Ijọn̄ ebi otoko kè Juda
15
Mgbọ eroon̄be nriroon̄ isa iche ijọn̄ inyi ebi otoko kè Juda, okike ijọn̄ enyibe ema me owot iman me owot iman ìkup me agan̄ osiki osiki ijọn̄ ya, isi igwook me otubọk ijọn̄ ebi Edọm me emen èwê Jin. 2 Me agan̄ osiki ya, ijọn̄ ya ìbene me agba okwaan̄ Uchi, me lek ọfọ ijọn̄ òkikpọ agan̄ osiki, 3 mè inyana ifo osiki utibi ogoon̄ Akarabim,a mè iraka isi ire èwê Sin, mè inene isi igwook me agan̄ osiki ama Kades Bania, isi ire ama Ejirọn, mè ije ire ama Adari, mè igwu ikana isi ire ama Karaka. 4 Okike ijọn̄ ya si îraka me isi ama Asimon, mè isi ire oka okolo Ijipiti, mè isi ita me lek okwaan̄ ile Mediterenia. Eyi ore okike ijọn̄ kiban̄ me agan̄ osiki.5 Okike eyi agan̄ mbum-ura ìbene me lek okwaan̄ Uchi isi igwook me lek otu okwaan̄ Jodan. Okike eyi agan̄ inyọn̄ onenibene me lek ọfọ ijọn̄ me agan̄ okwaan̄ ile Mediterenia isi ire otu okwaan̄ Jodan, 6 mè inene isi ire Bet Ogula, mè iraka Bet Araba me agan̄ inyọn̄, mè inyana isi ire lek Ewuuk kè Boyan gwun̄ kè Ruben. 7 Okike ijọn̄ ya si îre ama Debiri, bene me lek iteke Akọ, mè inifan̄a ikana ifo agan̄ inyọn̄ isi ire Giligan, eyi òkup me isi oniin̄ utibi ogoon̄ ama Adumim me agan̄ osiki me lek iteke ya. Îje isi ire lek mun̄ En Semes mè isi isibi me En Rogen, 8 mè inilibi inene ifo iteke Ben Inọm iraka me agan̄ osiki ama ebi Jebus, òrere Jeruselem. Okike ijọn̄ ya îsaba inene inyọn̄ ibot ogoon̄ òkup me agan̄ ichep-ura me lek iteke Inọm, eyi òkup me ata ibot iteke Refayim me agan̄ inyọn̄. 9 Me inyọn̄ ibot ogoon̄ ya ke okike ijọn̄ ya ofiaka ikana isi lek ogbuuruk mun̄ Nefitowa, mè inyana ire lek ama echi òkup me lek ogoon̄ Efurọn, mè ije ikana ire ama Bayala eyi òrere Kiriat Jiarim. 10 Me Bayala ke okike ijọn̄ ya okana inyi agan̄ ichep-ura isi ire lek ogoon̄ Seya, mè iraka ifo agba ogoon̄ Jiarim me agan̄ inyọn̄, eyi òre Kesalọn, mè inikwala isibi ifo ama Bet Semes, mè iraka ifo ama Timina. 11 Okike ijọn̄ ya onenire ama Ekurọn me agan̄ inyọn̄, mè ifiaka ikana ifo ama Sikoron, mè iraka ogoon̄ Bayala isi igwook me ama Jabinen, mè isi ita me lek okwaan̄ ile Mediterenia.
12 Agba okwaan̄ ile ya ore okike ijọn̄ ya me agan̄ ichep-ura. Eyi ore okike ijọn̄ ebi otoko kè Juda me owot iman me owot iman.
Kelep îbọkọ Eburọn mè Debiri
13 Me lek ijọn̄ ebi Juda, Josuwa îsa ijọn̄ ama Kiriat Ariba, eyi òrere Eburọn, inyi Kelep gwun̄ kè Jefune, ike Okumugwem otumube ibe erọ. Ariba ore nte kè Anak. 14 Kelep onenilap ebi owot iman kè Sesai, mè Ayiman, mè Talimai, ìrere ibot bọn ita kè Anak isan̄a me lek ijọn̄ Eburọn, mè iraka lek ijọn̄ ya iluk. 15 Kelep onenijibi akọn̄ inan̄a me Eburọn isi lek ebi ama Debiri, eyi ekigwen Kiriat Seferi me adasi mgbọ. 16 Mgbọ ya, Kelep onenitumu ibe, “Ogwu ikọt isi akọn̄ me Kiriat Seferi mè ibọkọ ama ya, mâsa Akisa, gwun̄ n̄a enenwaan̄, inyi ene ya me lek nwa.” 17 Otinien gwun̄ kè Kenaji, ngwan̄ kè Kelep, osisi akọn̄ me Kiriat Sefa, mè ibọkọ ama ya. Kelep osasa Akisa, gwun̄ kan̄ enenwaan̄ inyi Otinien me lek nwa.
18 Usen ge, Akisa onunu me lek ogwu olom, mè inisisaak ibe mè ogwugwu ibeek nte kan̄ ijọn̄ uko. Mgbọ Akisa onan̄abe me inyọn̄ inyinya akpan kan̄ isibi ijọn̄, Kelep ododo ọmọ ibe, “Ìre keke ke oweek?”
19 Akisa ofọfọọk ibe, “Che uche ugbana nyi emi. Eyi onyibe emi ijọn̄ me emen èwê agan̄ osiki, nyi emi ibot mun̄ gbaalek.” Ikeya ke Kelep oninyi ọmọ ibot mun̄ echi agan̄ inyọn̄ mè echi agan̄ osiki.
Ama ebi otoko kè Juda
20 Eyiyi ore ìrot ebi otoko kè Juda me owot iman me owot iman:
21 Ama ebi otoko kè Juda echi òkup me okputut agan̄ osiki me otubọk ijọn̄ ebi Edọm me emen èwê agan̄ osiki ìre Kabijen, mè Ederi, mè Yaguru, 22 mè Kina, mè Dimona, mè Adada, 23 mè Kedes, mè Asọru, mè Yitinan, 24 mè Jifu, mè Telem, mè Beyalot, 25 mè Asọru Adata, mè Keriyot Ejirọn eyi òrere Asọru, 26 mè Amam, mè Sema, mè Molada, 27 mè Asari Gada, mè Esimọn, mè Bet Pelet, 28 mè Asari Suwali, mè Bieseba, mè Bijiyotiya, 29 mè Bayala, mè Iyim, mè Esem, 30 mè Elitoladi, mè Kesili, mè Oruma, 31 mè Sikilagi, mè Madimana, mè Sanisana, 32 mè Lebayot, mè Silikim, mè Ayin, mè Rimọn. Otutuuk ama kechi ìre akọp ama ile iba mè onaan̄ge melek asabọn ama kiban̄.
33 Ama kiban̄ me inyọn̄ orioon̄ isi ogoon̄ agan̄ ichep-ura ìre Esitayon, mè Sora, mè Asina, 34 mè Janowa, mè En Ganim, mè Tapuwa, mè Enam, 35 mè Jarimut, mè Adulam, mè Soko, mè Ajeka, 36 mè Seyarayim, mè Aditayim mè Gedera, mè Gederotayim. Otutuuk kechi orere akọp mè ama ile ini melek asabọn ama kiban̄.
37 Usini ama kiban̄ si ìre Senan, mè Adasia, mè Migidan Gadi, 38 mè Diliyan, mè Mijipa, mè Yọkiteli, 39 mè Lakis, mè Bojikat, mè Egulọn, 40 mè Kabon, mè Layimas, mè Kitilis, 41 mè Gederot, mè Bet Dagọn, mè Nayama, mè Makeda. Otutuuk kechi orere akọp mè ama ile gweregwen melek asabọn ama kiban̄.
42 Ofifi ama kiban̄ si ìre Libina, mè Eteri, mè Asan, 43 mè Jifita, mè Asina, mè Nesip, 44 mè Keyila, mè Akijip, mè Maresa. Otutuuk kechi orere ama ile onaan̄ge melek asabọn ama kiban̄.
45 Ofifi ama kiban̄ si ìre Ekurọn mè ama ile kan̄ mè asabọn ama kan̄; 46 bene me Ekurọn re lek okwaan̄ ile Mediterenia, otutuuk ama ile òkup iriaak Asidọdu, melek asabọn ama kiban̄, 47 mè Asidọdu mè ama ile kan̄ mè asabọn ama kan̄, mè Gaja mè ama ile kan̄ mè asabọn ama kan̄ isi ire lek oka okolo Ijipiti, melek okwaan̄ ile Mediterenia mè agba ijọn̄ kan̄.
48 Ama kiban̄ me agan̄ inyọn̄ ogoon̄ ìre Samiri, mè Jatiri, mè Soko, 49 mè Dana, mè Kiriat Sana eyi òrere Debiri, 50 mè Anabu, mè Esitemo, mè Anim, 51 mè Gosen, mè Olon, mè Gilo. Otutuuk kechi orere akọp mè ama ile ge melek asabọn ama kiban̄.
52 Usini me lek ama kiban̄ si ìre Arabu, mè Duma, mè Esiyan, 53 mè Yanim, mè Bet Tapuwa, mè Afeka, 54 mè Umita, mè Kiriat Ariba òrere Eburọn, mè Siyoru. Otutuuk kechi orere ama ile onaan̄ge melek asabọn ama kiban̄. 55 Ofifi ama kiban̄ si ìre Mayon, mè Kamen, mè Jifu, mè Juta, 56 mè Jesereli, mè Jokideyam, mè Janowa, 57 mè Keyin, mè Gibiya, mè Timina. Otutuuk kechi orere akọp ama ile melek asabọn ama kiban̄.
58 Ofifi ama kiban̄ si ìre Alikulu, mè Bet Suru, mè Gedoru, 59 mè Marat, mè Bet Anot, mè Elitekon. Otutuuk kechi orere ama ile gweregwen melek asabọn ama kiban̄.
60 Ofifi ama kiban̄ si ìre Kiriat Baali, eyi òrere Kiriat Jiarim, mè Raba. Otutuuk kechi orere ama ile iba melek asabọn ama kiban̄.
61 Ama kiban̄ me emen èwê ìre Bet Araba, mè Midin, mè Sekaka, 62 mè Nibisan, mè Ama Uchi, mè Engedi. Otutuuk kechi orere ama ile gweregwen melek asabọn ama kiban̄.
63 Ire, ebi otoko kè Juda kpekọt ilap ebi Jebus ebi ìluk me Jeruselem isibi. Eya orọ, ebi Jebus egọgọọk ebi Juda igbaan̄ iluk me Jeruselem mege ire chereyi.