3 Mosis onenitumu inyi ebi Ijeren ibe, “Ìgobo ebi ene me etete kinyi, mè esi akọn̄ me lek ebi Midian, inyi Okumugwem isa me ikeya irọ ema useen̄ inu ema erọbe ebi Ijeren. 4 Ìgobo obop ene ge ge me otutuuk otoko ebi Ijeren geelek, mè ìria ìsibi, inyi esi etim akọn̄ ya.” 5 Enenititiin̄ akọp mè obop ebi akọn̄ iba me etete otutuuk otoko ebi Ijeren, otoko ge, obop ge, ebi ìbebem lek akọn̄ isan̄a. 6 Mosis oneniria ebi akọn̄ cha, obop ene ge ge me otoko geelek, isi isi akọn̄, mè iria si Fineyas gwun̄ kè Elieja ogwu ngwugwa igbaalek kiban̄. Fineyas osasa usini nroon̄ ikwaan̄ òkup mbuban melek otita eyi ebekiwut isa ikinyi ida ikaan̄ me ubọk ije.

7 Ebi akọn̄ Ijeren etitim akọn̄ me lek ebi Midian, ike Okumugwem onyibe Mosis ida, mè ikpan̄ otutuuk ebirieen̄ ebi Midian isan̄a kpai. 8 Ebi Ijeren mîkpan̄ si ebi ubọọn̄ Midian go, Efi mè Rekem mè Juru mè Uru mè Reba, me akọn̄ ya, mè ikpan̄ si Balam gwun̄ kè Beyọ igbaalek. 9 Ebi Ijeren etetet ebibaan̄ Midian mè asa nsabọn kiban̄ me akọn̄ isa ika. Mîfum si otutuuk urum arọọn̄ mè ebot kiban̄, mè otutuuk urum eriembuuk kiban̄, mè ifum si otutuuk inu ubọọn̄ kiban̄ me akọn̄ isa igbaalek ika. 10 Otutuuk ama ile ebi Midian cha mè asabọn ama kiban̄, ebi Ijeren etatap ukan̄ iwọp otutuuk isan̄a kpai. 11 Ebi akọn̄ Ijeren esasa otutuuk inu cha ema echichimbe mè echi efumbe, melek ogbogbo anam mè ebilene cha ema ekpulube, ika, 12 mè isa ijet Mosis mè Elieja ogwu ngwugwa mè otutuuk ebi Ijeren me ere ema egwugwuun̄be uwu ọfọ kiban̄ me òla ijọn̄ ido Mowabu, me usaba agan̄ okwaan̄ Jodan, me ere òkibene isi ikpọ Jeriko.

13 Mosis mè Elieja ogwu ngwugwa mè otutuuk ebi ibot ido Ijeren enanan̄a me ere ema elukbe ije isibi isi ikweek ema me oniin̄. 14 Mosis onanaan̄ ejit enenen inyi ebi ibot akọn̄ cha, ìrere ebi ibot urum echi obop obop ene, mè ebi ibot urum echi efit efit ene, mgbọ ife cha enan̄abe me isi akọn̄ ya ika.

15 Ikekido ema ibe, “Ìre otutuuk ebibaan̄ ke enyi etele ibe ekup me ugwem? 16 Ìre enyi kpefat iriọọn̄ ibe ke ebibaan̄ chi ere ebi ìgbagban̄ nteme kè Balam, mè ileke ebi Ijeren, inyi eje elọ Okumugwem me Peyọ, eyi ijo orukan̄ obumbe inin̄ me etete ebi eyi Okumugwem? 17 Eya orọ, mgbọ keyi, ìkpan̄ otutuuk asa nsabọn ebirieen̄ kiban̄, mè ìkpan̄ si otutuuk ebibaan̄ ebi ìrọriọọn̄ lek ebirieen̄ ìsan̄a kpai. 18 Ire, ìtele otutuuk obaak ebibaan̄ ebi kperiọọn̄ lek ebirieen̄ me ugwem ìnyi lek kinyi.

19 “Otutuuk kinyi ebi ubọk kiban̄ ofiin̄be eje ene, mè otutuuk ebi geelek ìchachak ubọk me lek nkwukwu ebi ekpan̄be me akọn̄, enyi otutuuk ìkup me udun̄ ama, ikanin̄ etete ebi ene mege usen jaaba. Me òso usen ita, mè òso usen jaaba, enyi mêgwọk lek kinyi, mè igwọk si lek otutuuk ebi enyi etetbe me akọn̄ isa ika. 20 Ìgwọk si lek ofọnti geelek, mè otutuuk inu geelek esabe ikpa anam irọ, mè echi esabe inwọọn̄ ebot irọ, mè echi esabe uti ikike irọ.”

21 Elieja ogwu ngwugwa onenitumu inyi ebi akọn̄ cha, ebi ìsisi akọn̄ mè ika, ibe, “Eyi ore Ikan Okumugwem onyibe Mosis: 22 Ebi kè alata araran̄, mè alata okuket, mè ekwe, mè okwukwut, mè alala, mè oporolo, 23 mè otutuuk inu geelek ukan̄ ìkpobokọt isak unan me lek, esa ukan̄ egwọk lek, inyi mbuban ita ema me lek. Ire, ikalọ isasa si mun̄ igwọk-lek igwọk lek otutuuk kiban̄. Otutuuk inu geelek echi kpokọtbe ikeke ida ukan̄, esa mun̄ ya gaalek egwọk lek kiban̄. 24 Me òso usen jaaba, ìgwọk ofọnti kinyi, inyi mbuban ita enyi me lek. Enyi isigwọk lek ikeya isan̄a, enyi mênenikọt ije inin̄ emen ere m̀gba-ǹgwele ukan̄ me etete ebi ene.”

25 Okumugwem onenitumu inyi Mosis ibe, 26 “Owu melek Elieja ogwu ngwugwa mè otutuuk ebi ibot otoko geelek, ìfuk otu ifuk otutuuk ebi ekpulube me akọn̄ isa ika, mè ìfuk si anam cha efumbe ìgbaalek. 27 Ìfele inu cha efumbe me isi akọn̄ isa ika irek iba. Ìsa irek ge ìche ìnyi otutuuk ebi akọn̄ ìsisi akọn̄ ya, mè ìsa irek ge keyilọ ìche ìnyi otutuuk ebi ido. 28 Ìche uche òsibi esese ìnyi Okumugwem me lek inu efumbe me akọn̄ ya. Ubọk ebenyi uche ya ìre ikeyi: Me ubọk ebi akọn̄ ìsisibi isi akọn̄ ya, ìbọkọ irek ge me efit irek go me lek inu ema ekpulube me akọn̄ isa ika, mè ìre ebilene mè ìre eriembuuk, mè ìre inyinya akpan, mè ìre arọọn̄ mè ebot, 29 mè ìsa ìkana ìnyi Elieja ogwu ngwugwa, kubọk uche òsibi esese eyi òre lek Okumugwem. 30 Me lek ìkike iba uche òrere lek ebi Ijeren kechilọ, ìmọnọ irek ge me etete akọp irek go, me etete ebilene, mè ìre eriembuuk, mè ìre inyinya akpan, mè ìre arọọn̄ mè ebot, mè otutuuk chieen̄ anam geelek, mè ìsa ìkana ìnyi ebi otoko kè Libai ebi ìkikpọ chieen̄ me lek Akpatan̄ Mbuban Okumugwem.” 31 Mosis mè Elieja ogwu ngwugwa erọrọ ike Okumugwem onyibe Mosis ida.

32 Inu òsisik me lek otutuuk inu ebi akọn̄ cha esabe me isi akọn̄ ika ìre efit obop arọọn̄ mè ebot gweregwen mè akọp obop jaaba mè obop go, 33 mè akọp obop eriembuuk jaaba mè obop iba, 34 mè akọp obop inyinya akpan gweregwen mè obop ge, 35 mè akọp obop ebibaan̄ ita mè obop iba, ebi kperiọọn̄ ebirieen̄.

36 Ìkike iba uche òre lek ebi ìsisi akọn̄ ya ìre:

41 Mosis onenikana otutuuk uche òsibi esese chi, echi echebe inyi Okumugwem, itap me ubọk kè Elieja ogwu ngwugwa, kubọk Okumugwem onyibe ọmọ ida.

42 Ìkike iba uche keyilọ òkup inyi ebi ido Ijeren, eyi Mosis ofelebe me lek eyi ebi akọn̄ ìkup ikeyi: 43 Ìkike iba uche eyi òkup inyi ebi ido Ijeren ebi kpegọọk isi akọn̄ ya ìre efit obop arọọn̄ mè ebot ita mè akọp obop ita mè obop jaaba, mè efit go, 44 mè akọp obop eriembuuk ita mè obop gweregwen, 45 mè akọp obop inyinya akpan ita, mè efit go, 46 mè akọp mè obop ebilene gweregwen. 47 Me lek ìkike iba uche òre lek ebi Ijeren ebi kpegọọk isi akọn̄ cha, Mosis onenisan̄a ge me etete akọp go me lek ebilene mè ebi kè anam, mè inisa ema ikana itap me ubọk ebi otoko kè Libai ebi ìkikpọ chieen̄ me lek Akpatan̄ Mbuban Okumugwem.

48 Ebi ibot akọn̄ ebi etobe ibe ekekpọ chieen̄ me lek ebi akọn̄ ìtitim akọn̄ ya, ìrere ebi ibot urum echi obop obop ene, mè ebi ibot urum echi efit efit ene, enenije inu me lek kè Mosis, 49 mè initumu inyi ibe, “Eji ebi ikwaan̄ kwun̄ mîfuk otu ifuk otutuuk ebi akọn̄ ìkup eji me irak, mè imun̄ ibe ke otutuuk ene mîso ifuk, kpunu kubọk ene ge ikeyi akọn̄ oriebe. 50 Eya orọ eji ekisa inyinyi kiji inu me isi Okumugwem, òrere inu mbala-lek echi alata araran̄ echi ene geelek me etete kiji okpulube, kubọk alata owut-ubọk, mè alata ebek ubọk, mè asi ebek, mè mkpọtubọk, mè mkputọn̄, ibe esa erọ esuuk me ibot kiji me isi Okumugwem.”

51 Mosis melek Elieja ogwu ngwugwa ebọbọkọ inyinyi alata araran̄ cha me ubọk kiban̄. Otutuuk inu cha ìre inu ebi usọ ikwaan̄ erombe. 52 Ulobo otutuuk inyinyi alata araran̄ ebi ibot akọn̄ cha, ìrere ebi ibot urum echi obop obop ene, mè ebi ibot urum echi efit efit ene, esabe inu iniche inyi Okumugwem ìre akọp mè obop sekeli gweregwen mè efit jaaba mè akọp go.^a 53 Ire, ebi akọn̄ ebi kpere ebi ibot esusun̄ inu geelek ema efumbe me isi akọn̄ inyi lek kiban̄, kpesa igọọk iniche inyi Okumugwem. 54 Mosis melek Elieja ogwu ngwugwa ebọbọkọ inyinyi alata araran̄ cha ebi ibot akọn̄, ìrere ebi ibot urum echi obop obop ene, mè ebi ibot urum echi efit efit ene, esabe inu, mè ikpulu isa inisun̄ me Atanga Chinichini kubọk inu ǹkeek eyi ebi Ijeren me isi Okumugwem.