Gidiọn îkana ogwu ibot oyerebet me Ijeren
6
Ebi Ijeren eyayaka ikpọk ikirọ ijo inu me chieen̄ Okumugwem, Okumugwem odada ema itap me ubọk ebi Midian acha jaaba. 2 Ebi Midian eneninye lek enenen igak ebi Ijeren. Mije keya, ebi Ijeren ekekililiin̄ ifon inyọn̄ ogoon̄ isi ikilileek me irak ewuuk, mè emen ǹkororok, mè emen okwukwek akọn̄ geelek ema ekọtbe imun̄. 3 Ebi Ijeren isiwop uko kiban̄, mè mfut uko kiban̄ isiren̄e, ebi Midian, mè ebi Amalek, mè ebi ìnan̄a me agan̄ mbum-ura, mîra ijibi inin̄ lek ijọn̄ ebi Ijeren inikiweek ema ikọ. 4 Ema isinu, ekiniluluk ibia me inyọn̄ ijọn̄ ebi Ijeren, mè ejijaka otutuuk inu ewopbe èsan̄a kpai, mege isi igwook me Gaja. Kpekitele inu geege me ugwem inyi ebi Ijeren, bene me lek ebi kè arọọn̄, si re lek ebi kè eriembuuk, mè ebi kè inyinya akpan. 5 Ema isinu, ekisasa anam uwu kiban̄ mè uwu ọfọ kiban̄ igbaalek inu, mè ejibi me urum me urum ènegwook èchit otutuuk ere kubọk ego akaka ituuk ogwook ichit uko. Kpekikọt ifuk otu ifuk kiban̄ mè aligọ kiban̄. Ema ekinu, mè ejijaka otutuuk uko èsan̄a kpai. 6 Ebi Midian esasa me ikeya itap ebi Ijeren ugbọọn̄ ògak ugbọọn̄. Ebi Ijeren etoto ito igwen Okumugwem ibe ininyan̄a ema.7 Ito ya ebi Ijeren etobe mije ebi Midian onenire utọn̄ Okumugwem. 8 Okumugwem oraria ogwu nriran ge ijet ema. Ogwu nriran ya onenitumu inyi ema ibe, “Okumugwem, Awaji ebi Ijeren ìbe ikeyi: Îre emi nsan̄a enyi isibi me ido Ijipiti, ere enyi ekupbe me usun̄. 9 Emi ntaba enyi isibi me irak ubọk ebi Ijipiti, mè ubọk otutuuk ebi ìkitutuku enyi, mè irieen̄ ema isan̄a me oniin̄, inyi enyi eraka, mè inikana ijọn̄ kiban̄ inyi enyi. 10 Emi nnenitumu inyi enyi ibe, ‘Emi nre Okumugwem Awaji kinyi, ikatọbọ ebum ìnyi awaji ebi Amọ, ebi enyi ekiluk me lek ijọn̄ kiban̄.’ Ire, enyi kpegban̄ ida n̄a.”
11 Ogwu osat Okumugwem oneninu me ama Ofera, mè inisiki ikweek irek me irak uti mbuban kè Jowas ogwu owot iman kè Abieja. Me ike mgbọ ya, Gidiọn gwun̄ kè Jowas òwa oletbe ikigen̄ akpa me ere ekichimi miin̄ me ere ya, inyi ebi Midian ekamun̄ akpa cha. 12 Ogwu osat Okumugwem onenikana isibi me isi kè Gidiọn me ere ya, mè initumu inyi Gidiọn ibe, “Okumugwem òwa melek kwun̄, owu unye ene òriọọn̄ ukot akọn̄.”
13 Gidiọn ofọfọọk ibe, “Jei ogwu nte, ire Okumugwem ikup melek kiji me atikọ, keke orọ mè otutuuk inu chi inikirọ eji ikeyi? Sà uyeke uyeke inu cha echi ebi nte nte kiji ekpabe inu ofolek inyi eji cha ìkup me owa? Ema ekpa inyi eji ibe ke îre Okumugwem osa ema inan̄a me Ijipiti isibi! Ire ikeya, Okumugwem ìjeje inijit eji itele mgbọ keyi, mè iyaka inikana eji itap me ubọk ebi Midian?”
14 Okumugwem onenikana isi ikweek ọmọ, mè itumu inyi ọmọ ibe, “Sa otutuuk unye òkup owu me emen yi je, mè si nyan̄a ebi Ijeren sibi me ubọk ebi Midian. Îre emi me lek n̄a nkiria owu!”
15 Gidiọn onenifọọk ibe, “Jei Okaan̄-ene, emi m̀bajeje ikọt inyan̄a ebi Ijeren isibi? Owot iman kiji ore eyi òsisiki ichit me otoko kè Manasi, emi si nre ogwu òsisiki ichit me ototun̄ ukan̄ nnan̄abe isibi.”
16 Okumugwem onenibe ọmọ, “Emi mâkup melek kwun̄, owu môgbaan̄ otutuuk ebi Midian itim ikpan̄ isan̄a kubọk ìyaka ire ene ge gaalek.”
17 Gidiọn onenifọọk ibe, “Ire inu n̄a îneme owu me atikọ, jeen̄ emi inu ijejeen̄ eyi mâsabe iriọọn̄ ibe ke îre owu Okumugwem, me atikọ, okitumu ikọ yi melek n̄a. 18 Soso, kaje ìnan̄a me ere yi, kweek ban emi, mè ǹsi ǹsa inyinyi n̄a ǹnu ǹnenyik ǹnyi owu.”
Okumugwem otutumu inyi ọmọ ibe, “Emi mâkup ikikpọ owu mege ire mgbọ owu môkabe.”
19 Gidiọn onenisi uwu kan̄, mè isi itet gwun̄ ebot ge ikpan̄, mè item, mè itọ akọp iko akpa ekọkọk iba mè iba isa irọ fituru kpunube olat me lek, mè iniben anam ya melek fituru ya me emen okwun, melek mun̄ usun̄ me emen otin̄ ibat, isa iniyik inyi ogwu osat Awaji ya me ere îkweekbe irek me irak uti mbuban ya.
20 Ogwu osat Awaji ya onenitumu inyi ọmọ ibe, “Ben anam ya, mè fituru kpunube olat me lek ya yik me inyọn̄ ewuuk keyi, mè ben mun̄ usun̄ ya kana gwook me lek.” Gidiọn orọrọ si ikeya. 21 Ogwu osat Okumugwem osasa otu uti òkup ọmọ me ubọk inyana ichak me lek anam ya mè fituru kpunube olat me lek ya. Mgbọ yaage, ukan̄ ososook isibi me lek ewuuk ya, mè itaka anam ya mè fituru ya ikọọk. Ogwu osat Okumugwem ya oneniniin̄ ichep, kpeyaka imun̄. 22 Mgbọ ya ke Gidiọn oniriọọn̄ ibe ke ogwu ọmọ omun̄be ya ìre ogwu osat Okumugwem. Itataan̄ ukpo itumu ibe, “Jei Okumugwem! Ìre ikeya? Emi nra imun̄ ogwu osat Okumugwem isi mè isi!”
23 Okumugwem onenitumu inyi Gidiọn ibe, “Esuuk ikup inyi owu! Katet ukpook, ke owu òkpokwu.”
24 Gidiọn oneninama ntook ngwugwa me ere ya inyi Okumugwem, mè igwen ntook ya “Okumugwem Ìre Esuuk.” Mege inire cherekeyi, ntook ngwugwa ya ọmọ òwa si okekebe me Ofera, me agan̄ ijọn̄ ebi owot iman kè Abieja.
25 Me eririeen̄ usen yaage, Okumugwem onenitumu inyi Gidiọn ibe, “Tet orie gwun̄ eriembuuk ge me etete eriembuuk kè nte kwun̄, òrere òso orie gwun̄ eriembuuk iba òmimin ichit, òsoso acha jaaba. Si gbugbọ ntook nte kwun̄ onamabe inyi Baali ya gwook, mè fieek uti yọk Asera eyi egwuun̄be me agba lek ntook ya to me ijọn̄. 26 Osigbugbọ isan̄a, nama ntook ngwugwa nyi Okumugwem Awaji kwun̄ me inyọn̄ ibot orioon̄ keyi, me ere ijọn̄ olaakbe, mè sa eriembuuk eyi òso iba òmimin ichit ya gwa ngwugwa ewọwọp iriọk, mè sa uti yọk Asera ofieekbe ito ya sọk ukan̄ wọp ngwugwa ya.”
27 Gidiọn onenigobo akọp ene me etete ebi ikwaan̄ kan̄ igbaalek kan̄, mè inisi irọ otutuuk inu cha ike Okumugwem otemebe ọmọ. Ìrọ inu cha me eririeen̄, ìkare me ikarek, mije îfieekbe owot me lek ebi ototun̄ ukan̄ kiban̄, mè ebirieen̄ ama kiban̄.
28 Me ewelegwe, mgbọ ebirieen̄ ama ya enan̄abe ikeke me ilaak, enenimun̄ ibe ke mîgbugbọ ntook ngwugwa kè Baali igwook, mè ifieek uti Asera òkup me agba lek ntook ya ito me ijọn̄, mè imun̄ si ibe ke mînama ayaya ntook ngwugwa, mè isa eriembuuk eyi òso iba òmimin ichit ya igwa ngwugwa me inyọn̄ ntook ya.
29 Ema ebebene ikidido lek kiban̄ ibe, “Ìre ekene orọ inu yi?”
Mgbọ ema edidobe ikana ama, ebi ene enenitumu inyi ema ibe ke îre Gidiọn gwun̄ kè Jowas orọ inu ya.
30 Ebirieen̄ ama ya enunu initumu inyi Jowas ibe, “San̄a gwun̄ kwun̄ sibi na. Ìbokwukwu, mije, îgwak ntook ngwugwa kè Baali, mè ifieek si uti yọk Asera ito.”
31 Jowas onenifọọk otutuuk ife cha ebi ìje me unaan̄-ejit inu me lek kan̄ ibe, “Ìre enyi ebenibọkọ ikọ ibot kè Baali itumu ni? Sà ìre enyi ebenibọkọ akọn̄ ibot kan̄ itim inyi ọmọ ni? Ene geelek òbọbọkọ akọn̄ ibot kè Baali itim, ebekpakpan̄ ene ya sabum egwe môbowele! Ire Baali ire awaji me atikọ, ọmọ gaalek itim akọn̄ ibot kan̄, mije, îre ntook ngwugwa kan̄ ke egwak.” 32 Me usen ya, ebebene ikigwen Gidiọn “Jerubaali.”a Ema ebe mè Baali itim akọn̄ ibot kan̄ me lek kè Gidiọn, mije Gidiọn ogwakbe ntook ngwugwa kè Baali.
33 Otutuuk ebi Midian, mè ebi Amalek, mè otutuuk ebi ido agan̄ mbum-ura, enenigbaan̄ urum akọn̄ kiban̄ itọbọ, mè inijibi akọn̄ isaba okwaan̄ Jodan, mè isi igwugwuun̄ uwu ọfọ kiban̄ me iteke ijọn̄ Jesereli. 34 Ekwukwu Okumugwem oneninin̄ emen kè Gidiọn. Gidiọn omọmọnọ otita akọn̄ iwut, ebi owot iman kè Abieja esisibi inu inititiin̄ melek kan̄. 35 Iraria si ebi ene isibi ibe esa etip esi elook ekana me otutuuk lek ijọn̄ ebi otoko kè Manasi, ebiba si esisibi inu inititiin̄ melek kan̄. Iraria si etip inyi ebi otoko kè Ase, mè ebi otoko kè Jebulọn, mè ebi otoko kè Nafitali. Ema otutuuk esisibi inu inichichini ọmọ mè ebi melek kan̄.
36 Gidiọn onenitumu inyi Awaji ibe, “Ire owu môsa me ubọk n̄a inyan̄a Ijeren isibi, me atikọ, ike owu ochieekbe use, înwọn ma! 37 Kpọ, mânimọnọ ikpa anam melek inwọọn̄ me lek isi ito me ere igen̄ akpa. Ire mbat irep igwook me lek ikpa anam ya gaalek, mè otutuuk inyọn̄ ijọn̄ ire nchat, mgbọ ya ke mbaniriọọn̄ ibe ke owu môsa me ubọk n̄a inyan̄a Ijeren isibi me atikọ, ike owu otumube.” 38 Inu ya orọrọ iso ikeya, kpesan̄a, kpetap. Me ofit iwele kan̄, mgbọ Gidiọn obolobe chieen̄ me ata otu ewelegwe, imumun̄ ikpa anam ya orekebe idek. Inenichimi mun̄ mbat ya òkup me lek, mun̄ ya ojojot okwa ge.
39 Gidiọn onenikpọk ibeek Awaji ibe, “Soso, kanaan̄ ejit me lek n̄a. Kaduk, soso, tele mè m̀beek mbeek ge gaalek m̀gbaalek, mè m̀kpọk ǹtọ inu yi m̀kpọ me lek ikpa anam yi. Eyi mgbọ keyi, soso, rọ inyi ikpa anam yi gaalek ichat, ire, mè mbat igwook ikana me otutuuk inyọn̄ ijọn̄.” 40 Awaji orọrọ si ikeya me eririeen̄ usen ya. Ikpa anam ya gaalek ochat. Ire, mbat orereke otutuuk inyọn̄ ijọn̄ ere ya ikat ikana.