Okwa kè Dibọra
5
Me usen ya, Dibọra mè Barak gwun̄ kè Abinowam enenikọt okwa ibe ikeyi:2 Ebi isi akọn̄ Ijeren mîsibi ikije me isi akọn̄,
otutuuk ebi akọn̄ esasa me ejit kiban̄ gaalek isibi igọọk.
Ìtọn̄ Okumugwem!
3 Enyi ebi ubọọn̄, ìnọ!
Enyi ebi mkpulu, ìraan̄ utọn̄ ìgban̄!
Emi mâkọt okwa inyi Okumugwem;
iin̄, mâkọt okwa;
mâsan̄a okwa, mè ikwak ekpete
isa itọn̄ Okumugwem,
Awaji ebi Ijeren.
4 Jei Okumugwem,
mgbọ owu onan̄abe me ogoon̄ Seya isibi,
mgbọ owu okijak ukot ikinan̄a me agan̄ Edọm isibi,
ijọn̄ ìkisisisik, akpa isinyọn̄ okekirep ibot,
ebi kè oduku inyọn̄ ekekisene mun̄ igwook.
5 Ebi kè ogoon̄ mîsisik me isi Okumugwem;
iin̄, ogoon̄ Saina îsisik me isi Okumugwem,
Awaji ebi Ijeren.
6 “Me ukot kè Samiga gwun̄ kè Anat,
mè ukot kè Jayen si,
ebi ene kpeyaka ikije me lek uga oniin̄ cha;
ebi ije eyaka inikije me lek
asabọn kanakana oniin̄ gaalek.
7 Ugwem ekiluk me ama ebi
Ijeren ìkayaka ìkup kubọk adasi,
mege ire mgbọ owu Dibọra okanabe isibi,
kubọk uga isa inyi ebi Ijeren.
8 Mgbọ ema egobobe ebi kè ofifi awaji inyi lek kiban̄,
akọn̄ onunu otutuuk otunchit kiban̄,
kpemun̄ agbọ geege, kpemun̄ si otunwa geege,
me etete akọp obop ene ini, ebi akọn̄ Ijeren.
9 Ejit n̄a ìkup me lek ebi isi akọn̄ Ijeren,
mè ikup si me lek ebi ìsasa lek kiban̄ inyi me ikike.
Ìtọn̄ Okumugwem!
10 “Enyi ebi ìkikọp me inyọn̄ inyinya akpan okuket,
mè ikikweek irek me inyọn̄ ejiik inyọn̄ anam ije,
mè enyi ebi ìkije ukot ukot me lek oniin̄,
ìgban̄ utọn̄!
11 Ida òbebene igak ida ebi ìsook oraan̄
òkitaan̄ me otu udọn̄ mun̄ cha;a
ebi ìkọt okwa mêkikọt okwa
ibak ata akọn̄ cha Okumugwem otimbe,
mè ikigo ata ntim-mkpan̄
ebi usọ akọn̄ kan̄ etimbe ikpan̄ me Ijeren!
“Ebi eyi Okumugwem enenisibi
isi otutuuk otunchit ama.
12 ‘Nan̄a keke, Dibọra, nan̄a keke!
Nan̄a keke, bene lek, mè bene kọt okwa!
Nan̄a keke, owu Barak!
Owu gwun̄ kè Abinowam,
kpulu ebi usun̄ akọn̄ kwun̄ tap me usun̄ akọn̄.’
13 “Ebi ene inen mè inen ìsisik
mîtim ikpan̄ ebi ilile ebi ofifi ido;
Okumugwem îrọ emi ǹtim
m̀kpan̄ ebi unye me akọn̄.b
14 Usini enan̄a me Iferem,
agan̄ mgbọ òkup inyi Amalek;
ebi otoko kè Benjamin òwa me etete ebi kinyi
ebi ìkekeke inye me udun̄ kwun̄.
Ebi isi akọn̄ mînan̄a me Makiri isibi inu,
ebi ibot akọn̄ enanan̄a me Jebulọn inu.
15 Ebi isi akọn̄ otoko kè Isaka ekukup melek kè Dibọra;
iin̄, ebi otoko kè Isaka ekukup melek kè Barak,
mè ikililiin̄ igọọk ọmọ me udun̄ inin̄ emen iteke.
Ire, me etete ebi otoko kè Ruben,
kenekene ejit îmin enenen.
16 Keke orọ mè owu òbia me udun̄
me ere itobo-arọọn̄?
Ìre òkigban̄ ida òja ebi òkpukpo arọọn̄ ekiwut
isa ikigwen arọọn̄?
Me etete ebi otoko kè Ruben,
kenekene ejit îmin enenen.
17 Ebi agan̄ Giliadi ebabia me udun̄ me usaba okwaan̄ Jodan.
Keke orọ mè ebi otoko kè Dan ebia me lek uji ile?
Ebi otoko kè Ase ebabia me agba okwaan̄,
mè ikup me ere m̀gba uji kiban̄.
18 Ebi otoko kè Jebulọn mîbem lek
isasa ugwem kiban̄ inwene mkpa;
ikeyi si ke ebi otoko kè Nafitali echieek mkpa
me oron akọn̄ me inyọn̄ ogoon̄.
19 “Ebi ubọọn̄ mînu, mè initim akọn̄;
ebi ubọọn̄ Kenan mînitim akọn̄
me Tayanak me agba lek mun̄ me Megido,
ire, kpemọnọ alata araran̄ me oruru.
20 Ebi kè ntoronyan̄ òkup me
isinyọn̄ mîtim akọn̄ inyi eji,
ema ekup me irek kiban̄ me
isinyọn̄ itim akọn̄ me lek kè Sisera.
21 Unye ukot mun̄ okwaan̄ Kison onunu inikwọọk ema ije,
okwaan̄ Kison, òrere oka okwaan̄ ukot ikaan̄.
Ibot ejit n̄a, kije nyi isi, mè nye lek!
22 Ida ukot inyinya okekigbugbut kubọk isinyọn̄,
mgbọ ema ekisa unye ukot
kiban̄ ijak ijọn̄ iwulu gadam, gadam.
23 Ogwu osat Okumugwem okekitumu ibe,
‘Ìfieek otu ìnyi ebi ama Meroju.
Ìfieek otu ijo ijo ìnyi ebi ama ya,
mije, ema kpenan̄a isibi
inu initap ubọk inyi Okumugwem,
kpesibi inigọọk Okumugwem itim akọn̄
me lek ebi unye akọn̄.’
24 “Jayen, nwa kè Eberi ogwu Keyin
ìre ogwu egbanabe ichit me etete ebibaan̄,
ọmọ ke egbana ichit me etete ebibaan̄ ìkiluk me uwu ọfọ.
25 Sisera ìdo mudim ikike,
Jayen onyinyi ọmọ mun̄ ebe eriembuuk;
ìsa uja ekpen̄ ògbe ogwu ubọọn̄
itọkọ ata mun̄ ebe inyi.
26 Itoto ubọk ujit imọnọ okpọ̀kọ uwu ọfọ,
mè isa ubọk ulom imọnọ abaracha ogwu usọ;
mè isa igon Sisera me ngigọ ibot,
ìgogon agan̄ ibot kan̄ itibi, ikpukpukpuku.
27 Me agba ukot kè Dibọra ke îgele igwook,
mè irọn̄, mè ilaak inyana;
me agba ukot kan̄ ke îgele igwook, mè irọn̄,
ere îgelebe igwook, ere keya si ke îrọn̄, mè ikwu.
28 “Nga kè Sisera ìtap chieen̄ itibi otu nruruk ikikpọ;
ìkup me udun̄ mgbugban otu nruruk ikito ito,
‘Ìre keke oyaka initet uji akọn̄ kan̄ ikaan̄ ifiin̄ ikeyi ni?
Keke orọ mè nkagwat lek ìnọ ida ukot uji akọn̄ kan̄ ni?’
29 Ebi ìriọọn̄ inu me etete ebibaan̄ ikwaan̄ kan̄
ekekifọọk ọmọ otu;
ire, ọmọ okpọkpọ ikinina lek si ibe,
30 ‘Usini mgbọ, ema mîfum owuwa inu,
mè ikup ikiche:
mênyi enerieen̄ geelek enenwaan̄ ge,
mè ìre iba,
ujuja ofọnti mfum òkaan̄ esese chieen̄ echi
mêsabe inyi Sisera,
ujuja ofọnti esese chieen̄ echi elọkbe ijaan̄,
echi esese chieen̄ elọkbe,
echi ogwu òfufum môkọtbe ikijeen̄ me ebek.’c
31 “Jei Okumugwem,
kè otutuuk ebi oriara kwun̄ ekwaan̄ eta ikeya!
Kè otutuuk ebi òma kwun̄ ekera kubọk ura
mgbọ îkibum isibi me unye kan̄.”
Otutuuk agan̄ ijọn̄ ya onenikup me esuuk akọp acha ini.