Tola îkana ogwu ibot oyerebet
10
Mgbọ ukot kè Abimelek orakabe, ofifi enerieen̄ ge ekigwen Tola, gwun̄ kè Puwa, gwun̄ kè Dodo, oneninan̄a isibi ininyan̄a ebi Ijeren isibi. Ọmọ ìre ogwu otoko kè Isaka òkiluk me ama Samiri me inyọn̄ ijọn̄ ogoon̄ ogoon̄ otoko kè Iferem. 2 Tola onenikpulu ebi Ijeren akọp acha iba mè ita, mè inikwu. Efufuun̄ ọmọ me Samiri.Jairi îkana ogwu ibot oyerebet me Ijeren
3 Mgbọ ukot kè Tola orakabe, Jairi ogwu Giliadi oneninan̄a isibi, mè inikpulu Ijeren akọp acha iba mè iba. 4 Jairi ìkaan̄ akọp ibot ebirieen̄ ita, ebi ìkikọp me inyọn̄ akọp inyinya akpan ita, mè ikikpulu akọp ama ita me Giliadi. Ekigwen ama chi Asabọn Ama kè Jairi mege inire chereyi. 5 Jairi onenikwu, efufuun̄ ọmọ me Kamọn.
Ebi Amọn mîtutuku ebi Ijeren
6 Ebi Ijeren enenikpọk ibene ikirọ ijo inu me chieen̄ Okumugwem. Ema ebebene ikitọbọ ebum inyi ebi kè Baali melek ebi kè Asitoret, mè ebi kè awaji ebi Aram, mè echi ebi Sidọn, mè echi ebi Mowabu, mè echi ebi Amọn, mè echi ebi Filisia. Ema ejijit Okumugwem, kpeyaka ikitọbọ ebum inyi. 7 Okumugwem onanaan̄ ejit me lek ebi Ijeren, mè iyaka ema itap me ubọk ebi Filisia, mè ubọk ebi Amọn. 8 Ife chi mîsisaak ebi Ijeren, mè itutuku ema me acha ya. Otuuk kè akọp mè acha jeeta ke ema etutuku ebi Ijeren ebi ìkiluk me agan̄ Giliadi, me inyọn̄ ijọn̄ ebi Amọ me usaba okwaan̄ Jodan, me agan̄ mbum-ura. 9 Ebi Amọn enenisaba okwaan̄ Jodan isi itim akọn̄ me lek ebi otoko kè Juda, mè ebi otoko kè Benjamin, mè ebi otoko kè Iferem. Ebi Ijeren emumun̄ ujaralek òmimin enenen. 10 Ebi Ijeren enenitaan̄ ukpo ito ito igwen Okumugwem ibe, “Eji mîrọ owu ijo inu! Eji mîtele owu, Awaji kiji, mè ikisi itọbọ ebum inyi ebi kè Baali.”
11 Okumugwem onenifọọk ema ibe, “Ìre ìkare emi nnyan̄a enyi isibi me ubọk ebi Ijipiti, mè ebi Amọ, mè ebi Amọn, mè ebi Filisia, 12 mè ebi Sidọn, mè ebi Amalek, mè ebi Mayon? Mgbọ ebi ife chi etutukube enyi, enyi etoto ito igwen emi, ìre ǹkanyan̄a enyi ìsibi me ubọk kiban̄? 13 Ire, enyi enenikat ejit ijit emi, mè ikisi itọbọ ebum inyi ofifi awaji cha. Eya orọ, emi m̀kpayaka ikpọk inyan̄a enyi isibi kubọk ge. 14 Ìsi lek awaji cha enyi egobobe inyi lek kinyi, mè ìto ito ìgwen ema, inyi ema enu enenyan̄a enyi esibi me mgbọ ufialek kinyi!”
15 Ire, ebi Ijeren eneniriaak Okumugwem ibe, “Iin̄, eji mîrọ ijo inu. Ikaan̄ inu okeekbe ibe ke îgbe irọrọ eji, rọ. Ire, me cherekeyi, soso nyan̄a eji sibi me ubọk ebi ochicha kiji.” 16 Ema esasan̄a otutuuk awaji ebi ofifi ido cha òkup me etete kiban̄ ifiin̄, mè inikitọbọ ebum inyi Okumugwem. Ufialek ebi Ijeren ekupbe me emen onenisisaak Okumugwem enenen, ire lek, ìkayaka ìkọt ìme.
17 Usen ge, ebi akọn̄ Amọn enenibem lek akọn̄, mè inisi irieen̄ akọn̄ me Giliadi. Ebi Ijeren ererieen̄ si akọn̄ eyi kiban̄ me Mijipa. 18 Ebi ibot Giliadi enenikitumu me etete kiban̄ ibe, “Ìre ekene ene obokọt ije me isi isa eji isi itim akọn̄ me lek ebi Amọn? Ene geelek òkakat ejit ije me isi akọn̄ yi, ọmọ obokana ogwu ibot inyi otutuuk ebi ìluk me Giliadi!”