Ebi Iferem mîtim akọn̄ me lek kè Jefita
12
Ebi Iferem enenibem lek akọn̄, mè inisaba okwaan̄ Jodan itoon̄ me Jafọn, mè isi itumu inyi Jefita ibe, “Keke orọ osibe isi itim akọn̄ me lek ebi Amọn òkagwen eji ìgbaalek, inyi eji egọọk owu esi? Mije keyi, eji ebewọwọp uwu kwun̄ itaka iriọk me ukan̄, mè owu me emen.”2 Ire, Jefita ofọfọọk ema ibe, “Emi mè ebi n̄a mîkaan̄ ikpele gọlọgọlọ melek ebi Amọn. Nraria etip igwen enyi ibe enyi esibi enu enetap ubọk enyi eji, enyi ejijit, kpesibi inu initap ubọk inyan̄a eji isibi me ubọk kiban̄. 3 Mgbọ mmun̄be ibe ke enyi kpenu initap ubọk inyi eji, mkpọkpọ imọnọ ugwem n̄a isun̄ inu ikike, mè isaba inin̄ oke ijọn̄ ebi Amọn isi itim ema akọn̄ me lek. Okumugwem okakana ema itap emi me ubọk, ntitim ikpan̄ ema. Mgbọ keyi, keke orọ enyi enube ibenitim emi akọn̄ me lek?”
4 Jefita onenititiin̄ otutuuk ebi akọn̄ Giliadi, mè initim akọn̄ me lek ebi Iferem, mè itim ikpan̄ ema, mije, ebi Iferem ekitumu ibe, “Enyi ebi Giliadi ìre ife ebi otoko kè Iferem mè ebi otoko kè Manasi ejitbe itele.” 5 Ebi Giliadi esisi itet otutuuk ere geelek ekije isaba okwaan̄ Jodan isi Iferem, mè igon ichit, inyi ogwu Iferem geege ikakọt ìnwọnọ me ubọk kiban̄. Ogwu Iferem geelek isilibi isi ire ere ìbosaba okwaan̄ Jodan isi agan̄ keyilọ, ebi Giliadi mîra ido ọmọ ibe, “Ìre owu ìre ogwu Iferem?” Ene ya isifọọk ibe, “In̄-in̄,” 6 ebi Giliadi mîra ibe ọmọ, “Ire ikeya, gwen-nu ‘Siyibolet.’ ” Ire ene ya ibe, “Sibolet,” mè ìkakọt ìgwen ìtat, mîra isik ogwugwa isan̄a, mè isa isi ikpan̄ me agba okwaan̄ Jodan. Akọp obop ene ini mè iba ebi Iferem ekwakwaan̄ me emen akọn̄ ya.
7 Jefita ogwu Giliadi îkpulu ebi Ijeren acha gweregwen, mè ikwu. Efufuun̄ ọmọ me ama ge me Giliadi.
Ibijan îkana ogwu ibot oyerebet me Ijeren
8 Mgbọ Jefita okwube iraka, Ibijan ogwu Beteleyem onenikana ogwu mkpulu me Ijeren. 9 Ibijan îkaan̄ akọp ibot bọn ebirieen̄ ita, mè ikaan̄ si akọp ibot bọn ebibaan̄ ita. Isasa bọn ebibaan̄ kan̄ iche olom inyi ebi oyet, ebi kpenan̄a me owot iman kiban̄, mè ido si nsabọn ibaan̄ me oyet, ebi kpenan̄a me owot iman kiban̄, inyi akọp ibot bọn ebirieen̄ ita kan̄ cha me lek nwa. Ibijan ìkpulu ebi Ijeren acha jaaba. 10 Inenikwu, efufuun̄ ọmọ me Beteleyem.
Elọn îkana ogwu ibot oyerebet me Ijeren
11 Mgbọ Ibijan okwube iraka, Elọn ogwu otoko kè Jebulọn onenikana ogwu ibot oyerebet me Ijeren, mè ikpulu ebi Ijeren akọp acha. 12 Elọn okwukwu, efufuun̄ ọmọ me Ajalọn, me ijọn̄ agan̄ ebi otoko kè Jebulọn.
Abidọn îkana ogwu ibot oyerebet me Ijeren
13 Mgbọ Elọn okwube, Abidọn gwun̄ kè Ilen ogwu ama Piraton onenikana ogwu ibot oyerebet me Ijeren. 14 Abidọn ìkaan̄ akọp ibot bọn ebirieen̄ ini, mè ikaan̄ si akọp ibot bọn bọn ebirieen̄ ita igbaalek. Bọn kan̄ chi ekekikọp me inyọn̄ akọp inyinya akpan jaaba. Abidọn okpukpulu ebi Ijeren acha jeeta. 15 Abidọn gwun̄ kè Ilen ogwu Piraton onenikwu, efufuun̄ ọmọ me Piraton me inyọn̄ ijọn̄ ebi otoko kè Iferem, me lek ijọn̄ ogoon̄ ogoon̄ ebi ido Amalek.