Imaman kè Samsin
13
Ebi Ijeren enenikpọk ikirọ ijo inu me chieen̄ Okumugwem. Okumugwem okakana ema itap me ubọk ebi Filisia otuuk kè akọp acha ini.2 Îkaan̄ ogwu enerieen̄ ge ònan̄a me Sora, ogwu erieen̄ kan̄ orebe Manowa, ogwu otoko kè Dan. Nwa kè Manowa ìre òra, ìkaman gwun̄ geege. 3 Usen ge, ogwu osat Okumugwem onenikana isibi me isi ogwu enenwaan̄ ya, mè inibe ọmọ, “Owu ìre òra, òkaman gwun̄ geege. Ire, ìkpofiin̄ mgbọ, owu mônin̄ owot, mè iman gwun̄ enerieen̄. 4 Gaalek mun̄ ibe ke owu òkanwọ miin̄ òkisa ene, mè ìre unye miin̄ geelek. Karie si inu geege ikatanage me isi Awaji, 5 mije, owu mônin̄ owot, mè iman gwun̄ enerieen̄. Osiman gwun̄ enerieen̄ ya, kasa akwaan̄ ìchak ọmọ me ibot ìkwọkọ ijeek. Mije, bene me emen owot, gwun̄ yi ìbore gwun̄ òbokup me inyan̄a-ibot eyi isusun̄ lek esese inyi Awaji. Îre ọmọ obobene inyan̄a ebi Ijeren isibi me ubọk ebi Filisia.”
6 Ogwu enenwaan̄ ya osisi lek ogwu olom, mè initumu inyi ibe, “Ogwu ikwaan̄ Awaji ge înu me lek n̄a. Ene ya ìbet lek ogwu osat Awaji, mè ikaan̄ ukpook enenen. Ǹkado ere înan̄abe, ọmọ si ìkababak erieen̄ kan̄ ìnyi emi. 7 Inenitumu inyi emi ibe, ‘Kpọ, owu mônin̄ owot, mè iman gwun̄ enerieen̄. Eya orọ, kanwọ miin̄ òkisa ene, mè ìre unye miin̄ geelek, mè karie si inu geege ikatanage me isi Awaji. Mije, bene me emen owot si re usen mkpa, gwun̄ yi ìbore gwun̄ òbokup me inyan̄a-ibot eyi isusun̄ lek esese inyi Awaji.’ ”
8 Manowa oneniriaak Okumugwem ibe, “Soso, Ogwukaan̄-ene, nye lek ria ogwu ikwaan̄ Awaji ya, ogwu owu oriabe inu, ibe ikpọk inu me lek kiji inijeen̄ eji ike eji ebesa ikpukpo gwun̄ enerieen̄ ya ebeman.”
9 Awaji onọnọ uriaak kè Manowa. Ogwu osat Awaji ya okpọkpọk inu me lek ogwu enenwaan̄ ya me emen uko ere îsikibe ikweek irek. Ire, Manowa ogwu olom ìkakup melek kan̄. 10 Ogwu enenwaan̄ ya olilibi ekot ekot isi itumu inyi ogwu olom ibe, “Na si kpọ! Ogwu enerieen̄ ya ònunu me lek n̄a usen keyilọ ya îkpọk inu si.”
11 Manowa onanan̄a ikeke, mè igọọk ogwu nwa ije. Mgbọ ema erebe, mè imun̄ ene ya, Manowa onenibe ọmọ, “Ìre owu ore ogwu òtutumu ikọ inyi nwa n̄a mgbọ keyilọ ya?”
Ifọfọọk ibe, “Iin̄, îre emi!”
12 Manowa onenido ọmọ ibe, “Mgbọ ikọ kwun̄ isinirọ iso ike owu otumube, ìre kpasi ikan obokikpulu ugwem gwun̄ yi melek ikwaan̄ kan̄?”
13 Ogwu osat Okumugwem ofọfọọk ibe, “Mun̄ ibe ke nwa kwun̄ îkirọ otutuuk inu ntemebe ọmọ. 14 Nwa kwun̄ ikarie inu geege ònan̄a me lek mfut gerep, ikanwọ miin̄ òkisa ene, ikanwọ si unye miin̄ geege, ikarie si inu geege ikatanage me isi Awaji. Ikalọlọ irọrọ otutuuk inu geelek nnyibe ida ibe irọ.”
15 Manowa onenibeek ogwu osat Okumugwem ya ibe, “Nye lek kup, kafo-nu, inyi eji ekpan̄ gwun̄ ebot ge esa etet owu ichen.”
16 Ogwu osat Okumugwem ofọfọọk ibe, “Ikerere òtetet emi ikaan̄, m̀kparie inorie kwun̄ geege. Ire, ire obogwa ngwugwa ewọwọp iriọk, gwa nyi Okumugwem.” (Manowa ìkariọọn̄ ibe ke ene ya ìre ogwu osat Okumugwem.)
17 Manowa onenido ogwu osat Okumugwem ya ibe, “Bak erieen̄ kwun̄ nyi eji nu! Eji mêweek inyinyi owu umin mgbọ ikọ kwun̄ môrọbe iso.”
18 Ogwu osat Okumugwem onenibe ema, “Keke orọ okiweek irọriọọn̄ erieen̄ n̄a? Erieen̄ ya ìkup uyeke uyeke.” 19 Manowa onenitet gwun̄ ebot ge, igbaalek akpa, isa igwa ngwugwa me inyọn̄ ntook ewuuk inyi Okumugwem. Me chieen̄ kè Manowa mè ogwu nwa, Okumugwem orọrọ uyeke uyeke inu. 20 Ike alọm ukan̄ okilomo inan̄a me lek ntook ngwugwa ya ifo inyọn̄, ogwu osat Okumugwem ojeje me emen alọm ukan̄ ya inene ifo inyọn̄. Mgbọ Manowa mè ogwu nwa emun̄be inu yi, ema erọrọn̄ me ijọn̄, mè ikana isi ichit. 21 Mgbọ ogwu osat Okumugwem ya oniniin̄be ichep, Manowa mè ogwu nwa kpeyaka imun̄ ọmọ ofifi, mgbọ ya ke ema eniriọọn̄ ibe ke ogwu enerieen̄ ya ema emun̄be ìre ogwu osat Okumugwem.
22 Manowa onenitumu inyi ogwu nwa ibe, “Jei! Mkpa okup inyi eji, mije, eji mîmun̄ Awaji!”
23 Ire, ogwu nwa obebe ọmọ, “Mebe Okumugwem îweek ikpakpan̄ eji, kpomobọkọ ngwugwa ewọwọp melek ngwugwa akpa ònan̄a me ubọk kiji. Kpomojeen̄ eji otutuuk inu chi îjeen̄be eji, kpomotutumu si otutuuk inu chi îtumube inyi eji.”