Ama ile edọmọbe inyi ebi otoko kè Libai
35
Mgbọ ebi Ijeren ekupbe me òla ijọn̄ ido Mowabu, me usaba agan̄ okwaan̄ Jodan, me ere òkibene isi ikpọ Jeriko, Okumugwem onenitumu inyi Mosis ibe, 2 “Nyi ebi Ijeren ida ibe egobo usini ama ile me lek ìrot kiban̄ esa enyi ebi otoko kè Libai eluk me emen, mè enyi si ijọn̄ òkup ikana ama ile cha, inyi ema ekesa ekpukpo anam kiban̄. 3 Ama ile cha ke ebi otoko kè Libai ebekiluk me emen, sà ijọn̄ òkukup ikana ama ile cha ke ema ebekisa ikpukpo eriembuuk kiban̄ mè arọọn̄ mè ebot kiban̄ mè ofifi chieen̄ anam kiban̄ geelek.4 “Ijọn̄ ikpukpo anam òkup ikana ama cha enyibe ebi otoko kè Libai ìbobene me lek mgban ama cha geelek ijọn̄ọ iso efit ejit iba mè akọp ejit go, mè isa ikeya ikat ikana ama ya okokop. 5 Me ntut agan̄ oyet ama ile cha geelek, ebetọ ijọn̄ ya efit ejit jaaba mè akọp ejit go me mbum-ura ama ya, mè itọ si efit ejit jaaba mè akọp ejit go me agan̄ osiki, mè itọ si efit ejit jaaba mè akọp ejit go me agan̄ ichep-ura, mè itọ si efit ejit jaaba mè akọp ejit go me agan̄ inyọn̄. Ama ya geelek mônenikeke me eden̄ eden̄. Ikeyi ke ebetọ ijọn̄ ikpukpo anam inyi ebi otoko kè Libai ikat ikana otutuuk ama ile kiban̄ geelek.
Ama itap-ibot
6 “Me lek otutuuk otu ifuk ama ile egobobe isibi inyi ebi otoko kè Libai, gweregwen obore ama itap-ibot, ere ene geelek òlọlọ ubọk ikpan̄ ene môkọtbe ilibi isi inin̄ itap ibot, mè inwọnọ mkpa. Isan̄a me lek kechi, mênyi si ebi otoko kè Libai ofifi akọp ama ile ini mè iba igbaalek. 7 Otutuuk ama ile ebegobo isibi isa inyi ebi otoko kè Libai ìbosibi akọp ini mè jeeta, kpa ama ile mè ijọn̄ ikpukpo anam kan̄. 8 Ama ile chi geelek mêgobobe me lek ìrot ebi Ijeren isa inyi ebi otoko kè Libai, ebebọkọ igọọk me ike ebi otoko cha ewabe ire. Mêbọkọ owuwa ama me ubọk ebi otoko òmimiin̄, mè ibọkọ ama inen mè inen gaalek me ubọk ebi otoko òsisip.”
9 Okumugwem onenitumu inyi Mosis ibe 10 itumu inyi ebi Ijeren ibe, “Enyi isisaba okwaan̄ Jodan itoon̄ me ijọn̄ ido Kenan, 11 ìgobo usini ama ile ìsibi, inyi inire ama itap-ibot inyi enyi, ere ebi ene ebi ìlọlọ ubọk ikpan̄ ene mêkọtbe ilibi inin̄ itap ibot, mè inwọnọ mkpa. 12 Ama chi môre ere ebi ene ebekilibi inin̄ itap ibot ilet lek, mè inwọnọ mkpa me ubọk ebikaan̄ ene ebi ìkirọ useen̄, inyi ogwu òkpan̄ ene ya ikakwu mkpa me mgbọ kpenọ-nu otu kan̄ me isi otutuuk ebi ido. 13 Ama ile gweregwen kechi enyi mêgobobe môre ama itap-ibot inyi enyi. 14 Me lek ama itap-ibot gweregwen chi, ita môkup me usaba agan̄ okwaan̄ Jodan, sà ita kechilọ obokup me ijọn̄ ido Kenan. 15 Ama ile gweregwen chi môre ama itap-ibot isa inyi ebi Ijeren mè ebi ichen mè ebi geelek ìluk me etete kinyi, inyi ene geelek òlọlọ ubọk ikpan̄ ene môkọt ilibi isi inin̄.
16 “Ikaan̄ ogwu isa okwukwut ibọn̄ ofifi ene, mè ire ene ya ikwu, ogwu òbọbọn̄ ene ikpan̄ îkana ogwu òkpan̄-ene. Ebekpakpan̄ ogwu òkpan̄-ene ya, kpebetele me ugwem. 17 Ire ene ikaan̄ okpọkọ ewuuk me ubọk, eyi môkọtbe ikpan̄ ene, mè isa itọbọ ene ikpan̄, ogwu òtọbọ ene ya îkana ogwu òkpan̄-ene. Ebekpakpan̄ ogwu òkpan̄-ene ya, kpebetele me ugwem. 18 Ire ene ikaan̄ m̀gbele me ubọk, eyi môkọtbe ikpan̄ ene, mè isa ibọn̄ ene ikpan̄, ogwu òbọbọn̄ ene ikpan̄ ya îkana ogwu òkpan̄-ene. Ebekpakpan̄ ogwu òkpan̄-ene ya, kpebetele me ugwem. 19 Ogwu òkisan̄a useen̄ eje ene isi ichichini ogwu òkpan̄-ene ya, ìbokpakpan̄, ìkpobotele me ugwem. 20 Ikaan̄ ogwu igen ibak isa me ejit ikpak ibieen̄ ene itọbọ ikpan̄, mè ìre ìsasa inu unan itọbọ ene ikpan̄, 21 mè ìyaka ire ìsasa akpọ igon ene ikpan̄ me ochicha ejit, ogwu òrọrọ inu ya îkana ogwu òkpan̄-ene. Ebekpakpan̄ ogwu òkpan̄-ene ya, kpebetele me ugwem. Ogwu òkisan̄a useen̄ eje ene isi ichichini ogwu òkpan̄-ene ya, ìbokpakpan̄, ìkpobotele me ugwem.
22 “Ire, ire ene ida ofifi ene itọbọ ikpan̄ me mfat, ìkasa me ochicha ejit ìrọ, mè ìre ìsasa inu unan itọbọ ene ikpan̄ me mfat, 23 mè ìyaka ire ewuuk ogak ene ya irọn̄ itọbọ ene ikpan̄ me ikamun̄ge, ene ya ìkagegen ibak, ìkasasa si me ejit ochicha, 24 ebi ama mêtitiin̄ ikup isibi oyerebet inyi ogwu òrọrọ inu ya melek ogwu òkisan̄a useen̄ eje ene ya, igọọk me ike ikan orọmijọn̄ keyi odobe. 25 Ebi ido mêchit ogwu òlọlọ ubọk ikpan̄ ene ya, kpebejit ene ya itele me ubọk ogwu òkisan̄a useen̄ eje ene ya. Mêria ene ya ifo ama itap-ibot ya îlibibe inin̄, inyi ikup ibia me ama ya mege ire mgbọ ogwu òban Awaji ogwu etọkọbe aran̄ mbuban me ibot, ogwu òkup me ukot mgbọ ya, môkwube.
26 “Ire, ire ogwu òlọlọ ubọk ikpan̄ ene ya inan̄a me ama itap-ibot ere îkupbe ya isibi, 27 mè ogwu òkisan̄a useen̄ eje ene ya inichichini ọmọ me oyet, me ere òjọjọn̄ọ ere me lek oke ijọn̄ ama itap-ibot ya, ogwu òkisan̄a useen̄ eje ene ya môkọt ikpan̄ ogwu òlọlọ ubọk ikpan̄ ene ya, oyerebet ikpan̄-ene ìkpoyaka itip ọmọ. 28 Mije, ogwu òlọlọ ubọk ikpan̄ ene ya ìbokup me ama itap-ibot ya mege ire mgbọ ogwu òban Awaji me ukot mgbọ ya môkwube. Ogwu òban Awaji ya isikwu iraka, ogwu òlọlọ ubọk ikpan̄ ene ya mônenikọt inan̄a isibi ifo inyọn̄ ijọn̄ ìrot kiban̄.
29 “Enyi ebekitetet ikan kechi me ere geelek enyi ebeluk, isi ire ukot geelek.
30 “Ikaan̄ ogwu ikpan̄ ene, ebesa me otu ikọ owuwa ebi ata-ikọ ifieek oyerebet mkpa inyi ene ya. Ikọ otu ogwu ata-ikọ ge gaalek ìkaso isasa itip ene oyerebet mkpa.
31 “Kpebebọkọ inu inwene-ibot geege me useen̄ ogwu òkpan̄-ene, ogwu ògbe mkpa. Mije, ogwu òkpan̄-ene ìkaan̄ ikwukwu mkpa ibot kan̄.
32 “Kpebebọkọ inu geege me useen̄, mè itele ibe ogwu geelek òlilibi isi inin̄ ama itap-ibot ifo inyọn̄ ijọn̄ kan̄ isi iluk me mgbọ ogwu òban Awaji me ukot mgbọ ya okupbe me ugwem.
33 “Ikafifila inyọn̄ ijọn̄ ere enyi ekiluk, mije, îre eje ene okififila ijọn̄. Kpunu ubọk ebesa ikọt isuuk ijọn̄ eje ene ofifilabe, îtata eje ogwu òfafiat eje ene ya gaalek ke ebesa ikọt isuuk ijọn̄ ya. 34 Ikachaka mbuban me inyọn̄ ijọn̄ enyi ekiluk, ere emi si nkiluk, mije, emi Okumugwem, ǹkiluk me etete ebi Ijeren.”