Okike ijọn̄ Kenan
34
Okumugwem onenitumu inyi Mosis ibe 2 inyi ebi Ijeren ida ibe, “Enyi isinin̄ Kenan, òre ijọn̄ òbokana eyi kinyi me ìrot, okike ijọn̄ ya ìbore ikeyi:3 “Okike ijọn̄ kinyi agan̄ osiki ìbobene me èwê Jin, mè ilibi itet me otubọk ijọn̄ ebi Edọm. Me agan̄ mbum-ura, okike agan̄ osiki kinyi môbene me òta okwaan̄ Uchi, 4 mè inisi ikat ikana ije iraka me agan̄ osiki utibi ogoon̄ Akarabim,a mè iraka isi ire èwê Sin, mè isi iyaka me agan̄ osiki ama Kades Bania, mè iraka isi ire Asari Adari, mè isaba isi itet Asimon. 5 Okike ijọn̄ ya si môraka me isi ama Asimon, mè isi ire oka okolo Ijipiti, mè isi ita me lek okwaan̄ ile Mediterenia.
6 “Okike ijọn̄ kinyi me agan̄ ichep-ura ìbore okwaan̄ ile Mediterenia. Ere keya ke okike ijọn̄ kinyi obota me agan̄ ichep-ura.
7 “Okike ijọn̄ kinyi me agan̄ inyọn̄ ìbobene me lek okwaan̄ ile Mediterenia, mè ije isi ire lek ogoon̄ Ôru me agan̄ mbum-ura, 8 mè inan̄a me lek ogoon̄ Ôru isi ire Lebo Amat, mè iraka isi ire Sedadi, 9 mè iraka isi ire Sifirọn, mè isi iyaka me Asari Enan. Eyi ore okike ijọn̄ kinyi me agan̄ inyọn̄.
10 “Okike ijọn̄ kinyi me agan̄ mbum-ura ìbene me otubọk Asari Enan ya, mè ije ikeya isi ire Sefam, 11 mè inan̄a me Sefam isi ire Ribila me agan̄ mbum-ura Ayin, mè iraka me agba ogoon̄ ònyana me agan̄ mbum-ura okwaan̄ oyô Kineret.b 12 Okike ijọn̄ ya mônenije ikwala isiki igọọk me lek agba okwaan̄ Jodan isibi, mege, mè isi ita me lek okwaan̄ Uchi.
“Eyi ore ijọn̄ kinyi. Ikeya ke okike ijọn̄ ya obokup ikat ikana.”
13 Mosis oneninyi ebi Ijeren ida ibe, “Eyiyi ore ijọn̄ ya eyi enyi ebebọkọ me ìrot. Enyi eberoon̄ nriroon̄ isa idọmọ ijọn̄ ya inyi lek kinyi, enyi ebi otoko onaan̄ge mè okpọkọ, ike Okumugwem onyibe ida ibe erọ. 14 Mije, ebi otoko kè Ruben mè ebi otoko kè Gadi mè okpọkọ me lek ebi otoko kè Manasi mîra iwuuk lek ibọkọ ìrot echi kiban̄. 15 Otoko iba mè okpọkọ kechi ebọkọ ìrot kiban̄ me usaba agan̄ okwaan̄ Jodan agan̄ mbum-ura, me ike ere òkibene isi ikpọ Jeriko.”
16 Okumugwem onenitumu inyi Mosis ibe, 17 “Erieen̄ ebi ìbedọmọ ijọn̄ ya inyi enyi ìre Elieja ogwu ngwugwa mè Josuwa gwun̄ kè Nun. 18 Owu môgobo ogwu ibot ge ge me otoko geelek, inyi enegọọk etap ubọk edọmọ ijọn̄ cha. 19 Erieen̄ ebi ibot cha ire echi:
Me otoko kè Juda, ogwu ibot ìre Kelep gwun̄ kè Jefune,
20 me otoko kè Simiọn, ogwu ibot ìre Semuwen gwun̄ kè Amiyudu,
21 me otoko kè Benjamin, ogwu ibot ìre Elidadi gwun̄ kè Kisilọn,
22 me otoko kè Dan, ogwu ibot ìre Buki gwun̄ kè Jogili.
23 Me etete bọn kè Josefu, me otoko kè Manasi, ogwu ibot ìre Anien gwun̄ kè Efọdu,
24 me otoko kè Iferem, ogwu ibot ìre Kemuwen gwun̄ kè Sifitan,
25 me otoko kè Jebulọn, ogwu ibot ìre Elisafan gwun̄ kè Parinak,
26 me otoko kè Isaka, ogwu ibot ìre Palitien gwun̄ kè Ajan,
27 me otoko kè Ase, ogwu ibot ìre Ayiyudu gwun̄ kè Selomi,
28 me otoko kè Nafitali, ogwu ibot ìre Pedayen gwun̄ kè Amiyudu.”
29 Ebibi ere ebi Okumugwem ogobobe ibe edọmọ ijọn̄ ido Kenan enyi ebi Ijeren me ìrot.