Ebi Ijeren mîsaba okwaan̄ Jodan
3
Me ofit iwele kan̄, Josuwa mè otutuuk ebi Ijeren enanan̄a ikeke me ata otu ewelegwe, mè inan̄a me Sitim ije isi ire lek okwaan̄ Jodan, mè ikup me ere ya ikikpọ mgbọ ema mêsababe okwaan̄ ya. 2 Usen ita iraraka, ebi ibot kiban̄ enenikilook etip ikana emen ere m̀gba-ǹgwele ukan̄ ya, 3 ikibe, “Mgbọ enyi isimun̄ ebi otoko kè Libai, ebi ngwugwa, ebenbe okop inyan̄a-ibot eyi Okumugwem Awaji kinyi, enyi mênan̄a isibi me ere geelek enyi ekupbe, mè igọọk ema me udun̄, 4 ufuna enyi eriọọn̄ oniin̄ enyi mêjebe, mije, enyi kperarak ije-nu me oniin̄ keyi. Ire, ikaje ìriaak me lek okop ya. Ìnyi agbagba môsobe ewuuk ije ge me etete kinyi melek okop ya. Ìda ibọkọ me lek.”5 Josuwa onenitumu inyi ebi ene ibe, “Ìgwọk lek kinyi, mije, iyakwut òbowele, Okumugwem môrọ uyeke uyeke inu me etete kinyi.” 6 Inenitumu inyi ebi ngwugwa ibe, “Ìben okop inyan̄a-ibot ìsa ìje me isi ebi Ijeren.” Ikeya ke ebi ngwugwa eben okop inyan̄a-ibot ya isa ije me isi ebi Ijeren.
7 Okumugwem onenitumu inyi Josuwa ibe, “Cherekeyi, emi mâbene irọ owu imin me isi otutuuk ebi Ijeren, inyi ema eriọọn̄ ibe, ike nkupbe melek kè Mosis, ke îre ikeya si ke emi nkup melek kwun̄. 8 Tumu nyi ebi ngwugwa ebi ìbeben okop ya ibe, ebibi isije ire otu mun̄ okwaan̄ Jodan, eje sọnja enin̄ emen mun̄ ya, mè ekeke.”
9 Josuwa onenitumu inyi ebi Ijeren ibe, “Ìna me ere keyi, ìnigban̄ ikọ Okumugwem Awaji kinyi otumube. 10 Ikeyi ke enyi ebesa iriọọn̄ ibe ke Awaji òkup me ugwem ọmọ òwa me etete kinyi, ke ìkpolọlọ irerieen̄ ebi Kenan, mè ebi Et, mè ebi Ifi mè ebi Pereji, mè ebi Girigas, mè ebi Amọ melek ebi Jebus isan̄a me isi kinyi. 11 Ìkpọ, okop inyan̄a-ibot eyi Ogwukaan̄ otutuuk linyọn̄ òkije me isi kinyi isaba okwaan̄ Jodan. 12 Eya orọ, mgbọ keyi, ìgobo akọp mè ene iba me otutuuk otoko ebi Ijeren, otoko ge, ene ge. 13 Ukot ebi ngwugwa ebi ìbeben okop inyan̄a-ibot eyi Okumugwem Ogwukaan̄ otutuuk linyọn̄ isininin̄ emen mun̄ okwaan̄ Jodan ya, mgbọ yaage, mun̄ ya môtọbọ ifieek. Mun̄ eyi òkinan̄a me agan̄ inyọn̄ okwaan̄ ya igbuk isibi, ìkpoyaka ije. Ìbokekeke, mè itọm ibene itiik igwuun̄ me èdọ ge.”
14 Ikeya si ke îkup. Mgbọ ebi Ijeren ejibibe ije inan̄a me ere m̀gba-ǹgwele ukan̄ ema elukbe ibenisaba okwaan̄ Jodan, ebi ngwugwa ìbeben okop inyan̄a-ibot ya ekekije me isi kiban̄. 15 Mgbọ ya ìre mgbọ irọrọkọ uko, mgbọ mun̄ ile okwaan̄ Jodan okibaak imeen̄ ere. Ebi ngwugwa ìbeben okop ya enenije ire lek okwaan̄ ya. Mgbọ yaage ema ejiin̄be ukot me mun̄ me otu mun̄ ya, 16 mun̄ eyi ònan̄a me agan̄ inyọn̄ okwaan̄ ya okekeke, mè itọm ibene itiik igwuun̄ me èdọ ge me ujọn̄ọ ujọn̄ọ ere, me ama ekigwen Adam, òkup iriaak ama Jeretan. Mun̄ eyi òkilibi isibi ifo okwaan̄ Araba, òrere okwaan̄ Uchi, ochachiaak irak isi ge. Ebi Ijeren ejeje isaba okwaan̄ Jodan ya itoon̄ itat me isi ama Jeriko. 17 Ebi ngwugwa cha ìbeben okop inyan̄a-ibot Okumugwem ya ekpọkpọ ikeke ikeya me inyọn̄ nchat ijọn̄ me eden̄ okwaan̄ Jodan ya, ebi Ijeren ekekije iraka isaba okwaan̄ ya. Ema mîkeke ikeya mege otutuuk ido ebi Ijeren ejebe me nchat ijọn̄ isaba okwaan̄ ya isan̄a kpai.