Ogwu uga obebe ọmọ, “Okumugwem igbana owu, gwun̄ n̄a!”

3 Mgbọ îkanabe obop ikpoko alata okuket ge mè efit ge ya inyi ogwu uga, ogwu uga otutumu ibe, “Me atikọ, nsun̄ ikpoko yi me mbuban inyi Okumugwem, mè isa ubọk n̄a ikana ikpoko yi inyi gwun̄ n̄a ibe isa irọ mkpọmfaka eyi ebọbọn̄ mè eyi etọtọkọ. Mgbọ keyi, ǹkiyaka ikpoko yi inyi owu.”

4 Maika onenikpọk ikana otutuuk ikpoko ya inyi ogwu uga. Ogwu uga onenimọnọ efit ikpoko alata okuket iba isa ijet ogwu òtọkọ-inu. Ene ya onenisa ikpoko cha irọ mkpọmfaka eyi ebọbọn̄ mè eyi etọtọkọ, ekpukpulu isi itap me uwu kè Maika.

5 Ogwu enerieen̄ yi, òrere Maika, îkaan̄ isi-ijọn̄ inyi lek kan̄, mè ichim mgbidim ofọnti ikwaan̄ ebi ngwugwa, mè ikaan̄ si owuwa mkpọmfaka, mè inisa ene ge me etete bọn ebirieen̄ kan̄ ito kubọk ogwu ngwugwa kan̄. 6 Me ukot mgbọ cha, ebi Ijeren kpekaan̄ ogwu ubọọn̄ òkikpulu ema, ene geelek ìkirọ inu òneme ọmọ.

7 Me ike mgbọ ya, îkaan̄ gwun̄ enerieen̄ ge, ogwu Beteleyem, ama ebi otoko kè Libai, òkiluk me ama ge me Juda. 8 Gwun̄ enerieen̄ yi onenitele Beteleyem me Juda, mè ikijijen̄e ikana ikiweek ofifi ere ìboluk. Mgbọ îjebe inire inyọn̄ ijọn̄ ogoon̄ ogoon̄ otoko kè Iferem, inenigwaka igba uwu kè Maika.

9 Maika onenido ọmọ ibe, “Owu ònan̄a me owa?”

Ifọfọọk ibe, “Emi ìre ogwu otoko kè Libai me Beteleyem me Juda. Ǹkijijen̄e ikana ikiweek ere mbaluk.”

10 Maika obebe ọmọ, “Na, na gọọk emi luk. Owu môre nte n̄a mè ire si ogwu ngwugwa inyi emi. Mâkikpe owu akọp ikpoko alata okuket me acha, mè ikinyi owu ofọnti melek inorie.” 11 Ogwu otoko kè Libai ya onenichieek igọgọọk Maika iluk. Maika onenimọnọ ọmọ kubọk ìyaka inire ene ge me lek bọn ebirieen̄ kan̄, 12 mè inito ọmọ me ikwaan̄. Ikakana ogwu ngwugwa kan̄, mè igọọk iluk me uwu kan̄. 13 Maika onenitumu ibe, “Mgbọ keyi, nriọọn̄ ijaan̄ lek ibe ke Okumugwem ìbonwọnwọn melek n̄a, mije ogwu otoko kè Libai onube inire ogwu ngwugwa inyi emi.”