Ijọn̄ echi òsisik ibọbọkọ
13
Usen ge, mgbọ Josuwa okanbe enenen, Okumugwem onenitumu inyi ọmọ ibe, “Mgbọ keyi owu ora ikan, usen kwun̄ îta me ubọk. Ire, ijọn̄ òsisik enyi ibọbọkọ îwa enenen. 2 Ijọn̄ òsisik cha ìre otutuuk ijọn̄ ebi Filisia, mè otutuuk echi ebi Gesuru, 3 bene me lek okolo Siyoru òkup me agan̄ mbum-ura inyi Ijipiti, si gwook me okike ijọn̄ ebi Ekurọn me agan̄ inyọn̄, eyi ekifuk ibe ìre ijọn̄ ebi Kenan, òrere ijọn̄ ebi ubọọn̄ go ebi Filisia cha, òrere ebi Gaja, mè Asidọdu, mè Asikelọn, mè Gat, mè Ekurọn, melek ijọn̄ ebi Afa, 4 eyi òkup me agan̄ osiki. Ofifi ijọn̄ òsisik si ìre otutuuk ijọn̄ ebi Kenan, eyi òbene me Ara òkup inyi ebi Sidọn isi gwook me Afek, isi ire okike ijọn̄ ebi Amọ, 5 mè ijọn̄ ebi Gebali, mè otutuuk inyọn̄ ijọn̄ Lebanọn me agan̄ mbum-ura, bene me Baali-Gadi me ebon ogoon̄ Emọn, si gwook me utibi ogoon̄ Amat.6 “Ire me lek otutuuk ebi ìluk me lek ogoon̄ Lebanọn isi igwook me ama Misirefot Mayim, mè otutuuk ebi Sidọn geelek, îre emi me lek n̄a mbalap ema isan̄a me lek ijọn̄ kiban̄ mgbọ ebi Ijeren ebekinin̄ lek ijọn̄ ya. Otutuuk inu owu oborọ ìre icheche ijọn̄ ya inyi ebi Ijeren, inyi ire ìrot kiban̄, ike nnyibe owu ida ibe owu òrọ. 7 Eya orọ, mgbọ keyi, dọmọ ijọn̄ yi nyi otoko onaan̄ge melek ìkike iba otoko kè Manasi, inyi ema esak me ìrot.”
Mîche ijọn̄ isi okwaan̄ Jodan agan̄ mbum-ura
8 Ìkike iba otoko kè Manasi keyilọ, mè otoko kè Ruben, mè otoko kè Gadi mîbọkọ okike ijọn̄ eyi kiban̄ me usaba agan̄ okwaan̄ Jodan me agan̄ mbum-ura. Îre Mosis, ogwu ikwaan̄ Okumugwem oche ijọn̄ cha inyi ema. 9 Okike ijọn̄ kiban̄ ìbene me Aroweri me otu iteke ijọn̄ okwaan̄ Anọn, mè ama òkup me etete iteke ijọn̄ okwaan̄ ya, mè otutuuk lek òla ijọn̄ Medeba isi gwook me Dibọn. 10 Ijọn̄ ya si îkpulu otutuuk ama kè Siyon, ogwu ubọọn̄ ebi Amọ, ogwu òkup me Esibon ikikpulu, mè isi igwook me otubọk okike ijọn̄ ebi Amọn. 11 Ijọn̄ ya îtet si Giliadi, mè ire otubọk okike ijọn̄ ebi Gesuru mè ebi Maaka, mè otutuuk ogoon̄ Emọn, mè otutuuk Basan isi igwook me Saleka, 12 eyi òrere otutuuk ijọn̄ ido kè Ôgu me Basan. Ôgu ìkup me Asitarot mè Ederei ikikpulu. Ôgu ìre ene ge me etete ebi ìsisik me lek ebi ujọn̄ọ ile ebi ekigwen ebi Refa. Mosis ìtitim ikpan̄ ife chi, mè ilap ema isibi me lek ijọn̄ ya. 13 Ire, ebi Ijeren kpekọt ilap ebi Gesuru mè ebi Maaka isan̄a. Eya orọ, ife cha egọgọọk ema ebi Ijeren igbaan̄ iluk mege ire chereyi.
14 Ebi otoko kè Libai gaalek ke Mosis ìkanyi ijọn̄ geege me ìrot. Inu ngwugwa ewọwọp iriọk inyi Okumugwem, Awaji ebi Ijeren, ọmọ ore ìrot eyi kiban̄, ike Okumugwem otumube inyi ema.
Ijọn̄ ebi otoko kè Ruben
15 Mosis îche ijọn̄ inyi ebi otoko kè Ruben me owot iman me owot iman. 16 Okike ijọn̄ kiban̄ ìbene me Aroweri me otu iteke ijọn̄ okwaan̄ Anọn, mè ama òkup me emen iteke ijọn̄ okwaan̄ ya, mè otutuuk lek òla ijọn̄ ya mege isi igwook me Medeba. 17 Ijọn̄ kiban̄ îre si lek ama Esibon mè otutuuk ama òkup me irak kan̄ me inyọn̄ òla ijọn̄ ya. Ama cha ìre Dibọn, mè Bamot Baali, mè Bet Baali Meyon, 18 mè Jayas, mè Kedemọt, mè Mefayat, 19 mè Kiriatayim, mè Sibima, mè Seret Sayari òkup me inyọn̄ okpurukpu òkup me emen iteke ijọn̄ ya, 20 mè Bet Peyọ, mè otutuuk ebon ogoon̄ Pisiga, mè Bet Jesimot. 21 Ijọn̄ ya îre lek otutuuk ama òkup me lek òla ijọn̄ ya, mè ikpulu otutuuk ere Siyon ogwu ubọọn̄ ebi Amọ okikup me Esibon ikpulu. Mosis îtim ikpan̄ Siyon melek ebi ubọọn̄ ebi Midian, ebi ìrere Efi, mè Rekem, mè Juru, mè Uru, mè Reba. Ebi ibot chi ekpulu lek ijọn̄ ya inyi Siyon. 22 Ebi Ijeren mîkpan̄ Balam gwun̄ kè Beyọ igbaalek ebi ema ekpan̄be cha. Balam yi ìre ogwu òdo inu. 23 Otubọk ere okike ijọn̄ ebi otoko kè Ruben otabe ìre agba okwaan̄ Jodan. Ama ile kechi melek asabọn ama kiban̄ ore ìrot ebi otoko kè Ruben eyi enyibe ema me owot iman me owot iman.
Ijọn̄ ebi otoko kè Gadi
24 Mosis îche ijọn̄ inyi ebi otoko kè Gadi me owot iman me owot iman.
25 Okike ijọn̄ kiban̄ îkpulu Jajeri, mè otutuuk ama òkup me Giliadi, mè okpọkọ me lek ijọn̄ ebi Amọn isi igwook me Aroweri eyi òkiyaka isi ikpọ ama Raba. 26 Ijọn̄ kiban̄ înyana inan̄a me Esibon ire Ramat Mijipa mè Betonim, mè inan̄a si me Mayanayim isi ire otubọk okike ijọn̄ Debiri. 27 Me emen iteke okwaan̄ Jodan, ijọn̄ kiban̄ îkpulu Bet Aram, mè Bet Nimira, mè Sukot, mè Jafọn, mè ijọn̄ òsisik me lek ijọn̄ kè Siyon ogwu ubọọn̄ Esibon. Otubọk ijọn̄ kiban̄ ìyaka me lek okwaan̄ Jodan isi ire agba okwaan̄ Kineret me isi agan̄ mbum-ura me lek okwaan̄ Jodan. 28 Ama ile kechi melek asabọn ama kiban̄ ore ìrot ebi otoko kè Gadi, eyi enyibe ema me owot iman me owot iman.
Ijọn̄ enyibe ìkike iba otoko kè Manasi.
29 Mosis înyi ìkike iba me lek ebi otoko kè Manasi ìrot eyi kiban̄ si. Îre ìkike iba me lek ebi ototun̄ ukan̄ bọn kè Manasi ke înyi ìrot yi me owot iman me owot iman.
30 Ijọn̄ kiban̄ ìbene me Mayanayim, mè ikpulu otutuuk Basan, mè otutuuk ijọn̄ kè Ôgu ogwu ubọọn̄ Basan, mè otutuuk akọp ama gweregwen kè Jairi òkup me Basan. 31 Ijọn̄ kiban̄ îkpulu si ìkike iba me lek ijọn̄ Giliadi, mè ijọn̄ Asitarot mè Ederei, òrere ama echi Ôgu ogwu ubọọn̄ Basan okikpulu. Otutuuk ijọn̄ kechi okup inyi ìkike iba me lek bọn kè Makiri gwun̄ kè Manasi me owot iman me owot iman.