Ebi Mowabu mîleke ebi Ijeren itap me ijo inu
25
Mgbọ ebi Ijeren ekupbe me Sitim ikitap efuuk, ebirieen̄ ebi Ijeren enenibene ikiluk ugwem barabat melek ebibaan̄ ebi Mowabu. 2 Ebibaan̄ ebi Mowabu cha ekekigwen ebirieen̄ ebi Ijeren isa isi ere ema ekigwa ngwugwa inyi ebi kè awaji kiban̄. Ebirieen̄ ebi Ijeren ekekigọọk irie inorie ngwugwa cha, mè ikigọọk itọbọ ebum inyi awaji ebi Mowabu cha. 3 Sa me ikeyi, ebi Ijeren ekakana ebi ìkitọbọ ebum inyi Baali ebi Peyọ. Okumugwem onanaan̄ ejit ikeme ema enenen.4 Okumugwem onenitumu inyi Mosis ibe, “Tet otutuuk ebi ibot ife chi sibi me ejit ikarek me isi Okumugwem, mè jeen̄ ema otutuuk kpan̄ me otu ọfọkọ me isi otutuuk ebi ene. Osirọ ikeya, mgbọ ya ke uyok uyok unaan̄-ejit Okumugwem môniwọ me lek ebi Ijeren.”
5 Mosis onenitumu inyi ebi ibot oyerebet me Ijeren ibe, “Ene geelek me etete kinyi ikpan̄ ogwu otoko kiban̄ geelek ògọgọọk itọbọ ebum inyi Baali ebi Peyọ.”
6 Mgbọ otutuuk ebi Ijeren etitiin̄be me isotu uwu Atanga Chinichini ikup ikito ito, ogwu enerieen̄ Ijeren ge onenisa ogwu enenwaan̄ Midian ge ije iraka, me chieen̄ kè Mosis mè chieen̄ otutuuk ebi ido Ijeren, ikifo ere ebi ototun̄ ukan̄ kiban̄ elukbe. 7 Mgbọ Fineyas gwun̄ kè Elieja gwun̄ kè Erọn ogwu ngwugwa omun̄be inu ya, inanan̄a me etete ebi ene cha isibi, mè imọnọ otunwa ikaan̄ me ubọk, 8 mè ije igọọk ogwu Ijeren ya me udun̄ isi ire emen uwu ọfọ kan̄. Me emen uwu ya, isasa otunwa ya ichim itibi ema ene iba cha. Otunwa ya ogwọgwọt itibi ogwu enerieen̄ Ijeren ya, mè itibi iraka emen owot ogwu enenwaan̄ ya isibi me udun̄. Mgbọ yaage, ijo orukan̄ ònunu me etete ebi Ijeren ya ofefieek. 9 Ire, sabum mgbọ ya, ijo orukan̄ ya îra iwuuk lek ikpakpan̄ akọp obop ene iba mè obop ini.
10 Okumugwem onenitumu inyi Mosis ibe, 11 “Fineyas gwun̄ kè Elieja gwun̄ kè Erọn ogwu ngwugwa îrọ inyi uyok uyok unaan̄-ejit n̄a me lek ebi Ijeren ifieek. Mije, ọmọ îjeen̄ ojelek uga ulọk emi nkaan̄be isusun̄ umin n̄a me etete ebi Ijeren. Sa me ikeya, Fineyas îrọ inyi nkasa me ejit mba ìjijaka ebi Ijeren ìsan̄a kpai. 12 Eya orọ, tumu nyi ọmọ ibe ke emi mârọ inyan̄a-ibot n̄a eyi esuuk melek kan̄. 13 Emi nra inyan̄a ibot ibe ke ọmọ melek bọn owot iman kan̄ ebere ebi ngwugwa ire mgbọ geelek, mije ọmọ ojeen̄be uga ulọk inyi umin Awaji kan̄, mè irọ esuuk me ibot ebi Ijeren.”
14 Erieen̄ ogwu enerieen̄ Ijeren ya ogwu ekpan̄be melek ogwu enenwaan̄ Midian ya ìre Jimiri. Ọmọ ìre gwun̄ kè Salu, mè ire si ogwu ibot ototun̄ ukan̄ ge me otoko kè Simiọn. 15 Erieen̄ ogwu enenwaan̄ Midian ya ogwu ekpan̄be ìre Kojibi. Ọmọ ìre gwun̄ kè Juru, ogwu òre ogwu ubọọn̄ otoko ge me ido Midian.
16 Okumugwem onenitumu inyi Mosis ibe, 17 “Ìmọnọ ebi Midian kubọk ebi ochicha kinyi, mè ìkpakpan̄ ema ìsan̄a, 18 mije ema erọbe inu melek kinyi kubọk ebi ochicha, mè ileke enyi itap me itọtọbọ ebum inyi Baali ebi Peyọ, melek inu ngwan̄ kiban̄ orọbe, òre Kojibi, gwun̄ ene ge me lek ebi ibot me Midian, ogwu ekpan̄be mgbọ ijo orukan̄ onin̄be Ijeren mije ema ekitọbọ ebum inyi Baali Peyọ.”