Me ukot mgbọ ya si, ebi otoko kè Dan ekiweweek ijọn̄ ìrot kiban̄ ere ema ebeluk. Mije, mege inire mgbọ ya, ema kpebọkọ-nu ìrot eyi kiban̄ me etete otoko ebi Ijeren. 2 Mije keya, ebi otoko kè Dan enenigobo ebirieen̄ ebi usọ akọn̄ go me etete otutuuk ebi owot iman kiban̄, mè iniria ema isibi, me ama Sora mè Esitayon, ibe esi eweek eriọọn̄ ike ijọn̄ agan̄ ya okupbe.

Mgbọ ebi ife cha ejebe inire inyọn̄ ijọn̄ ogoon̄ ogoon̄ otoko kè Iferem, enenigba uwu kè Maika, mè inigọọk ọmọ ilaak iwele egwe. 3 Me ere uwu kè Maika ya, ema enọnọ gwun̄ enerieen̄ ogwu Libai ya okitumu ikọ, mè inisa me otu usem kan̄ iriọọn̄ ibe ke îre ogwu otoko kè Libai, mè ikana igọọk, mè inido ọmọ ibe, “Ìre ekene osa owu inu me ere keyi? Sà, òkirọ keke me ere keyi? Keke ire ubọk ikwaan̄ kwun̄ me ere keyi?”

4 Ineniben otutuuk inu Maika orọbe inyi ọmọ ikpa inyi ema, mè itumu si ibe, “Îbọkọ emi me ọkọ, inyi ǹnenkana ogwu ngwugwa kan̄.”

5 14 Ema enenibe ọmọ, “Nye lek do-nu riọọn̄ me otu Awaji, mè ìre ije yi eji ekije mônwọn.”

6 Ogwu ngwugwa ya ofọfọọk ema ibe, “Ìje me esuuk. Okumugwem òwa melek kinyi me oniin̄ ije kinyi.”

7 Ebirieen̄ go cha enenibene ije kiban̄, mè ije inire ama Layis, mè imun̄ ebi ene ekiluk me utelelek me ama ya, kubọk ebi ama Sidọn. Ebi ama Layis ekiluk me esuuk, kpekaan̄ gọlọgọlọ melek ene geege. Kpunu unye ogwu mkpulu geege òkinitap ema esip me isi me ama ya.^a Ife chi mîluk ijọn̄ọ ere me lek ebi ama Sidọn, kpekakaan̄ si mgbaan̄-nrọ melek ebi ofifi ido geege.

8 Ebirieen̄ go chi enenigwu ikom ika inire ama Sora mè ama Esitayon, ebi ngwan̄ kiban̄ enenikido ubọk ije kiban̄ okupbe.

9 Ema efọfọọk ibe, “Ìna mè eji enejibi akọn̄ esi ama ya! Eji mîmun̄ ibe ke ijọn̄ ya îjaan̄ enenen. Enyi, ikakpọkpọ ìkup ikeya! Ikawọ lek! Eji enejibi akọn̄ esi lek ijọn̄ ya esi ebọkọ esak! 10 Enyi isire ere ya, enyi mêmun̄ ibe ke ife cha eluk me utelelek, ijọn̄ ya si îwele isaak. Awaji îra ikana lek ijọn̄ ya itap enyi me ubọk. Otutuuk inu geelek òkup me linyọn̄, kpunu geege ònanan me lek ijọn̄ ya.”

11 Efit ebirieen̄ ebi akọn̄ gweregwen ebi otoko kè Dan enenititiin̄ me Sora mè Esitayon, mè ikwaan̄ nroon̄ akọn̄ kiban̄, mè inijibi akọn̄ isibi. 12 Mgbọ ema ejebe igbet Kiriat Jiarim me Juda, ema egwugwugwuun̄ uwu ọfọ kiban̄ me ere ya ikup itap efuuk. Îre mije keyi ke ekigwen ere ya m̀gba-ǹgwele ukan̄ ebi Dan, mege inire cherekeyi. Ere ya ìkup me agan̄ ichep-ura me Kiriat Jiarim. 13 Ema eneninan̄a me ere ya ije isi inyọn̄ ijọn̄ ogoon̄ ogoon̄ otoko kè Iferem, mè ije inire uwu kè Maika.

14 Me ere ya, ebirieen̄ go cha ebi ìsisi isi ikpọ ike ijọn̄ Layis okupbe enenitumu inyi ebi ngwan̄ ibe, “Îkaan̄ uwu ge me ere yi eyi mgbidim ofọnti ikwaan̄ ebi ngwugwa, mè esese chieen̄ ebikaan̄, mè mkpọmfaka eyi ebọbọn̄ mè eyi etọtọkọ, okupbe me emen. Mgbọ yi, ìriọọn̄ inu enyi eberọ.” 15 Ema enenigba ere ya, mè iraka isi uwu ere gwun̄ enerieen̄ ogwu otoko kè Libai ya olukbe, me uwu kè Maika, mè initọp ọmọ amọn. 16 Me ike mgbọ ya, efit ebi akọn̄ gweregwen ebi otoko kè Dan, ìbebem lek akọn̄, ekeke me otunchit ere ya. 17 Ebirieen̄ go, ebi ìnunu inikpọ ike ere ya okupbe, eraraka inin̄ uwu ya, mè isi ikpulu mkpọmfaka ebọbọn̄ ya, mè mgbidim ofọnti ikwaan̄ ebi ngwugwa ya, mè ebikaan̄ cha, mè mkpọmfaka etọtọkọ ya. Me ike mgbọ yi, ogwu ngwugwa ya mè efit ebirieen̄ gweregwen ìbebem lek akọn̄ ekekeke me otunchit ere ya.

18 Mgbọ ebirieen̄ cha erakabe inin̄ uwu kè Maika isi ikikpulu mkpọmfaka ebọbọn̄ ya, mè mgbidim ofọnti ikwaan̄ ebi ngwugwa ya, mè owuwa ebikaan̄ cha, mè mkpọmfaka etọtọkọ ya, ogwu ngwugwa ya okekido ema ibe, “Kpasi inu ke enyi ekirọ ikeyi?”

19 Ema erarama ọmọ ibe, “Chit otu! Kalululuk ìsan̄a amọn. Na, na gọọk eji fo, mè na si kana ute melek ogwu ngwugwa nyi eji. Owu irere ogwu ngwugwa inyi ototun̄ ukan̄ ene ge kpọi, mè owu irere ogwu ngwugwa inyi otutuuk otoko ge mè owot iman ge me Ijeren, ìre eyi owa onwọn igak?” 20 Ogwu ngwugwa ya obebele ejit, mè imọnọ mgbidim ofọnti ikwaan̄ ebi ngwugwa ya, mè ikpulu si ebikaan̄ cha, mè mkpọmfaka ebọbọn̄ ya, mè isibi igọọk ife cha ifo. 21 Ema etoto asa nsabọn kiban̄ mè anam kiban̄ mè otutuuk nroon̄ uwu kiban̄ me isi kiban̄, mè ikije igọọk me agan̄ udun̄. Ikeya ke ema egbuku inin̄ oniin̄ ifon.

22 Mgbọ ebi otoko kè Dan ejebe ijọn̄ọ ere sọnja me lek uwu kè Maika, Maika onenititiin̄ ebi ìluk me agba lek kan̄, mè ijibi akọn̄ isi ichichini ebi otoko kè Dan cha me oniin̄. 23 Ife cha ekekitiki akọn̄ inin̄ lek ebi otoko kè Dan. Ebi otoko kè Dan echachak ikeke, mè ikana isi ikweek ema, mè ikitumu inyi Maika ibe, “Keke ogba owu lek, eyi owu otitiin̄be ebi kwun̄ ibe enetim eji akọn̄ me lek?”

24 Maika ofọfọọk ema ibe, “Enyi mîkpulu ebi kè awaji n̄a, echi emi nrombe, mè itet si ogwu ngwugwa n̄a igbaalek isa ifo. Ìre keke ke nyaka ikaan̄? Enyi ejeje ikido emi ibe ìre keke ogba emi lek?”

25 Ebi otoko kè Dan egagana inyi Maika ibe, “Gwat lek chit otu me ere yi. Ire oyaka ikpọk ikigugọlọ melek kiji, usini ebi fukufuku ejit me etete kiji mêbene akọn̄ me lek kinyi, mè ikpan̄ owu mè otutuuk ebi uwu kwun̄ igbaalek.” 26 Lek kè Maika owọwọ, mije, îmun̄ ibe ke ebi otoko kè Dan mîwa enenen mè inye lek igak ema. Ọmọ mè ebi kan̄ egwugwu ikom ifon. Ebi otoko kè Dan ekpọkpọk ibene ije kiban̄ ikije inyi isi.

27 Ikeya ke ebi otoko kè Dan ekpulu otutuuk inu cha Maika orọbe, melek ogwu ngwugwa ya, isa igbaalek ije inan̄a, mè isi itim akọn̄ me lek ama Layis. Ebi Layis ìre ebi esuuk, ebi ìkiluk me utelelek. Ebi otoko kè Dan ebebene akọn̄ me lek ebi ama ya, mè isa oge akọn̄ ikpan̄ ebi ama ya isan̄a, mè itap ukan̄ iwọp ama ya igwook. 28 Kpunu ebi ìninitap ubọk inyi ema, mije, ama kiban̄ îjọn̄ọ ere me lek ama Sidọn, ema kpekakaan̄ si mgbaan̄-nrọ melek ebi ofifi ama. Layis ìkup me iteke ijọn̄ òkup igbet ama Bet Reyobu.

Ebi otoko kè Dan enenikpọk ama ya inama, mè inin̄ iluk ikana ama kiban̄, 29 mè ininwene erieen̄ ama ya ikigwen Dan, òrere erieen̄ nte nte kiban̄, ene ge me etete bọn ebirieen̄ Ijeren obonbe. Ire, erieen̄ ama ya ìre Layis me adasi mgbọ. 30 Ebi otoko kè Dan eneniyik mkpọmfaka ebọbọn̄ cha me irek inyi lek kiban̄. Jonatan gwun̄ kè Gesiọm gwun̄ kè Manasi^b melek ebi bọn ekekire ebi ngwugwa inyi ebi otoko kè Dan mege ire mgbọ ekpulube otutuuk ebi lek ijọn̄ ya me usun̄ akọn̄. 31 Ebi otoko kè Dan ekekitọbọ ebum inyi mkpọmfaka ebọbọn̄ cha Maika orọbe, otutuuk mgbọ Uwu Mbuban Awaji okupbe me Silo.