Ebi Ijeren mîche ijọn̄ agan̄ ichep-ura okwaan̄ Jodan
14
Echichi ore okike ijọn̄ ebi Ijeren ebọkọbe me ìrot me lek ijọn̄ Kenan. Ebi ìdọdọmọ ijọn̄ cha inyi ema me ìrot ìre Elieja ogwu ngwugwa, mè Josuwa gwun̄ kè Nun, mè ebi ibot uwu ebi Ijeren me otoko me otoko. 2 Ema eroroon̄ nriroon̄ isa idọmọ ijọn̄ cha inyi otoko onaan̄ge mè okpọkọ cha me ìrot, kubọk Okumugwem onyibe Mosis ida ibe erọ. 3 Mosis îdọmọ ijọn̄ inyi otoko iba mè okpọkọ me usaba okwaan̄ Jodan me agan̄ mbum-ura. Ire, ìkanyi ebi otoko kè Libai ìrot geege melek kiban̄. 4 Bọn kè Josefu mîkana otoko iba, òrere otoko kè Manasi, mè otoko kè Iferem. Kpenyi ebi otoko kè Libai ìrot me lek ijọn̄, îtata ama iluluk gaalek ke enyi ema, melek ijọn̄ òkup ikana ama cha, ere urum anam kiban̄ môkibọm urie. 5 Ubọk Okumugwem otumube inyi Mosis, ikeya ke ebi Ijeren edọmọ ijọn̄ ikpọ me lek.Mîsa ijọn̄ Eburọn inyi Kelep
6 Usen ge, usini ebi otoko kè Juda enunu me lek kè Josuwa me Giligan. Ene ge me lek kiban̄, òrere Kelep gwun̄ kè Jefune ogwu owot iman kè Kenaji, onenitumu inyi Josuwa ibe, “Owu oriọọn̄ ikọ Okumugwem otumube inyi Mosis ogwu ikwaan̄ Awaji ògbaan̄ me lek kwun̄ melek n̄a, mgbọ eji ekupbe me Kades Bania. 7 Emi ìre akọp acha ini mgbọ Mosis ogwu ikwaan̄ Okumugwem oriabe emi isibi me Kades Bania ibe emi ǹsi ǹnween̄ lek m̀kpọ lek ijọn̄ yi nu ubọk îkupbe. Emi nkaka inikpa otutuuk inu mmun̄be inyi ọmọ, ike îkupbe emi me ejit. 8 Ebi melek n̄a esibe ije ya, mîrọ inyi ibot ejit ebi kiji itọọk. Ire, emi mbeben otutuuk ejit n̄a itoon̄ me lek Okumugwem Awaji n̄a. 9 Eya orọ Mosis ochechieek emi use ibe, mije emi ntoon̄be otutuuk ejit n̄a me lek Okumugwem Awaji n̄a, ke ijọn̄ ya eyi emi njakbe ukot me lek môre ìrot eyi n̄a mè nsabọn n̄a ire mgbọ geelek.
10 “Kpọ-nu, mgbọ keyi, akọp acha ini mè go ire eyi Okumugwem osun̄be emi me ugwem ire, karake Okumugwem otumube ikọ yi inyi Mosis me mgbọ ebi Ijeren ekijijen̄e me emen èwê. Me mgbọ keyi, emi ìre akọp acha jeeta mè go. 11 Me chereyi, lek n̄a ìnyenye si kwok kwok kubọk înyebe me usen Mosis oriabe emi ikwaan̄ ya. Ike nkaan̄be unye mgbọ ya, ikeya si ke nkaan̄ unye mgbọ keyi isisibi isi akọn̄, mè ika. 12 Eya orọ, mgbọ keyi, nyi emi lek ogoon̄ yi, eyi Okumugwem otumube ikọ ibak me usen ya. Mije, owu onọ me usen ya ibe ke ebi ujọn̄ọ ile ekigwen ebi Anak ekiluk me ere ya, ke ama kiban̄ ìmimiin̄, mè ikaan̄ mgban ikana. Usini mgbọ, Okumugwem môkeke inyi emi, inyi emi ǹkọt ǹrieen̄ ema ǹsan̄a kubọk Okumugwem otumube.”
13 Josuwa ogbagbana Kelep gwun̄ kè Jefune, mè isa Eburọn inyi ọmọ me ìrot. 14 Sa me ikeya ke Eburọn osa ikana ìrot kè Kelep gwun̄ kè Jefune ogwu owot iman kè Kenaji, bak me lek ọmọ osabe otutuuk ejit kan̄ itoon̄ me lek Okumugwem, Awaji ebi Ijeren. 15 Sabum Eburọn onikana ìrot kè Kelep, ekigwen ama ya Kiriat Ariba. Esa erieen̄ kè Ariba, òrere ogwu òmimin ichit me etete ebi Anak, igwen ama ya.
Inyọn̄ ijọn̄ ya onenikup me esuuk, akọn̄ geege ìkayaka ìtim me lek ijọn̄ ya.