Josuwa 12

Ebi ubọọn̄ ebi Mosis otimbe ikpan̄

Ebibi ere ebi ubọọn̄ ebi lek ijọn̄ cha ebi ebi Ijeren etimbe ikpan̄, mè ibọkọ ijọn̄ kiban̄ isak me usaba okwaan̄ Jodan agan̄ mbum-ura, bene me lek iteke ijọn̄ okwaan̄ Anọn re lek ogoon̄ Emọn, mè otutuuk iteke ijọn̄ Araba me agan̄ mbum-ura:

2 Ene ge me lek ebi ubọọn̄ cha ìre Siyon ogwu ubọọn̄ ebi Amọ ogwu òluk me Esibon. Ọmọ okikpulu ìkike iba Giliadi, bene me Aroweri, eyi òkup me otu iteke ijọn̄ okwaan̄ Anọn, mè bene me okwaan̄ keya si re okwaan̄ Jabọk, eyi òkup me otubọk okike ijọn̄ ebi Amọn, 3 mè agan̄ mbum-ura iteke ijọn̄ Araba, bene me lek okwaan̄ oyô Kineret^a isi ire okwaan̄ Araba, òrere okwaan̄ Uchi, me agan̄ ekije ifo Bet Jesimot, mè isi ire ebon ogoon̄ Pisiga me agan̄ osiki.

4 Mosis mè ebi Ijeren mîtim ikpan̄ si Ôgu ogwu ubọọn̄ Basan, ene ge me etete ebi ìsisik me lek ebi ujọn̄ọ ile cha ebi ekigwen ebi Refa. Ôgu ìluk me Asitarot mè Ederei. 5 Ôgu okikpulu lek ogoon̄ Emọn, mè ikikpulu Saleka, mè otutuuk agan̄ Basan isi igwook me otubọk okike ijọn̄ ebi Gesuru mè ebi Maaka, mè ìkike iba Giliadi, ire okike ijọn̄ kè Siyon, ogwu ubọọn̄ Esibon.

6 Ebi ubọọn̄ iba kechi ke Mosis mè ebi Ijeren etim ikpan̄. Mosis, ogwu ikwaan̄ Okumugwem odọdọmọ ijọn̄ ife chi isa inyi ebi otoko kè Ruben, mè ebi otoko kè Gadi, mè ìkike iba ebi otoko kè Manasi.

Ebi ubọọn̄ ebi Josuwa otimbe ikpan̄

7 Ebibi ere ebi ubọọn̄ ebi lek ijọn̄ cha ebi Josuwa mè ebi Ijeren etimbe ikpan̄ me isi okwaan̄ Jodan agan̄ ichep-ura, bene me Baali-Gadi me iteke ijọn̄ ogoon̄ Lebanọn isi igwook me ogoon̄ Alak me ikekinene ifo ogoon̄ Seya. Ijọn̄ kechi ke Josuwa odọmọ inyi ebi Ijeren me otoko me otoko me ìrot. 8 Ijọn̄ cha Josuwa odọmọbe ìkup me ijọn̄ ogoon̄ ogoon̄, mè inyọn̄ orioon̄ isi ogoon̄ agan̄ ichep-ura, mè iteke ijọn̄ Araba, mè emen èwê, mè èwê agan̄ osiki. Ijọn̄ cha ìre ijọn̄ ebi Et, mè ebi Amọ, mè ebi Kenan, mè ebi Pereji, mè ebi Ifi, mè ebi Jebus. 9 Ebi ubọọn̄ ebi Josuwa mè ebi Ijeren etimbe ikpan̄ cha ìre:

ubọọn̄ Jeriko, ge;

ubọọn̄ Ai eyi òkup me agba lek Beten, ge;

10 ubọọn̄ Jeruselem, ge;

ubọọn̄ Eburọn, ge;

11 ubọọn̄ Jarimut, ge;

ubọọn̄ Lakis, ge;

12 ubọọn̄ Egulọn, ge;

ubọọn̄ Gejeri, ge;

13 ubọọn̄ Debiri, ge;

ubọọn̄ Gederi, ge;

14 ubọọn̄ Oruma, ge;

ubọọn̄ Aradi, ge;

15 ubọọn̄ Libina, ge;

ubọọn̄ Adulam, ge;

16 ubọọn̄ Makeda, ge;

ubọọn̄ Beten, ge;

17 ubọọn̄ Tapuwa, ge;

ubọọn̄ Eferi, ge;

18 ubọọn̄ Afek, ge;

ubọọn̄ Lasaron, ge;

19 ubọọn̄ Madọn, ge;

ubọọn̄ Asọru, ge;

20 ubọọn̄ Simiron Merọn, ge;

ubọọn̄ Akisafu, ge;

21 ubọọn̄ Tayanak, ge;

ubọọn̄ Megido, ge;

22 ubọọn̄ Kedes, ge;

ubọọn̄ Jokineyam òkup me Kamen, ge;

23 ubọọn̄ Doru me inyọn̄ ogoon̄ Doru, ge;

ubọọn̄ Goyim òkup me Giligan, ge;

24 ubọọn̄ Tija, ge.

Otutuuk ebi ubọọn̄ cha ìre akọp ita mè ge.