Josuwa
Okumugwem îria Josuwa ibe isa ebi Ijeren isi Kenan
1
Mgbọ Mosis ogwu ikwaan̄ Okumugwem okwube inan̄a, Okumugwem onenitumu inyi gwun̄ ikwaan̄ kè Mosis, òrere Josuwa gwun̄ kè Nun ibe, 2 “Mosis ogwu ikwaan̄ n̄a îra ikwu inan̄a. Mgbọ keyi, owu bem lek, mè sa otutuuk ife chi saba okwaan̄ Jodan yi nin̄ lek ijọn̄ eyi emi mbasa inyi ema ebi Ijeren. 3 Ike mwuukbe lek itumu inyi Mosis, ere geelek enyi ejakbe ukot me lek ijọn̄ ya, ere ya ìre eyi kinyi, ǹnyinyi enyi. 4 Okike ijọn̄ kinyi môbene me lek èwê me agan̄ osiki ire lek ogoon̄ Lebanọn me agan̄ inyọn̄, mè ibene si me lek ikpele okwaan̄ Yuferetis me agan̄ mbum-ura isi ire lek otutuuk ijọn̄ ebi Et, mè ikana isi igwook me lek okwaan̄ Mediterenia me agan̄ ichep-ura. 5 Me otutuuk usen ugwem kwun̄, kpunu ogwu òbokọt ikeke ida owu. Ubọk nkupbe melek kè Mosis, ikeya si ke mbakup melek kwun̄. M̀kpasan̄a owu chieen̄ me lek, m̀kpajijit si owu itele mgbọ geege.6 “Tet lek nye, mè kat ejit, mije, îre owu obosa ebi ife chi isi, inyi esi ebọkọ ijọn̄ ya eyi nnyan̄abe ibot inyi ebi nte nte kiban̄ ibe ke mâsa inyi ema me ìrot. 7 Gaalek, tet lek nye, mè kat ejit enenen, inyi owu môkọt igwuun̄ chieen̄ ikisun̄ otutuuk ikan nnyibe Mosis ogwu ikwaan̄ n̄a. Katele ikan cha, mè ìgwaka ìnin̄ agan̄ ulom mè ìre agan̄ ujit, inyi inu môkije ijaan̄ owu me lek, me ere geelek owu môsibe. 8 Kachieek ibe Ikpa Ikan yi inan̄a owu me otu. Kikween̄ eririeen̄ mè ikarek, inyi owu môkọt igwuun̄ chieen̄ ikirọ inu geelek egebe me emen. Mije, îre sa me ikeya ke inu geelek môkije ijaan̄ owu me lek me oniin̄ kwun̄ geelek. 9 Ìre ǹkatumu ìnyi owu? Tet lek nye, mè kat ejit. Katet ukpook, kasisik si ejit, mije, emi Okumugwem Awaji kwun̄, emi òwa melek kwun̄ nkupbe me ere geelek owu môsibe.”
Josuwa înyi ebi Ijeren ida ibe ebem lek ininin̄ Kenan
10 Josuwa oneninyi ebi isi akọn̄ ebi Ijeren ida ibe, 11 “Ìje ìkana emen ere m̀gba-ǹgwele ukan̄, ìsi ìtumu ìnyi ebi ene ibe, ogwu ikup, inen̄e inorie kan̄ isun̄, mije, egwe ita chereyi, ema mêsaba okwaan̄ Jodan yi, isi ibọkọ ijọn̄ eyi Okumugwem Awaji kiban̄ obosa inyi ema me ìrot.”
12 Josuwa onenitumu inyi ebi otoko kè Ruben, mè ebi otoko kè Gadi, mè okpọkọ ebi otoko kè Manasi ibe, 13 “Ìkeek ikọ Mosis ogwu ikwaan̄ Okumugwem otumube inyi enyi ibe ke Okumugwem Awaji kinyi mônyi enyi ijọn̄ yi, inyi enyi eluk esiki efuuk. 14 Eya orọ, ebi nwa kinyi, mè nsabọn kinyi, mè anam kinyi mêkup me isi okwaan̄ Jodan agan̄ keyi, eyi Mosis onyibe enyi. Ire, enyi mêtap ubọk inyi ebi ngwan̄ kinyi. Otutuuk ebi unye me etete kinyi mêkwaan̄ nroon̄ akọn̄, mè ije me isi ebi ngwan̄ kinyi isaba okwaan̄ yi itoon̄. 15 Enyi mêtap ubọk inyi ema mege ire mgbọ Okumugwem mônyibe ema isiki-efuuk kubọk înyibe enyi, mgbọ ema mêbọkọbe si ijọn̄ eyi Okumugwem Awaji kiji obosa inyi ema me ìrot. Mgbọ ya ke enyi mêtolek inigwu ikom ika inu iniluk ikirie utop me lek ijọn̄ eyi kinyi, eyi Mosis ogwu ikwaan̄ Okumugwem onyibe enyi me usaba okwaan̄ Jodan agan̄ mbum-ura.”
16 Ema efọfọọk Josuwa ibe, “Inu geelek onyibe eji ida ibe erọ, eji mêrọ, ere geelek obe eji esi, eji mêsi. 17 Ike eji esikibe ibot inyi Mosis me lek inu geelek, ikeya si ke eji ebesiki ibot inyi owu. Gaalek, kè Okumugwem Awaji kwun̄ ikup melek kwun̄ kubọk îkupbe melek kè Mosis. 18 Ogwu ikpaka otu kwun̄, mè ijit igbagban̄ utọn̄ me lek ikọ kwun̄, ebekpakpan̄ ene ya ifiin̄. Gaalek, tet lek nye, mè kat ejit!”