Ebi Sekem mîrọ Abimelek ogwu ubọọn̄ Ijeren
9
Abimelek, gwun̄ kè Gidiọn, òrere Jerubaali, oneninan̄a ije isi lek ebi ngwan̄ ogwu uga me Sekem, mè initumu inyi ema mè otutuuk ebi owot iman ya, ibe, 2 “Ìdo otutuuk ebi Sekem ibe ikeyi, ‘Ìre eyi owa onwọn enyi me lek? Ìre enyi eweek ibe otutuuk akọp ibot bọn ebirieen̄ jaaba kè Jerubaali ekpulu enyi, sà ìre enyi eweek ibe ene ge gaalek ikpulu enyi?’ Ògak ge, ikawuuk ibe ke emi ìre akpalek ge mè eje ge melek kinyi!”3 Mgbọ ebi ngwan̄ nga kè Abimelek ekpabe otutuuk inu chi inyi ebi Sekem, otutuuk ene etutumu ifieek ibe ke ema eweek Abimelek, mije Abimelek orebe ngwan̄ kiban̄. 4 Ema enenimọnọ akọp ikpoko alata okuket jaaba me isi mkpọmfaka Baali-Berit inyi Abimelek. Abimelek onenisa ikpoko cha ikpe me ọkọ inyi ebirieen̄ ebi ìkirọ inu afa afa, inyi enekana ebi udun̄ kan̄. 5 Usen ge, Abimelek onenisi Ofera, ama ogwu ute, mè ikpan̄ bọn nte kan̄ cha, ìrere bọn kè Jerubaali, akọp ene jaaba, isan̄a me inyọn̄ ewuuk ge gaalek. Ire, Jotam, ogwu òrere ijija ichit me lek bọn kè Jerubaali, olilibi ilet, mè inwọnọ. 6 Otutuuk ebi Sekem mè ebi Bet Milo enenisi ititiin̄ me agba lek ikpele uti mbuban òkup iriaak atà òkup me Sekem, mè inirọ Abimelek ubọọn̄ me ere ya.
7 Mgbọ Jotam onọbe inu yi, inenene isi inyọn̄ ibot ogoon̄ Gerijim, mè ikup me ere ya ikitaan̄ ukpo ikitumu inyi ema ibe, “Enyi ebi ama Sekem, ìgban̄ ida n̄a, inyi Awaji igban̄ si ida kinyi. 8 Usen ge, ebi kè uti eninan̄a isi ibesi isan̄a ubọọn̄ òbokikpulu ema. Ema enenitumu inyi uti olifu ibe, ‘Kana ogwu ubọọn̄ nyi eji!’
9 “Uti olifu ofọfọọk ibe, ‘Ìre enyi ebe emi ǹtele aran̄ eyi nkinyi, eyi ekisa imin ebi kè awaji, melek ebilene, mè ǹnenkenwuwum ubọk ǹtọ ikọ ǹnyi ebi kè uti ni?’
10 “Ebi kè uti cha enenitumu inyi uti figi ibe, ‘Na kana ogwu ubọọn̄ nyi eji!’
11 “Uti figi ofọfọọk ibe, ‘Ìre enyi ebe emi ǹtele ata utop utop mfut nkito, mè ǹnenkenwuwum ubọk ǹtọ ikọ ǹnyi ebi kè uti ni?’
12 “Ebi kè uti cha enenitumu inyi olik gerep ibe, ‘Na kana ogwu ubọọn̄ nyi eji!’
13 “Olik gerep ofọfọọk ibe, ‘Ìre enyi ebe emi ǹtele isasan̄a miin̄, eyi òkibele ejit ebi kè awaji melek ebilene, mè ǹnenkenwuwum ubọk ǹtọ ikọ ǹnyi ebi kè uti ni?’
14 “Otutuuk ebi kè uti cha enenitumu inyi ukpak ibe, ‘Owu na kana ogwu ubọọn̄ nyi eji.’
15 “Ukpak otutumu inyi ebi kè uti ibe, ‘Ire me atikọ, ke enyi mîweek irọrọ emi ubọọn̄ kinyi, ìna ìnirak ibot me irak n̄a, inyi enyi ekaan̄ okwukwek. Ire enyi kpechieek ikeya, ukan̄ môseme inan̄a me lek ukpak, mè itaka otutuuk ilip Lebanọn cha ikọọk!’ ”
16 Jotam otutumu si ibe, “Me emen inu chi enyi erọbe, eyi enyi esabe Abimelek irọ ubọọn̄, ìre enyi mîrọ atikọ mè unen eru? Ìre enyi mîrọ inu òtatat me lek kè Jerubaali mè ototun̄ ukan̄ kan̄? Sà ìre enyi mîrọ nte n̄a inu ògbegbe igọọk me inu ọmọ orọbe? 17 Ikawuuk ibe ke nte n̄a ìtim akọn̄ ibot kinyi, mè inyan̄a enyi isibi me ubọk ebi Midian, ìkasa ugwem kan̄ ìgwen inu geege. 18 Ire, me cherekeyi, enyi mînan̄a ikeke irọ ikeme uwu nte n̄a, mè itet ebi bọn, akọp ene jaaba, ikpan̄ me inyọn̄ ewuuk ge gaalek, mè imọnọ Abimelek, gwun̄ ogwu usun̄ kan̄ enenwaan̄ isa irọ ubọọn̄ òbokikpulu ebi ama Sekem, mije îrebe ngwan̄ kinyi. 19 Chereyi, ire enyi mîrọ atikọ mè unen eru me lek kè Jerubaali mè ototun̄ ukan̄ kan̄, kè Abimelek inyi enyi ubelejit, mè enyi si enyi ọmọ ubelejit. 20 Ire, ire ìkare ikeya, kè ukan̄ inan̄a me lek kè Abimelek itaka ebi ama Sekem mè ebi ama Bet Milo, mè ukan̄ inan̄a si me lek ebi ama Sekem mè ebi ama Bet Milo itaka Abimelek!”
21 Jotam olilibi inan̄a me ere ya isi Bie, mè isi iluk ibia me ere keya, mije îfieek owot enenen me lek ogwu ngwan̄, Abimelek.
22 Abimelek okpukpulu ido Ijeren acha ita. 23 Awaji onenitap ochicha-chieen̄a me etete kè Abimelek melek ebi ama Sekem. Ema ebebene ikikpaka ibot inyi Abimelek. 24 Awaji ìrọ inu yi, inyi ọmọ isa me ikeya isan̄a useen̄ akọp ebirieen̄ jaaba, bọn kè Jerubaali cha, ebi Abimelek okpan̄be me afa, mè ido si useen̄ eje ya me ubọk ebi ama Sekem, ebi ìrọrọ ọmọ inye ibe ikpan̄ ebi ngwan̄ cha. 25 Ebi ama Sekem enenije ikeme Abimelek, mè iniria ebi ene ibe esi elileek me inyọn̄ ogoon̄ etet ọmọ. Ife cha ekekitet ebi geelek ìbenije iraka, mè ikibọkọ inu geelek ekaan̄be. Ukpatu inu ya osisi ire utọn̄ kè Abimelek.
26 Gali gwun̄ kè Ebedi, mè ebi ngwan̄ ebirieen̄, eneninu iniluk me Sekem, ebi Sekem emumun̄ ọmọ kubọk ogwu ebekọt itet ubọk me lek isa irọ inu. 27 Mgbọ ekirọkọ uko, ebi Sekem enenisi uko gerep kiban̄, mè igbeme mfut gerep, mè isa irọ miin̄, mè ito ijọk me uwu awaji kiban̄. Ema ekukup me ere ya ikirie inorie, mè ikinwọ miin̄, mè ikigbo Abimelek. 28 Gali gwun̄ kè Ebedi onenitumu ibe, “Abimelek ìre ekene? Keke ke eji ebi Sekem ekaan̄ melek kan̄, eyi eji ekisiki ibot ikisi ikwaan̄ inyi ọmọ? Ìre Abimelek ìkafat ìre gwun̄ kè Jerubaali? Ìre ìkare Jebun ore ogwu uriaak kan̄? Ìsiki ibot ìnyi bọn owot iman kè Amoru nte kè Sekem! Ìre keke orọ eji ekisiki ibot inyi Abimelek mọnọ? 29 Mebe ke emi nre ogwu ibot ife chi, kè ǹsan̄a Abimelek ǹsan̄a! Kè m̀be ọmọ, sa otutuuk ebi akọn̄ kwun̄ sibi na, na kpọ!” 30 Mgbọ Jebun ogwu òkikpulu ama ya onọbe inu Gali gwun̄ kè Ebedi otumube, inanaan̄ ejit enenen. 31 Ineninween̄ lek iria etip ijet Abimelek me Arumab ibe ikeyi, “Gali gwun̄ kè Ebedi mè ebi ngwan̄ mînan̄a inu Sekem, mè inikitumu ejit ebi ene ifiat me lek kwun̄. 32 Eya orọ, me eririeen̄, sibi na, owu mè ebi akọn̄ melek kwun̄, mè ìnilileek me emen oron. 33 Egwe isiwele, mè ura isibum, ìjibi akọn̄ ìnin̄ ama yi me uwuuk-lek. Sabum Gali mè ebi melek kan̄ menibe ema etitiin̄ lek, mè esibi enekweek owu, ìtim ema akọn̄ me lek, mè ìrọ ema inu ike efuuk kinyi okọtbe.”
34 Abimelek onenije me eririeen̄ inire Sekem, ọmọ mè otutuuk ebi akọn̄ melek kan̄, mè iniche ebi kan̄ irek ini, mè inween̄ lek itaak ema ikana oron òkup igbet ama ya, ema elilileek. 35 Gali gwun̄ kè Ebedi oneninan̄a isibi inu inikeke me otunchit ama me otu ewelegwe ya. Abimelek mè ebi akọn̄ kan̄ ekekinan̄a me ere ema elileekbe isibi, ibenibum inin̄ ama.
36 Gali omumun̄ ema, mè isi itumu inyi Jebun ibe, “Na si kpọ! Ebi ife ge mêkigbuku inan̄a me inyọn̄ ogoon̄ isibi inu!”
Jebun ofọfọọk ibe, “Ìbore ogugo ogoon̄ òje me chieen̄ ura ke owu okimun̄ kubọk ebi ene.”
37 Ire, Gali okpọkpọk itumu si ibe, “Na kpọ! Îre ebi ene ekinu. Ebi ukpa ge ekinan̄a me agan̄ etete iba ijọn̄ inu, sà ebi ukpa ge ekinan̄a me agan̄ uti mbuban ebi ìtet ǹcha inu.”
38 Jebun onenitumu inyi Gali ibe, “Mgbọ keyi, otu ile kwun̄ ya ye? Owu ogwu mgbọ òkitumu ibe, ‘Abimelek ìre ekene, ogwu eji ebekisiki ibot inyi?’ Kpọ ebi mgbọ okitiik cha ire ebi! Nan̄a sibi si tim akọn̄ me lek kiban̄!”
39 Gali osasa ebi Sekem inan̄a isibi isi itim akọn̄ me lek kè Abimelek. 40 Abimelek olililaba ema mege isi igwook me otunchit ama, owuwa kiban̄ erururọn̄ọ ililam ijot ijọn̄ mè unan me lek. 41 Abimelek obabia me Aruma, Jebun orerieen̄ Gali mè ebi ngwan̄ isibi me Sekem.
42 Me ofit iwele kan̄, ebi ama Sekem enanan̄a isibi isi uko kiban̄, etip osisi ilook Abimelek. 43 Abimelek obebem lek, mè iche ebi akọn̄ kan̄ irek ita, ema esisi ilileek me emen oron ikikpọ ebi ama Sekem. Mgbọ Abimelek omun̄be ife cha ekinan̄a me ama isibi, ọmọ mè ebi akọn̄ kan̄ enanan̄a isibi, mè itim akọn̄ me lek kiban̄. 44 Abimelek mè ukpa ebi akọn̄ ìkup melek kan̄ efefieek ikana ifo agan̄ isi, mè isi ikeke me otunchit ama ya. Ukpa ebi akọn̄ iba kechilọ elilibi inin̄ lek ebi ìkup me uko cha, mè ikpan̄ ema otutuuk isan̄a. 45 Abimelek otitim akọn̄ me lek ama ya otuuk usen ya, mè ibọkọ ama ya, mè ikpan̄ otutuuk ebi ama ya isan̄a, mè igwak ama ya igwook, mè ikpulu uchi igwook ichit otutuuk ijọn̄ ama ya.
46 Mgbọ ebi isi ene me ama ya, ebi ìkikup me emen uwu-oket ama Sekem, enọbe inu ya òrọrọ, otutuuk kiban̄ elilim isi ilileek me emen okwukwek akọn̄ òkup me uwu awaji Eli-Berit.c 47 Mgbọ Abimelek onọbe ibe ke ife cha mîsi ititiin̄ me ere ya, 48 isasa otutuuk ebi akọn̄ kan̄ igbaalek inene ogoon̄ Jalimon, mè isa otuban isọp agọọk uti me ere ya, mè iben itoon̄ me oguga kan̄, mè ibe ebi akọn̄ kan̄, “Inu geelek enyi emun̄be emi nrọbe, enyi ìrọ si ikeya! Ìgwat lek!” 49 Ikeya si ke otutuuk ebi kan̄ esọp agọọk uti echi kiban̄, mè iben isa igọọk Abimelek. Mgbọ ema ejebe ire ere ife cha etitiin̄be me ere okwukwek akọn̄ ya, ema egwogwook agọọk cha me otu ere ya, mè ichim ukan̄ itap me ere ya. Otutuuk ebi ìtitiin̄ me uwu-oket ama Sekem ekwakwaan̄ ita kpai, ema mîso obop ene, ebirieen̄ mè ebibaan̄.
50 Abimelek onenijibi si akọn̄ isi ama Tebes, mè irieen̄ akọn̄ me agba lek ama ya, mè ibọkọ ama ya. 51 Îkaan̄ unye uwu-oket akọn̄ ge òkup me emen ama Tebes ya. Otutuuk ebi ama ya, ebirieen̄ mè ebibaan̄, elilim isi inin̄ emen uwu-oket ya, mè igon isotu ikwek lek kiban̄, mè inene isi ikup me inyọn̄ otoon̄-uwu uwu-oket ya. 52 Abimelek mè ebi kan̄ enenire lek uwu-oket ya, mè ikitim akọn̄ me lek. Ire, mgbọ Abimelek ojebe ire lek isotu otunchit uwu-oket ya, mè ibotap ukan̄ me lek, 53 ogwu enenwaan̄ ge òkup me inyọn̄ uwu-oket ya otọtọp ewuuk ikọk-akpa agan̄ inyọn̄ itoon̄ me ibot kè Abimelek, ibot kan̄ obubum.
54 Mgbọ yaage, Abimelek ogwegwen gwun̄ enerieen̄ òkiben nroon̄ akọn̄ kan̄, mè itumu inyi ibe, “Wọọk oge akọn̄ kwun̄ sa kep emi kpan̄, inyi ekabe ke îre enenwaan̄ ikike okpan̄ emi.” Ogwu ikwaan̄ kan̄ ya osasa oge akọn̄ kan̄ ichim Abimelek itibi, ikwukwu. 55 Mgbọ ebi Ijeren emun̄be ibe ke Abimelek îkwu, ema eyiyiyala ifon uwu kiban̄ me ge me ge.
56 Ikeyi ke Awaji osa ikpe Abimelek useen̄ inu ikpak îrọbe ogwu ute, eyi îkpan̄be akọp ebirieen̄ jaaba ebi ngwan̄ kan̄ gaalek. 57 Ubọk yaage si, Awaji okpekpe si ebi Sekem useen̄ inu ikpak ema erọbe. Sa me ikeya, ufieek-otu eyi Jotam, gwun̄ kè Jerubaali, ofieekbe inyi ema, onenirọ iso me lek kiban̄.