2 Gidiọn ofọfọọk ema ibe, “Ìre keke ke nrọ, eyi ebesa itọ me lek ikpele inu cha enyi erọbe? Ìre ten̄eten̄e mfut gerep enyi ebi otoko kè Iferem egbemebe isik me uko gerep kinyi ìkafat ìwa ìgak otutuuk mfut gerep eji ebi owot iman kè Abieja egbemebe me otutuuk uko gerep kiji? 3 Îre enyi ke Awaji okana Orep mè Jebu, ebi isi akọn̄ Midian, itap me ubọk ibe ekpan̄. Keke ke emi nkọt irọ, eyi mêsabe itọ me lek inu enyi erọbe?” Mije ikọ chi Gidiọn otumube, unaan̄-ejit kiban̄ me lek kan̄ onenisiki.

4 Ubọk geelek lek kè Gidiọn mè efit ebi akọn̄ ita melek kan̄ cha owọbe, efuuk ìkata ema me emen, ema etetet lek inye ikisa akọn̄ igọọk ebi Midian mege isi ire okwaan̄ Jodan, mè isaba itoon̄. 5 Mgbọ ema erebe Sukot, Gidiọn onenitumu inyi ebi ama ya ibe, “Ìnye lek ìweek sọn̄ owut fituru inen mè inen ìnyi ebi n̄a esa etet owot, ke lek îwọ ema enenen. Ire emi, m̀bagọgọọk Jeba mè Jalimuna, ebi ubọọn̄ Midian, mege isi ire okputut.”

6 Ire, ebi ibot ama Sukot efọfọọk ọmọ ibe, “Òkatetet Jeba mè Jalimuna ìre ubọk-nu. Eji ebejeje inyi ebi akọn̄ kwun̄ inorie?”

7 Gidiọn obebe ema, “Ire ikeya, înwọn ma! Okumugwem isikana Jeba mè Jalimuna itap emi me ubọk, mgbọ ya m̀basa ukpak mè ukan̄-oron emen èwê isut enyi akpalek ibak isan̄a.”

8 Gidiọn oneninan̄a ije isi ire Penien, mè ibeek si ebi ama ya mbeek yaage îbeekbe me ubọk ebi Sukot. Ema si efọfọọk ọmọ ike ebi Sukot efọọkbe. 9 Itutumu inyi ebi Penien ibe, “Nsitim ikpan̄, mè ika me utelelek, m̀bagbugbugbọ uwu-oket kinyi yi ito me ijọn̄.”

10 Me ike mgbọ ya, Jeba mè Jalimuna ekup me ama Kakọ, ema melek akọp mè obop ene go, ebi akọn̄ kiban̄, òrere ebi ìsisik me lek otutuuk urum ebi akọn̄ cha ìnan̄a me ido agan̄ mbum-ura. Efit mè akọp obop ene iba mîkwaan̄ inin̄ me akọn̄ ya, otutuuk kiban̄ ebi ìrọriọọn̄ ifiala oge akọn̄. 11 Gidiọn onenije inene ikana me lek oniin̄ eyi ebi ije ebi ìkiluk me uwu ọfọ ekije, eyi òkup me agan̄ mbum-ura me lek ama Noba mè ama Jogibeya, mè inijibi akọn̄ inin̄ lek orieen̄ akọn̄ ebi Midian cha me uwuuk-lek. 12 Ebi ubọọn̄ Midian iba cha elilim. Ire, Gidiọn ogọgọọk ema, mè itet ema ene iba cha. Otutuuk ebi akọn̄ kiban̄ eyiyiyala isan̄a kpai.

13 Gidiọn gwun̄ kè Jowas onenigwu ikom inan̄a me isi akọn̄ ya ikije me oniin̄ utibi ogoon̄ ekigwen Eres ikika. 14 Inenichichini gwun̄ enerieen̄ ge, ogwu Sukot me oniin̄, mè itet ido ikọ. Gwun̄ enerieen̄ ya ogege erieen̄ ebi ibot ama Sukot mè ebi ugane ama ya, akọp ebirieen̄ jaaba mè jaaba, itap me ikpa isa inyi Gidiọn. 15 Gidiọn oneninu me lek ebi ama Sukot, mè itumu inyi ema ibe, “Kpọ Jeba mè Jalimuna ire ebi, ebi enyi esabe ikirọ emi inu ochak ibe, ‘Òkatetet Jeba mè Jalimuna ìre ubọk nu. Eji ebejeje inyi ebi akọn̄ kwun̄ cha lek owọbe inorie?’ ” 16 Gidiọn osasa ukpak mè ukan̄-oron emen èwê isut ebi ugane ama Sukot ijat akpa, mè isa me ikeya ijeen̄ ema inu. 17 Inenisi me lek uwu-oket òkup me ama Penien, mè igbugbọ igwook me ijọn̄, mè ikpan̄ si otutuuk ebirieen̄ ama ya isan̄a.

18 Gidiọn onenido Jeba mè Jalimuna ibe, “Ìre ebirieen̄ cha ebi enyi ekpan̄be me Tabọ ekukup?”

Ema efọfọọk ibe, “Ebirieen̄ cha ebet lek kwun̄. Ene geelek me etete kiban̄ ìbet lek gwun̄ ogwu ubọọn̄.”

19 Gidiọn ofọfọọk ema ibe, “Ife cha ìre ebi ngwan̄ n̄a, mè ire si bọn uga ge melek n̄a. Kè lek ugwem Okumugwem, mebe ke enyi mîtele ema, kpekpan̄, emi si kè ǹtele enyi, kpamakpan̄ enyi.” 20 Gidiọn oneninyi Jeteri, gwun̄ kan̄ ogwu òrere ugane ichit, ida ibe, “Cho ife chi fiin̄!” Ire, ukpook otetet Jeteri. Ìkawọọk oge akọn̄ kan̄ ìsibi. Mije, ọmọ ìre sọntiik gwun̄.

21 Jeba mè Jalimuna enenibe Gidiọn, “Kayaka ìfiat mgbọ! Owu gaalek na sa ubọk kwun̄ kpan̄ eji. Enerieen̄ isimin inin̄ ene, îra ikaan̄ unye.” Gidiọn ojeje inin̄ ema lek, mè ikpan̄ ema, mè isan̄a inu ema ejeen̄be me ebek aligọ kiban̄ ikisa ibala anam cha, isa ifo.

22 Ebi Ijeren enenititiin̄, mè inibe Gidiọn, “Kana ogwu mkpulu nyi eji, owu melek gwun̄ kwun̄ enerieen̄, mè gwun̄ gwun̄ kwun̄, mije, owu onyan̄a eji isibi me ubọk ebi Midian.”

23 Gidiọn ofọfọọk ema ibe, “In̄-in̄, emi m̀kpakana ogwu mkpulu kinyi, gwun̄ n̄a si ìkpore ogwu mkpulu kinyi. Okumugwem obore ogwu mkpulu kinyi.” 24 Gidiọn onenibe ema, “Nkaan̄ inu ge mbado me ubọk kinyi. Me lek otutuuk inu enyi efumbe me akọn̄, ene geelek me etete kinyi inyi emi mkputọn̄ ge.” (Ebi Isimen kpekilọlọ itatap mkputọn̄ alata araran̄, eya ìre orọmijọn̄ kiban̄.)

25 Ema enenifọọk ọmọ ibe, “Eya ìkayọt, eji mênyi owu!” Ema eneniwele ekwut me ijọn̄. Ogwu ikup, òsan̄a mkputọn̄ ge òtọp otoon̄ me inyọn̄ ekwut ya. 26 Otutuuk mkputọn̄ alata araran̄ cha Gidiọn obọkọbe me usen ya îlobo iso akọp mè kilo onaan̄ge mè okpọkọ. Mînyi ọmọ si owuwa inu unye otu ewe ekisa ibala lek, mè owuwa asi ebek, mè owuwa ekwut irio irio echi ebi ubọọn̄ iba ebi Midian cha esabe ibala lek, mè asi ebek ejeen̄be me ebek aligọ kiban̄ igbaalek. 27 Gidiọn onenisa alata araran̄ cha irọ mgbidim ofọnti ikwaan̄ ebi ngwugwa, mè iben isun̄ me Ofera, ama kiban̄. Me ikafiin̄ge mgbọ, otutuuk ebi Ijeren ejijit Awaji itele, mè ikana igọọk mgbidim ofọnti ikwaan̄ ebi ngwugwa ya, mè isi ikitọbọ ebum inyi. Inu ya onenikana ufe isa inyi Gidiọn mè ototun̄ ukan̄ kan̄.

28 Sa me ikeya ke ebi Ijeren etim ikpan̄ ebi Midian. Ebi Midian kpeyaka ikọt ibene isi ofifi. Ebi Ijeren ekukup me esuuk akọp acha ini, me ukot kè Gidiọn.

29 Gidiọn, òrere si Jerubaali, gwun̄ kè Jowas onenifo uwu kan̄ isi iluk ibia. 30 Gidiọn ìbon akọp ibot bọn ebirieen̄ jaaba, mije, îkaan̄ owuwa nwa. 31 Ogwu ugan kan̄ ogwu Sekem îman si ibot gwun̄ enerieen̄ ge inyi, igwegwen gwun̄ ya Abimelek. 32 Gidiọn gwun̄ kè Jowas onenikan ijaan̄ lek, mè irie ugwem kan̄ ijot, mè inikwu. Efufuun̄ ọmọ me udọn̄-ufuun̄ ogwu ute, Jowas, me Ofera òkup me agan̄ ijọn̄ ebi owot iman kè Abieja.

33 Gidiọn ikwukwu iraka, ebi Ijeren ekpọkpọk itele Awaji kiban̄, mè isi ikitọbọ ebum inyi ebi kè Baali. Ema enenirọ mkpọmfaka Baali-Berit isa irọ awaji kiban̄. 34 Ebi Ijeren kpeyaka ikeek Okumugwem Awaji kiban̄, ogwu ònyanyan̄a ema isibi me ubọk otutuuk ebi ochicha kiban̄, me agan̄ geelek. 35 Ema kpeyaka ikikaan̄ ata ejit me lek ebi ototun̄ ukan̄ kè Jerubaali, òrere Gidiọn, me lek otutuuk ata inu cha Gidiọn orọbe inyi ema.