Jefita îkana ogwu ibot oyerebet me Ijeren
11
Me mgbọ ya, îkaan̄ ogwu enerieen̄ ge ogwu Giliadi, ekigwen Jefita. Jefita ìre atalek ogwu usọ akọn̄ òkwakwaak chieen̄. Ogwu ute ìre Giliadi, sà ogwu uga ore enenwaan̄ òje oyet. 2 Nwa kè Giliadi îmaan̄ si owuwa bọn ebirieen̄. Mgbọ bọn ebirieen̄ chi emiin̄be inin̄ ene, ema ererieen̄ Jefita isibi me etete kiban̄, mè itumu inyi ibe, “Owu òkakaan̄ uche geege me lek ìrot uwu nte kiji, mije, owu ìre gwun̄ ugan.” 3 Jefita olilibi inan̄a me etete ebi ngwan̄, mè isi iluk me agan̄ ijọn̄ Tobu. Me ere ya, owuwa nsabọn irieen̄ unye-ibot ebi kpekaan̄ ubọk ikwaan̄, eneniriọọn̄ ọmọ, mè inigọọk ọmọ ikigbaan̄ ije.4 Me emen mgbọ ya, ebi Amọn enenibene akọn̄ me lek ebi Ijeren. 5 Mgbọ akọn̄ ya okije inyi isi, ebi ugane Giliadi eneninan̄a ije isi agan̄ ijọn̄ Tobu isi igwen Jefita ibe, 6 “Na, na kana ogwu isi akọn̄ nyi eji, inyi eji ekọt etim akọn̄ me lek ebi Amọn.”
7 Jefita obebe ema, “Ìkafat ìre enyi kechi echa emi, mè irieen̄ emi isibi me uwu kè nte n̄a gaalek? Enyi ejeje iniweek emi me mgbọ keyi eyi enyi ekupbe me ufialek?”
8 Ebi ugane cha efọfọọk ọmọ ibe, “Ubọk geelek si, eji mîkana inu me lek kwun̄ mgbọ keyi. Na na gọọk eji si tim akọn̄ me lek ebi Amọn, ke owu môkana ogwu ibot inyi otutuuk ebi ìluk me Giliadi.”
9 Jefita ofọfọọk ema ibe, “Ire enyi inisa emi igwu ikom ifo, nnenigọọk enyi isi akọn̄ ya, Okumugwem onenitap ubọk inyi emi ǹtim m̀kpan̄ ebi Amọn, ìre emi mâkana ogwu ibot inyi enyi me atikọ?”a
10 Ebi ibot Giliadi ebebe ọmọ, “Ike owu otumube, ikeya ke eji eberọ! Okumugwem ore ogwu ata-ikọ inyi eji isi mè udun̄.” 11 Jefita onenigọọk ebi ugane Giliadi cha ika inu ama. Ebi ama erọrọ ọmọ ogwu ibot, mè irọ si ọmọ ogwu isi akọn̄ kiban̄. Me Mijipa, Jefita onenikpọk itumu ikọ cha îtumube melek ebi ugane cha isibi me isi Okumugwem.
12 Jefita oneniria osat isi lek ogwu ubọọn̄ ebi Amọn ibe, “Ìre emi melek kwun̄ ekinyinyan̄a keke, eyi owu onube initim akọn̄ me lek ijọn̄ n̄a?”
13 Ogwu ubọọn̄ ebi Amọn otutumu inyi ebi osat cha ibe esi elook Jefita ibe, “Mgbọ ebi Ijeren enan̄abe me Ijipiti isibi ikinu, ema mîbọkọ otutuuk ijọn̄ n̄a ibene me lek okwaan̄ Anọn ire lek okwaan̄ Jabọk, mè ibọkọ mege isi ire lek okwaan̄ Jodan. Ire, mgbọ keyi, yaka otutuuk ijọn̄ ya nyi emi me esuuk.”
14 Jefita onenikpọk iria osat ibe esi elook ogwu ubọọn̄ Amọn ibe ikeyi:
15 “Jefita ìbe eji enetumu enyi owu ibe: Ebi Ijeren kpebọkọ ijọn̄ ebi Mowabu, kpebọbọkọ si ijọn̄ ebi Amọn. 16 Mgbọ ebi Ijeren ekinan̄a isibi me Ijipiti, ema eje agan̄ oniin̄ emen èwê, mè itibi isi ire lek okwaan̄ Anyiaan̄, mè ije ikeya isi ire Kades. 17 Me ere ya ke ema eria osat isi lek ogwu ubọọn̄ Edọm, ibe esi ebeek ibe inye lek itele mè ema eje etibi ido kè ogwugwu. Ire, ogwu ubọọn̄ Edọm ìkachieek. Ikeya si ke ebi Ijeren eria osat isi lek ogwu ubọọn̄ Mowabu, ogwugwa si ojijit, ìkachieek. Mije keya, ebi Ijeren ebabia me Kades.
18 “Mgbọ ebi Ijeren ebenebe ije, esi ije itibi emen èwê, mè isi ikat ikana okike ijọn̄ ebi Edọm, mè okike ijọn̄ ebi Mowabu, mè ije mege isi ire agan̄ mbum-ura ido Mowabu, mè inigwugwuun̄ uwu ọfọ kiban̄ me usaba okwaan̄ Anọn ikup itap efuuk. Ire, kpesaba okwaan̄ ya, mije, okwaan̄ ya ore oke ijọn̄ ebi Mowabu.
19 “Ebi Ijeren eneniria osat isi lek kè Siyon, ogwu ubọọn̄ ebi Amọ òkup me Esibon ikikpulu, ibe inye lek ichieek ibe ema eneje etibi ido kè ogwugwu, mè eraka esi ere ema ebesi. 20 Ire, Siyon ìkatoon̄ ebi Ijeren ejit me lek, ìkachieek ibe ema eje etibi eraka me inyọn̄ ijọn̄ kan̄. Kpan̄asi ikeya, ibebem lek akọn̄, mè ikpulu otutuuk ebi akọn̄ kan̄ isa isibi inu me Jayas inirieen̄ akọn̄, mè itim akọn̄ me lek ebi Ijeren.
21 “Okumugwem, Awaji ebi Ijeren onenikana Siyon mè otutuuk ebi kan̄ itap me ubọk ebi Ijeren, ebi Ijeren etitim ikpan̄ ema, mè ibọkọ otutuuk ijọn̄ ebi Amọ ìluk me agan̄ ya. 22 Ebi Ijeren mîbọkọ otutuuk ijọn̄ kiban̄ ibene me lek okwaan̄ Anọn mege isi ire lek okwaan̄ Jabọk, mè iraka emen èwê mege isi ire lek okwaan̄ Jodan.
23 “Ire Okumugwem, Awaji ebi Ijeren, irieen̄ ebi Amọ isan̄a me isi ebi kan̄ Ijeren, mè inikana ijọn̄ ya inyi ebi Ijeren, ìre owu òbojeje iyaka inibọkọ ijọn̄ ya isak? 24 Inu geelek Kemos awaji kwun̄ onyibe owu, ìre owu òkakibọkọ ìsak? Ubọk yaage si, inu geelek Okumugwem Awaji kiji onyibe eji, eji si ebebọbọkọ isak. 25 Ìre owu onwọn igak Balak gwun̄ kè Jipọ, ogwu ubọọn̄ Mowabu? Ìre îkaan̄ mgbọ Balak otọbe ubọk me isi ebi Ijeren, sà ìre îtim akọn̄ me lek ebi Ijeren? 26 Otuuk kè efit acha ita ke ebi Ijeren eluk me Esibon, mè Aroweri, mè otutuuk asabọn ama ògban ikana ama cha, mè iluk si me otutuuk ama ile òkup me agba okwaan̄ Anọn. Keke orọ owu òkasi ìbọkọ ere cha me mgbọ ya? 27 Emi ǹkarọ owu inu geege ìlọ. Ire, îre owu obene ikiweek emi ikọ, mè inikitim emi akọn̄ me lek. Kè Okumugwem isibi oyerebet cherekeyi inyi ebi Ijeren melek ebi Amọn.” 28 Ire, ogwu ubọọn̄ ebi Amọn ìkaweek igbagban̄ etip ya eyi Jefita oriabe ibe enelook ọmọ.
29 Ekwukwu Okumugwem oneninin̄ emen kè Jefita. Inanan̄a ije itibi agan̄ ijọn̄ Giliadi mè agan̄ ebi otoko kè Manasi, mè inire ama Mijipa òkup me Giliadi, mè isaba itoon̄ me ijọn̄ ebi Amọn. 30 Jefita oneninyan̄a ibot inyi Okumugwem ibe, “Ire okana ebi Amọn itap emi me ubọk, 31 mgbọ nsitim akọn̄ ikpan̄ ebi Amọn, mè ikigwu ikom ika, inu geelek òjeje itibi otu isotu uwu n̄a isibi inu inikweek emi, ìbokup inyi Okumugwem. Mâsa inu ya igwa ngwugwa ewọwọp iriọk inyi Okumugwem.”
32 Jefita onenisaba okwaan̄ isi itim akọn̄ me lek ebi Amọn, Okumugwem okakana ema itap ọmọ me ubọk, ititim ikpan̄. 33 Otuuk kè akọp ama iba ke îjibi akọn̄ inin̄, ibene me Aroweri isi ire agan̄ Minit, mè iraka isi igwook me Eben Keramim, mè ijijaka otutuuk igwook, mè ikpan̄ ene nsebe nsebe. Sa me ikeya ke ebi Ijeren etim akọn̄ ikpan̄ ebi Amọn.
34 Mgbọ Jefita onan̄abe me akọn̄ ikije ika inu uwu kan̄ me Mijipa, ìkpọkpọ inire ibot gwun̄ ge kan̄ ire eya ònan̄a me uwu isibi ikinu inikweek ọmọ, melek ekpete me ubọk, òkikwaak, òkijop. Ọmọ ìre gwun̄ ibot ge. Jefita ìkakaan̄ ofifi gwun̄ geege, mè ìre enerieen̄, mè ìre enenwaan̄, ilọ me lek kan̄. 35 Mgbọ Jefita obenebe chieen̄ itoon̄ me lek ogwu gwun̄, itataba ofọnti òkup me lek kan̄ igwak, mè ibe, “Jei, gwun̄ n̄a enenwaan̄! Owu oda emi ito! Owu okana ene ge me lek ebi ìkitap emi me ufieejit! Jei, emi nra ichili otu inyan̄a ibot inyi Okumugwem, m̀kpayaka ikọt igwen itap.”
36 Ogwu gwun̄ enenwaan̄ ofọfọọk ọmọ ibe, “Nte n̄a, owu ora iwuuk lek ichili otu inyan̄a ibot inyi Okumugwem, sa emi rọ inu geelek ònan̄a owu me otu isibi. Mije, Okumugwem îra irọ ebi ochicha kwun̄, ebi Amọn, useen̄ inu. 37 Ire, nye lek tele inyi mâsa ebi une n̄a igbaalek ijijen̄e ikana inyọn̄ oriọọn̄ onyan̄ iba gaalek ito ito ifieek ejit inyi lek n̄a. Mije, m̀bakwu mkpa me nkariọọn̄ge enerieen̄.” 38 Ogwu ute otetele ibe isi, mè ikweek onyan̄ iba. Ọmọ melek ebi unene kan̄ enanan̄a ije ifo inyọn̄ orioon̄ isi ikijijen̄e ikana ikito ito, mè ikifieek ejit, mije ọmọ obokwu mkpa me ikariọọn̄ge enerieen̄. 39 Me òta onyan̄ iba ya, gwun̄ enenwaan̄ ya okaka igọọk ogwu ute, ogwu ute osasa ọmọ irọ otu inyan̄a-ibot kan̄ iso. Gwun̄ enenwaan̄ ya okwukwu me ikariọọn̄ge enerieen̄.