3 “Ire obaak enenwaan̄ òluk me uwu ogwu ute me mgbọ nsabọn ibaan̄ kan̄ ichieek Okumugwem use, mè ìre ìnyanyan̄a ibot isa ibọp lek kan̄ me mgbọ îkiluk me uwu ogwu ute, 4 ogwu ute onọnọ use ya mè ìre inyan̄a-ibot eyi ogwu gwun̄ onyan̄abe isa ibọp lek kan̄, ire, ìkasan̄a amọn, otutuuk use cha gwun̄ enenwaan̄ ya ochieekbe, mè otutuuk inyan̄a-ibot ya înyan̄abe isa ibọp lek kan̄ ìbokekeke. 5 Ire, ire ogwu ute igban ọmọ mgbọ înọbe ikọ ya, otutuuk use cha gwun̄ enenwaan̄ ya ochieekbe mè inyan̄a-ibot cha înyan̄abe isa ibọp lek kan̄, kpunu geege òbokekeke. Okumugwem môtele inyi ọmọ, mije ogwu ute ogbanbe ọmọ.

6 “Ire obaak enenwaan̄ ichieek use, mè inyan̄a ibot isa ibọp lek kan̄ sabum olom onido ọmọ, 7 ogwu olom onọnọ inu ofolek use ya, mè inyan̄a-ibot ya, ire, ìkasan̄a amọn geege me usen înọbe, use ya mè inyan̄a-ibot ya înyan̄abe isa ibọp lek kan̄ ìbokekeke. 8 Ire, ire ogwu olom inọ ikọ ya, mè igban ọmọ me usen înọbe ikọ ya, use ya mè inyan̄a-ibot ya înyan̄abe isa ibọp lek kan̄, îgwak. Ìkpoyaka ikeke. Okumugwem môtele inyi ọmọ.

9 “Ogwu nwakpa geelek mè enenwaan̄ geelek ogwu olom ojitbe, use geelek mè inyan̄a-ibot geelek ema enyan̄abe isa ibọp lek kiban̄, ìbokekeke.

10 “Ire enenwaan̄ òbat olom ikup me uwu ogwu olom mè ichieek use itoon̄ me ibot kan̄, mè ìyaka ire ìnyanyan̄a ibot isa ibọp lek kan̄, 11 ogwu olom onọnọ inu ofolek, mè iriaan̄ otu, ìkagban ogwu nwa, otutuuk use cha mè inyan̄a-ibot cha înyan̄abe isa ibọp lek kan̄ ìbokekeke. 12 Ire, ire ogwu olom igwak use cha mè inyan̄a-ibot cha me usen înọbe inu ofolek, otutuuk ikọ geelek ònan̄a me otu ogwu enenwaan̄ ya isibi me emen use cha mè inyan̄a-ibot cha îsabe ibọp lek kan̄, kpunu geege òboyaka ikeke, mije ogwu olom ogwakbe ema isan̄a. Okumugwem mônenitele inyi ọmọ. 13 Otutuuk use geelek mè ìre inyan̄a-ibot geelek ogwu enenwaan̄ ya onyan̄abe isa ibọp lek kan̄, ogwu olom môkọt irọ inyi ikeke, môkọt igwak si. 14 Ire, ire ogwu olom inọ, mè iriaan̄ otu, ìkasan̄a amọn geege nan̄a me usen re usen, eya ìsibi ibe ke îrọ otutuuk use cha mè otutuuk inyan̄a-ibot cha ogwu nwa osabe ibọp lek kan̄ inye. Mije, mgbọ înọbe, ìkatumu inu geege ofolek ìnyi ogwu nwa. 15 Ire, ire ogwu olom inọ, mè ikup sọnja mgbọ iraka me lek sabum înigwak, ufialek geelek òje me lek use cha mè inyan̄a-ibot cha ìtoon̄ ogwu olom me ibot.” 16 Echichi ore ikan echi Okumugwem onyibe Mosis, echi òbokikpulu me etete olom mè nwa, mè ogwu enerieen̄ mè ogwu gwun̄ enenwaan̄ ogwu ìkakaan̄ olom, mè ikiluk si me uwu ogwu ute.