Mkpa kè Mosis
34
Mosis oneninan̄a me òla ijọn̄ Mowabu ije isi inene ogoon̄ Nebo, me inyọn̄ ibot ogoon̄ Pisiga, ere òkibene isi ikpọ Jeriko. Okumugwem onenijeen̄ ọmọ otutuuk ijọn̄ ido Kenan, ibene me Giliadi isi ire Dan, 2 mè otutuuk ijọn̄ ebi otoko kè Nafitali, mè ijọn̄ ebi otoko kè Iferem mè Manasi, mè otutuuk ijọn̄ ebi otoko kè Juda mege isi igwook me lek okwaan̄ ile agan̄ ichep-ura, òrere okwaan̄ Mediterenia, 3 mè otutuuk èwê agan̄ osiki, ibene me iteke ijọn̄ Jeriko, ama uti asaak ojotbe emen, mè ijeen̄ mege isi ire Sowari. 4 Okumugwem onenitumu inyi ọmọ ibe, “Eyi ore ijọn̄ eyi nnyan̄abe ibot inyi Ebereyam mè Ajiki mè Jekọp ibe ke mâsa inyi bọn owot iman kiban̄. Nra itele ibe owu òsa chieen̄ kwun̄ òmun̄ ijọn̄ ya. Ire, inyọn̄ ijọn̄ ya me lek kan̄, ukot kwun̄ ìkposaba inin̄.”5 Mosis ogwu ikwaan̄ Okumugwem okwukwu me ere ya, me ido Mowabu, kubọk Okumugwem otumube. 6 Okumugwem obeben ọmọ ifuun̄ me Mowabu, me iteke òkibene isi ikpọ Bet Peyọ. Kpunu ene geege òrọriọọn̄ ere udọn̄-ufuun̄ kan̄ okupbe, mege inire cherekeyi. 7 Mosis ìre efit mè akọp acha iba mgbọ îkwube. Ire, chieen̄ kan̄ ìkadun, unye kan̄ si ìkawọ. 8 Ebi Ijeren ekukup me iteke ijọn̄ Mowabu ito Mosis otuuk kè akọp usen ita, mege ire òta usen ufieejit.
9 Ekwukwu iriọọn̄-inu oneninin̄ ijot emen kè Josuwa gwun̄ kè Nun, mije, Mosis îtoon̄ ọmọ ubọk me ibot. Ebi Ijeren ekekigban̄ utọn̄ inyi ọmọ, mè ikirọ otutuuk inu ikpọ me ike Okumugwem onyibe Mosis ida.
10 Kpunu ofifi ogwu nriran geege òyayaka inan̄a isibi me Ijeren, mè ibet lek kè Mosis, ogwu Okumugwem oriọọn̄be isi mè isi. 11 Îre Mosis orọ otutuuk ikwaan̄ ukechieen̄ mè uyeke uyeke inu echi Okumugwem oriabe ọmọ ibe irọ me ido Ijipiti, mè lek ogwu Fero, mè lek otutuuk ebi ikwaan̄ kan̄, mè otutuuk ido kan̄. 12 Îre sa me ubọk kè Mosis ke Okumugwem ojeen̄ ikpele unye kan̄, mè irọ si otutuuk ikpele uyeke uyeke ikwaan̄, echi îrọbe me chieen̄ otutuuk ebi Ijeren.