaan̄ ubọk iba kan̄ ikwak, mè itumu inyi Balam ibe, “Owu keyi, ke ǹgwen owu ibe owu ònofieek otu ònyi ebi ochicha n̄a. Kpan̄asi obofieek otu inyi ema, òyaka ìnikigbagbana ife cha, otuuk kè mgbọ ita ire eya. 11 Gwagwat lek je nan̄a emi me isi mgbọ keyi, mè je fo ere onan̄abe inu. Nchieek owu use ibe ke mâwaak owu ubọk. Ire, Okumugwem îrọ ibe iwaak-ubọk ya ilọ owu.”
12 Balam ofọfọọk Balak ibe, “Ke mbe ntumu inyi ebi osat oriabe inu me lek n̄a ibe elook owu ibe, 13 ‘Ikerere ibe ke Balak ìtatap alata araran̄ mè alata okuket ijot emen otutuuk uwu kan̄ isa inyi emi, ke m̀kpakọt irọ ofifi inu geege, mè ìre ata inu mè ìre ijo inu, ilọ me lek inu eyi Okumugwem Awaji onyibe ida ibe emi ǹrọ.’ Ntumu si ibe, ikọ Okumugwem môtumube inyi emi, eya gaalek ke mbatumu. 14 Mgbọ keyi, mânigwu ikom ifo igọọk ebi n̄a. Ire, na ǹtaba owu ubọk me utọn̄. Owu mômun̄ inu ife cha eberọ ebi kwun̄ usen inen mè inen òkinu me isi.”
Òso nriran ini Balam obenbe
15 Balam oneniben etip nriran kan̄ ilook ibe,
“Eyi ìre etip kè Balam gwun̄ kè Beyọ,
etip ogwu chieen̄ kan̄ okimọọn̄ inu itibi,
16 etip ogwu òkinọ ikọ inan̄a me otu Awaji,
ogwu òriọọn̄ ifuk-ibot ònan̄a
me ubọk Awaji Ogwu Òbebene Ichit,
ogwu òkimun̄ ilaak ọkpọchieen̄
ònan̄a me ubọk Awaji
Ogwu Òkaan̄ Unye Geelek,
ogwu ògegele igwook,
ire, mè ibum chieen̄.
17 “Mmun̄ ọmọ, ire, ìkare me mgbọ keyi,
mkpọ ọmọ, ire, ìkare me ukot keyi.
Ntoronyan̄ ge mônan̄a isibi me owot kè Jekọp,
okuba ge môsibi ikeke me owot kè Ijeren.
Ọmọ môkpukpuku okwut-isi ebi Mowabu,
mè ijijaka otutuuk bọn kè Set.
18 Ọmọ môtim ikpan̄ ebi Edọm,
mè itim ikpan̄ ebi Seya, ogwu ochicha kan̄.
Ire, Ijeren ìbokpọkpọ ikinye lek me akọn̄.
19 Ogwu ubọọn̄ mônan̄a me owot kè Jekọp isibi,
mè inijijaka ebi geelek ìsisik
me emen ama Edọm isan̄a kpai.”
Òta nriran Balam obenbe
20 Balam onenimun̄ ebi Amalek, mè iniben nriran kan̄ ibe,
“Amalek ore adasi me etete otutuuk ido,
ire, me òta mgbọ kan̄, mêjijaka ọmọ isan̄a kpai.”
21 Balam onenimun̄ ebi Keyin, mè iben nriran kan̄ ibe,
“Ere nluk kwun̄ îkaan̄ okwukwek,
uwu kwun̄ ìkup me agbagba ewuuk.
22 Ire, mêjijaka enyi ebi Keyin,
me mgbọ ebi Asiria mênube
initet enyi agam agam isa ifo.”
23 Balam obeben si nriran kan̄ ibe,
“Jei, ìre ekene obokọt iluk ugwem,
ilọ ogwu Awaji osun̄be?b
24 Owuwa uji ile mônan̄a me atasuk Kitim inu,
ema mêtim ikpan̄ ebi Asiria,
mè itim ikpan̄ ebi Eberi.
Ire, mêjijaka ema si igwook.”
25 Me òta kan̄, Balam onanan̄a ikeke, mè igwu ikom ije ifo ama kan̄. Balak si ojeje ifo agan̄ eyi kan̄.