Mosis îgbana otutuuk otoko ebi Ijeren
33
Sabum Mosis ogwu ikwaan̄ Awaji onikwu, îtan̄a ugbana kechi igwook me lek ebi Ijeren. 2 Ìtumu ibe,“Okumugwem ìnan̄a me ogoon̄ Saina,
mè inikup me Seya ikitoon̄ me lek ebi kan̄
kubọk utoon̄ egwe me ogoon̄ Edọm,
mè ira itoon̄ ema me lek inan̄a me ogoon̄ Paran;
ìje melek ogbogbo urum ebi osat
kan̄ ìkup mbuban ikana isibi,a
mè ikaan̄ ukan̄ ukan̄ lek ikan me ubọk kan̄ agan̄ ulom.
3 Me atikọ owu oma ebi ife chi enenen;
otutuuk ebi kwun̄ ebi ìkup
mbuban ekup me ubọk kwun̄.
Akpat ukot kwun̄ ke ema ekigọọk,
nteme kwun̄ si ke ema ekibọkọ;
4 òrere Ikan Mosis onyibe eji,
eyi òre inu-nkaan̄ bọn kè Jekọp.
5 Ọmọ ore ogwu ubọọn̄ ebi Ijeren,b
mgbọ ebi ibot ebi Ijeren egbaan̄be ititiin̄,
ema melek ebi ibot otoko Ijeren.”
6 Mosis onenibe, “Otoko kè Ruben môluk,
ubọk geelek ebirieen̄ kiban̄ esebe me otu ifuk.”
7 Òfo me lek otoko kè Juda ke îtumu ibe,
“Jei Okumugwem, nọ ito kè Juda,
mè sa ọmọ ka jet ebi kan̄.
Juda ìsa ubọk kan̄ gaalek itim akọn̄ ibot kan̄.
Jei, owu kana ogwu ntap-ubọk kan̄,
tim keme ebi ochicha kan̄!”
8 Òfo me lek otoko kè Libai ke îtumu ibe,
“Okumugwem, Tumim kwun̄ mè Urim kwun̄
ìkup inyi ebi kwun̄ ebi owu otoon̄be ejit me lek.
Owu oroon̄ ema ikpọ me Masa,
owu ogugọlọ melek kiban̄ me otu mun̄ Meriba.
9 Ema kpenyi ebi ute mè ebi uga isi;
kperiọọn̄ ebi ngwan̄ isi;
kperiọọn̄ si ebi bọn,
mije, ema ekikpọ chieen̄ me lek ikọ kwun̄,
mè ikibem inyan̄a-ibot kwun̄.
10 Ema ekijeen̄ bọn kè Jekọp Ikan kwun̄;
ema ekijeen̄ otutuuk ebi Ijeren Ikan kwun̄.
Ekiwọp nsensi inyi owu,
mè ikigwa ngwugwa ewọwọp
iriọk me inyọn̄ ntook kwun̄.
11 Okumugwem, soso gbana unye kiban̄;
tele mè inu geelek ema ekirọ ikibele owu ejit.
Sulu ebon ebi geelek ìkirọ ikeme ema kpukpuku;
jijaka ebi ochicha kiban̄ san̄a,
inyi ekayaka ìkọt ìbene isi ofifi.”
12 Òfo me lek otoko kè Benjamin ke îtumu ibe,
“Ebi Okumugwem omabe!
Ema ekiluk me utelelek me irak ubọk Okumugwem,
ogwu òkikwek ema lek kubọk agbọ otutuuk usen geelek.
Inyọn̄ oguga kan̄ ke ema ekiyaka ibot imaan̄.”
13 Òfo me lek otoko kè Josefu ke îtumu ibe,
“Kè Okumugwem igbana ijọn̄ kiban̄!
Isa mbat ònwọnwọn ichit ònan̄a me isinyọn̄,
melek mun̄ ònan̄a me ogbuuruk irak ijọn̄!
14 Isa si mfut uko òjajaan̄ ichit eyi ura okirọ inyi itibi isibi,
mè mfut òjajaan̄ ichit eyi onyan̄ okirọ inyi itibi ijaan̄ lek!
15 Isa mfut òjajaan̄ ichit òtibi me inyọn̄ ogoon̄ ukot ikaan̄,
melek mfut òjajaan̄ ichit
ònan̄a me inyọn̄ oriọọn̄ òkup mgbọ geelek!
16 Isa mfut òjajaan̄ ichit echi ijọn̄ obokọt isan̄a isibi,
mè òjot òjot inu ijọn̄ môkọtbe itibi isibi,
mè ata ejit Okumugwem
ogwu òtutumu ikọ me emen
gwun̄ uti ukan̄ okilomo me lek!
Kè otutuuk ugbana chi geelek ikup inyi otoko kè Josefu;
ikup inyi Josefu, òsibi isi ene me etete ebi ngwan̄.
17 Umin ubọọn̄ Josefu okaan̄be
ìre umin orie eriembuuk òchili owot ogwu uga;
unye kan̄ ìre unye eyi iko orie eriembuuk oron.
Ìbosasa iko cha igoon̄ ebi ido geelek igwook,
mè igoon̄ ire lek ebi ìkup me okputut linyọn̄.
Ikeyi ke akọp akọp obop iko kè Iferem okup;
ikeyi si ke obop obop iko kè Manasi okup.”
18 Òfo me lek otoko kè Jebulọn mè otoko kè Isaka ke îtumu ibe,
“Enyi bọn kè Jebulọn,
ìnwọọn̄ unwọọn̄ me inyọn̄ ije kinyi geelek!
Enyi bọn kè Isaka,
ìnwọọn̄ unwọọn̄ me emen uwu ọfọ kinyi!
19 Ema mêgween̄ esese esese ife inititiin̄ me inyọn̄ ogoon̄,
mè ikup me ere ya igwa owuwa ngwugwa ata irọrọ.
Ema mêbọọn̄ ubọọn̄ inan̄a me
lek ogbogbo ata inu òkup me okwaan̄,
mè lek nlelet inu ubọọn̄
òkup me emen achiaan̄ agba awaji.”
20 Òfo me lek otoko kè Gadi ke îtumu ibe,
“Itọn̄ ikup inyi Okumugwem
ogwu òdọdọmọ okike ijọn̄ kè Gadi iwele!
Gadi îtutuun̄ ikup kubọk egbe àtat,
mè ichim ubọk mè ìre ibot
anam geelek òjeje igbet igwak.
21 Ijọn̄ ònwọnwọn ichit ke îgobo inyi lek kan̄;
uche òkup inyi ogwu ibot akọn̄ ke esun̄ inyi ọmọ.
Ebi ibot ebi Ijeren isinititiin̄,
ọmọ îra ikisibi unen oyerebet eyi Okumugwem inyi ema,
mè ikirọ Ikan Okumugwem iso me lek ebi Ijeren.”
22 Òfo me lek otoko kè Dan ke îtumu ibe,
“Dan ìre gwun̄ egbe àtat;
ìnan̄a me Basan iwulu isibi.”
23 Òfo me lek otoko kè Nafitali ke îtumu ibe,
“Ata ejit Okumugwem ìjojot me lek kè Nafitali,
ugbana kan̄ si ìjojot ọmọ lek;
ijọn̄ agan̄ ichep-ura mè agan̄ osiki ìre eyi kan̄.”
24 Òfo me lek otoko kè Ase ke îtumu ibe,
“Ase ke egbana ichit me etete bọn ebirieen̄;
kè ọmọ ire ogwu otutuuk ebi ngwan̄ emabe ichit;
kè ọmọ ikigwọk ukot me emen aran̄ mgbọ geelek!
25 Akpo òbokup me otunchit kwun̄
ìbore echi okwukwut mè ekwe;
unye kwun̄ ìbokpọkpọ ikup ikeke yaage
otutuuk usen ugwem kwun̄.
26 “Kpunu ogwu òkup kubọk Awaji ebi Ijeren,c
ogwu òkikọp me akpa isinyọn̄ inu initap ubọk inyi enyi,
mè ikikọp me emen oduku inyọn̄ me umin ubọọn̄ kan̄.
27 Awaji mgbọ ikakaan̄ge itata ore ere ikput-lek kwun̄;
ubọk iba kan̄, òkikup mgbọ geelek,
okup me irak kwun̄, ikirak owu ikaan̄.
Ọmọ môrieen̄ ebi ochicha kwun̄ isan̄a me isi kwun̄,
mè ikibe owu, ‘Jijaka ema san̄a!’
28 Sa me ikeyi, ebi Ijeren mêluk ema gaalek me utelelek;
bọn kè Jekọp kpebemun̄ saasaak.
Ema ebeluk me inyọn̄ ijọn̄ akpa mè aya miin̄ okisibi iwa;
ere ibot ònan̄a me isinyọn̄ okirep igwook.
29 Kpọ-nu uga ubelejit òkup inyi enyi, ebi Ijeren!
Ìre kpasi ife ekup kubọk kinyi,
enyi ebi Okumugwem onyan̄abe isibi?
Ọmọ ore agbọ kinyi mè ogwu ntap-ubọk kinyi,
mè ire si oge akọn̄ kinyi òkaan̄ umin.
Ebi ochicha imun̄ enyi, ebekakana isi ichit;
enyi mêkekijak me inyọn̄ okwut udun̄ kiban̄ iraka.”