2 Ebi ene esisi ikpa inyi ogwu ubọọn̄ Jeriko ibe, “Kpọ, ebi ene mînan̄a me etete ebi Ijeren inin̄ ama me ikakwun̄ keyi ibeninween̄ lek iwọlọ emen ama ikpọ iriọọn̄ ubọk îkupbe.” 3 Eya orọ, ogwu ubọọn̄ Jeriko oneniria osat isi lek kè Reyabu ibe, “San̄a ebirieen̄ cha ìnunu me lek kwun̄, mè inikup me uwu kwun̄, sibi, mije, ema enu ibeninween̄ lek iwọlọ emen ama kiji ikpọ iriọọn̄ ubọk îkupbe.”

4 Ire, ogwu enenwaan̄ ya îwuuk lek iben ebirieen̄ iba cha ilet. Inenifọọk ibe, “Atikọ ke îre, ebirieen̄ cha mînu me lek n̄a. Emi ǹkariọọn̄ ere ema enan̄abe inu. 5 Ire, me mgbọ egwe ofitbe, sabum mgbọ ebegwuk otunchit ama, ebirieen̄ cha mînan̄a isibi. Agan̄ ema enin̄be, emi ǹkariọọn̄. Ìgwat lek ìgọọk ema, ke enyi mêkọt isi itut ema.” 6 Ire, Reyabu ìsasa ebi ife cha inene inyọn̄ otoon̄-uwu kan̄ isi ilet me irak ekpirikpit uti fàlâs echi îtitiin̄be isun̄ me ere ya. 7 Ebi osat ogwu ubọọn̄ cha esisibi isi ikiweek ebi ife cha, mè inan̄a me emen ama ilibi isibi ikinin̄ oniin̄ ekije isi okwaan̄ Jodan. Mgbọ yaage ema esibibe me ama, egwugwuk otunchit ama ya. Ema mîlibi abayaage isi ire sọntiik oniin̄ òkup me etete ogoon̄ iba me agba okwaan̄ Jodan ya.

8 Me eririeen̄ usen ya, sabum ebi enun̄unun̄ cha enilaak, Reyabu onunu me lek kiban̄ me inyọn̄ otoon̄-uwu ya, 9 mè inibe ema, “Nriọọn̄ ibe ke Okumugwem îyaka ijọn̄ yi inyi enyi. Eya orọ, ukpook kinyi ìkitetet eji. Ikeya si, ebi geelek ìluk me inyọn̄ ijọn̄ yi mêkitọk ita mije kinyi. 10 Eji mînọ ubọk Okumugwem orọbe inyi mun̄ ichiaak ita me okwaan̄ Anyiaan̄ mije kinyi, mgbọ enyi enan̄abe me Ijipiti isibi. Eji mînọ si inu enyi erọbe Siyon mè Ôgu ebi ubọọn̄ iba ebi Amọ, ebi ìluk me usaba okwaan̄ Jodan, mè ikpan̄ ema isan̄a. 11 Mgbọ yaage eji enọbe inu chi, ibot ejit kiji îwulu, ogugo otata eji me lek mije kinyi. Mije, Okumugwem Awaji kinyi, ọmọ ore Awaji inyọn̄ mè ire si Awaji ijọn̄. 12 Eya orọ, mgbọ keyi, soso, m̀bebeek enyi, ìsa Okumugwem ìnyan̄a ibot ìnyi emi ibe, ubọk nkaan̄be ata ejit me lek kinyi, ke enyi si mêkaan̄ ata ejit ikeya me lek ebi ototun̄ ukan̄ kè nte n̄a, mè ìnyi emi inu ijejeen̄ eyi atikọ 13 ibe ke ubọk kinyi ìkpore lek ebek ugwem kè nte n̄a, mè nga n̄a, mè ebi ngwan̄ n̄a ebirieen̄, mè ebi ngwan̄ n̄a ebibaan̄, mè otutuuk ebi ema ekaan̄be, ke enyi mêsun̄ eji me ugwem.”

14 Ikeya ke ebirieen̄ cha enifọọk ọmọ ibe, “Eji mîsa ugwem kiji inyan̄a ibot me ibot ugwem kinyi. Ire enyi kpesa inu eji erọbe isi ikpa inyi ene, mgbọ Okumugwem isiyaka ijọn̄ yi inyi eji, eji mêkaan̄ ata ejit me lek kinyi, mè irọ atikọ melek kinyi.”

15 Reyabu onenisa olik igele ema itibi me otu nruruk isiki ito me ijọn̄ me udun̄ ama ya. Mije, enama uwu kan̄ itoon̄ me lek mgban ama ya. Inyọn̄ mgban ama ya ke ọmọ oluk. 16 Inenitumu inyi ema ibe, “Ìlibi ìnin̄ agan̄ inyọn̄ ogoon̄, inyi ebi ìkigọọk enyi cha ekachichini melek kinyi. Ìlet me agan̄ ya egwe ita, mege ire mgbọ ebi ìkigọọk enyi cha mêgwube ikom ika. Mgbọ ya, enyi mêtotolek inije ifo.”

17 Ebirieen̄ cha enenibe ọmọ, “Ibot eji enyan̄abe inyi owu ìkpokaan̄ unye me lek kiji, 18 îtata, mgbọ eji isinin̄ lek ijọn̄ yi, owu ototobo olik eje eje yi me otu nruruk eyi osan̄abe eji itibi isibi ito me ijọn̄, mè isa nte kwun̄ mè nga kwun̄ mè ebi ngwan̄ kwun̄ ebirieen̄, mè otutuuk ebi ototun̄ ukan̄ kè nte kwun̄ inisun̄ me uwu kwun̄. 19 Ire, ogwu inan̄a me isotu uwu kwun̄ isibi oyet, eje kan̄ ìbotoon̄ me ibot kan̄, ikọ ìkpofieek eji. Ire, ogwu geelek òkup melek kwun̄ me emen uwu, eje kè ogwa môtoon̄ eji me ibot, mè ire ubọk ebi kiji ire ogwa lek. 20 Ire, ire owu osa inu eji erọbe yi isi ikpa, ibot eyi obe eji enyan̄a enyi owu, îchaka.”

21 Ọmọ onenibe, “Ikup ikeya ubọk enyi etumube.” Mgbọ ya ke înitele ibe ema eje, mè inisa olik eje eje ya itobo me lek otu nruruk ya.

22 Ebi ife cha enenitele ọmọ, mè ije ifo agan̄ inyọn̄ ogoon̄, mè ikup me ere ya usen ita, mege ebi ìkigọọk ema cha ekabe. Ebi ìkigọọk ema cha mîweek ema me otutuuk lek oniin̄ ya, ire, kpemun̄ ema. 23 Ikeya ke ebirieen̄ iba cha eninan̄a me inyọn̄ ogoon̄ isibi, mè inisaba okwaan̄ Jodan ika. Ema eneninu me lek kè Josuwa gwun̄ kè Nun, mè inikpa otutuuk inu òrọrọ ema inyi. 24 Ema etutumu inyi Josuwa ibe, “Me atikọ, Okumugwem îyaka otutuuk ijọn̄ ya inyi eji, mije, otutuuk ebi ìluk me lek ijọn̄ ya mêkitọk ita bak me lek kiji.”