32
“Jei, akpabin inyọn̄, gban̄ utọn̄,mè ǹtumu ikọ;
jei, ijọn̄, nọ ikọ otu n̄a.
2 Tele mè ijejeen̄ n̄a irep kubọk ibot,
mè ikọ n̄a ikisene kubọk mbat,
kubọk senesene ibot òkigwook me lek nsek otu mbubet;
kubọk uga ibot òkigwook me utọn̄ inwan̄ oron.
3 Mije, erieen̄ Okumugwem ke mbatumu isibi.
Jei, ìsa ikpele umin ìnyi Awaji kiji!
4 Ọmọ ore ewuuk ya, ubọk ikwaan̄ kan̄ ìsoso ikup,
otutuuk oniin̄ kan̄ ìre oniin̄ ata irọrọ.
Ọmọ ìre Awaji ògbe utoon̄-ejit, ogwu ìkakirọ nlilọ inu;
ogwu unen mè ogwu òtatat ke ọmọ ore.
5 “Ire, ife chi mîfifila me isi kan̄;
ema kpeyaka ire ebi kan̄,
mije bukubuku ugwem,
ema ìre ukot ebi ten̄ten̄ ugwem,
mè ebi isi iba.
6 Ìre ikeyi ke enyi esa ijo inu iyaka ikpe Okumugwem,
enyi ebi ndide kechi, ebi kperiọọn̄ inu?
Ìre ìkare ọmọ ore Nte kinyi, ogwu òlelep enyi?
Ìre ìkare ọmọ orom enyi, mè irọ enyi ekana ido?
7 “Ìkeek usen òraraka cha, me ukot ikaan̄;
ìkeek acha mgbọ ukot ikaan̄ cha.
Ìdo ebi nte kinyi, ke mêtumu inyi enyi;
ìdo ebi ugane kinyi, ke mêkpa iwele ijeen̄ enyi.
8 Mgbọ Ogwu Òbebene Ichit odọmọbe ìrot inyi ebi ido geelek,
mgbọ îchebe otutuuk ebilene ito me agan̄ me agan̄,
îdọmọ oke ijọn̄ inyi ebi ife geelek;
kpa ebi mè awaji ema egobobe.a
9 Mije, uche inu eyi Okumugwem ìre ebi kan̄;
Jekọp ore okike ìrot eyi kan̄.
10 “Emen èwê ke îweek ọmọ imun̄,
me ere ijọn̄ ìkakitibi inu, mè ere ufieejit.
Îchit ọmọ, mè ikpọ ọmọ chieen̄ me lek,
kubọk ọmọ ìre ukwuuk chieen̄ kan̄.
11 Kubọk igo okijeen̄ ogwu gwun̄ ike ekiwulu,
mè ikisisik uwu kan̄,
mè ikifufeen̄ ikana me inyọn̄ ikikpọ ogwu gwun̄,
mè iyat uwop kan̄ iwele isa ikpebe ọmọ,
mè iben ọmọ me inyọn̄ utọn̄ uwop kan̄,
inyi ikanan̄a ìrọn̄.
12 Îre Okumugwem gaalek osa ọmọ ije;
kpunu ofifi awaji geege melek kan̄.
13 “Îrọ ọmọ ikọp ije me ijọn̄ ogoon̄ ogoon̄,
mè isa mfut uti oron ibọọk ọmọ.
Aran̄ akwọọk ònan̄a me lek ewuuk ke îsa ikpukpo ọmọ,
mè aran̄ ònan̄a me lek ewuuk unye isi;
14 mè njijìn mun̄ ebe eriembuuk, mè ata mun̄ ebe arọọn̄ mè ebot,
mè ufuk ufuk bọn arọọn̄ mè ebot ònan̄a me Basan,
melek orie arọọn̄ mè akpa wit òjajaan̄ ichit.
Miin̄ înyibe owu ònwọ ìre mun̄ gerep òkitim awo me isi.
15 “Ebi Ijerenb enenimiin̄ ufuk, mè ikinye ibot.
“Ema ererie inorie igak owot, mè ikibubeke,
mè initele Awaji ogwu òrorom ema,
mè ikpọ Ewuuk Unyan̄a kiban̄ isiki chieen̄.
16 Ema mîsa esese awaji irọ inyi ọmọ ikaan̄ ejit mba,
mè isa òchichaka inu irọ inyi ọmọ inaan̄ ejit.
17 Ema mîgwa ngwugwa inyi ebi kè ijo erumun̄,
ebi ekarege Awaji;
òrere awaji echi ema kperarak iriọọn̄,
ayaya awaji cha òfufuku isibi me ukot keyi,
awaji echi ebi nte nte kinyi kpetọbọ ebum inyi.
18 Enyi mîjit Ewuuk ya, ogwu òsa enyi inu inyọn̄ kubọk ute,
mè iwuuk Awaji, ogwu ònyi enyi ugwem.
19 “Okumugwem omumun̄ ikeyi,
mè ijit ema itele,
mije, ema, bọn kan̄ ebirieen̄ mè ebibaan̄,
mîrọ ejit inaan̄ ọmọ.
20 Inenibe, ‘Ǹkabayaka inyi ema isi kubọk ge,
mâkpọ-nu ike ìbokup ema me lek me mgburudun̄ kiban̄,
mije, ema ìre ukot ebi ikpak;
nsabọn kpegbe utoon̄-ejit ke ema ere.
21 Ema mîsa inu ikarege awaji irọ mè ǹkaan̄ ejit mba,
mè isa mkpọn̄kpọn̄ mkpọmfaka kiban̄ cha irọ mè ǹnaan̄ ejit.
Emi si mâsa ebi kperere ife geege irọ mè ema si ekaan̄ ejit mba,
mè isa ido ebi burubut irọ ema si enaan̄ ejit.
22 Unaan̄-ejit n̄a îra itap ukan̄ itaka ere,
ukan̄ ya ìbotataka mege isi ire ama ekwukwu;
mè itaka si otutuuk inyọn̄ ijọn̄ melek mfut uko geelek iriọk,
mè ilomo mege inin̄ irak ebon ogoon̄ geelek.
23 “ ‘M̀batatap ufialek itutọmọ
ijot ema lek;
otutuuk oraan̄ n̄a ìbota isan̄a me lek kiban̄.
24 Mâria uga akan̄ itap me etete kiban̄,
inyi ikpan̄ ema isan̄a,
igbaalek kpa chieen̄ uyeke uyeke orukan̄ òkikpan̄ ene.
Mâria si kpa chieen̄ unye anam itaak ijot etete kiban̄,
igbaalek kpa chieen̄ iwot ijijinu
òkidut ikana me ijọn̄, inyi enekpan̄ ema.
25 Me oyet, akọn̄ môrọ inyi owuwa ene enan bọn;
me emen uwu, uga ukpook ìkponyi ema isiki-efuuk.
Nsabọn irieen̄ mè nsabọn ibaan̄ kpebenwọnọ,
ikerere si asasa nsabọn mè ebi ugane isọọn̄-ibot.
26 M̀be ke m̀bajijijaka ema isan̄a kpai,
inyi ene geege ikayaka ìkeek ema me etete ebilene.
27 Ire, ǹkaweek ibe ebi ochicha kiban̄ egugo lek,
ǹkaweek ibe ebi oriara kiban̄ efuk nlilọ mfufuk,
ǹkaweek ibe ema etumu ibe,
“Îre eji etim ikpan̄ ema.
Ìkare Okumugwem orọ otutuuk inu chi.” ’
28 “Ebi Ijeren ire ife ìnan ifuk-ibot,
kpekaan̄ si ngobo-ntet geege me emen.
29 Mebe ke ema mîkaan̄ iriọọn̄-inu mè igobo inu yi itet,
kè ema ètet ibot me lek inu mgburudun̄ kiban̄ obore!
30 Ene ge gaalek ìbojeje ikọt ililaba obop ene,
sà ìre ene iba gaalek ebejeje
itap akọp obop ene ekot me ukot,
ilọ me lek ibe ke Ewuuk kiban̄ înyam ema ifiin̄,
ke Okumugwem îra ijit ema itele?
31 Mije, ewuuk kiban̄ ìkakup kubọk Ewuuk kiji,
ebi ochicha kiji mîriọọn̄ ibe ìre ikeya.
32 Gerep kiban̄ ìre gerep ònan̄a me Sodọm,
mè ijọn̄ uko Gomora.
Gerep kiban̄, iwot iwot ojot emen,
njọ gerep kiban̄ ìkitop olulut olulut.
33 Miin̄ kiban̄ ìre iwot otu ulu;
iwot otu ijo ulu òkikpan̄ ene me agam.
34 “ ‘Ǹtetet inu yi ikaan̄ isun̄,
mè igon ikam me uwu isun̄-inu n̄a.
35 Useen̄ ìkup emi me ubọk!
Îre emi mbayaka ikpe ene ijo inu îrọbe!
Mgbọ isikem, ukot kiban̄ môkwaak.
Usen ufialek kiban̄ òkilibi igbet;
mgbọ jakajaka obobaak imeen̄ ema òkinu ugwat ugwat.’
36 “Me atikọ, Okumugwem môfieek oyerebet inwọn ebi kan̄,
mè ikaan̄ ejit nsan me lek ebi ikwaan̄ kan̄,
mgbọ mômun̄be ibe ke efuuk îta ema me emen,
ke kpunu ogwu ònwọnwọnọ,
mè ìre ogwu usun̄ mè ìre ogwu ikarege usun̄.
37 Mgbọ ya, mônenido ema ibe,
‘Mọmọ awaji kinyi cha?
Ewuuk cha enyi ekisi itap ibot me irak, ìkup me owa?
38 Awaji cha òkibọkọ okpọn̄ ngwugwa kinyi cha irie,
mè ikibọkọ miin̄ ngwugwa kinyi cha inwọ,
ìkup me owa?
Ema enan̄a ekeke enu enetap ubọk enyi enyi ma!
Ngwa, ema enu enenyi enyi okwukwek!
39 “ ‘Mgbọ keyi, ìkpọ ma!
‘Îre emi me lek n̄a gaalek nre Awaji!
Kpunu awaji òkukup, isan̄a me lek n̄a.
Emi nkikpan̄, emi si nkinyi ugwem;
emi nkitap unan, emi si nkigwa.
Kpunu ogwu òbokọt inyan̄a ene isibi emi me ubọk.
40 M̀bebene ubọk n̄a ifo inyọn̄, mè ikitumu ibe:
Kè lek ugwem n̄a òkukup ire mgbọ geelek,
41 nsiwat oge akọn̄ n̄a òkimumen kubọk isinyọn̄ isan̄a,
mè initet ikaan̄ me ubọk me irek oyerebet,
m̀basasan̄a useen̄ me lek ebi oriara n̄a,
mè iyaka inu ebi ìchacha emi cha erọbe ikpe ema.
42 Otu otutuuk oraan̄ n̄a ìbokirọn̄ọ eje eje;
oge akọn̄ n̄a ìbokinwọnwọ ufuk kiban̄,
melek eje ebi ekpan̄be me akọn̄, mè ebi etetbe me agam,
mè ibot ebi isi akọn̄ ebi ochicha esọpbe.’
43 “Enyi ebi ido geelek,
ìgọọk ebi eyi Okumugwem ìnwọọn̄ unwọọn̄;
mije, ìbododo eje ebi ikwaan̄ kan̄,
mè irọ ebi ochicha kan̄ useen̄ inu,
mè irọ esuuk me ibot ijọn̄ kan̄ melek ebi kan̄.”
44 Mosis oneninu, ọmọ melek Josuwa gwun̄ kè Nun, mè inifuk ikọ okwa yi okitumu inyi otutuuk ebi Ijeren. 45 Mgbọ Mosis ofukbe ikọ okwa ya inyi otutuuk ebi Ijeren isan̄a, 46 inenitumu inyi ema ibe, “Ìtet ibot me lek otutuuk ikọ chi nsabe itaba enyi ubọk me utọn̄ cherekeyi, mè ìsa ìtumu ìnyi bọn kinyi, inyi ema egbala chieen̄ ekerọ otutuuk inu òkup me Ikan yi. 47 Ikọ chi ìkare ukpọk ukpọk ikọ ikike me lek kinyi, mije, ikọ chi ore ugwem kinyi. Inan̄a me lek ikọ chi ke enyi ebeluk ujọn̄ọ ugwem me inyọn̄ ijọn̄ ya enyi ebesaba okwaan̄ Jodan isi ibọkọ isak.”
Mosis môkwu me inyọn̄ ogoon̄ Nebo
48 Me usen yaage, Okumugwem onenitumu inyi Mosis ibe, 49 “Je si lek onineen̄ ogoon̄ Abarim, mè nene inyọn̄ ogoon̄ Nebo òkup me onineen̄ ogoon̄ ya, me ido Mowabu me agan̄ òkibene isi ikpọ Jeriko. Kup me ere ya bene chieen̄ mun̄ ijọn̄ ido Kenan, òrere ijọn̄ emi mbasa inyi ebi Ijeren me ìrot. 50 Owu môkwu me inyọn̄ ogoon̄ ya obonene, mè ifo igọọk ebi kinyi, kubọk ngwan̄ kwun̄ Erọn okwube me inyọn̄ ogoon̄ Ôru, mè ifo si igọọk ebi kiban̄. 51 Îre mije enyi ene iba ekpọbe emi chieen̄ isiki me isi otutuuk ebi Ijeren me ere mun̄ Meriba òkup me Kades me emen èwê Jin. Me ere ya, enyi mîjit isusun̄ emi me mbuban me etete ebi Ijeren. 52 Mije keyi, owu môkup me ujọn̄ọ ere ibene chieen̄ imun̄ inyọn̄ ijọn̄ ya. Ire, owu òkponin̄ inyọn̄ ijọn̄ ya eyi mbasa inyi ebi Ijeren.”