Îkaan̄ ogwu otoko kè Libai ge òluk me inyọn̄ ijọn̄ ogoon̄ ogoon̄ otoko kè Iferem me agan̄ udun̄ udun̄. Ogwu enerieen̄ yi îkaan̄ ugan ge ònan̄a me ama Beteleyem me Juda. 2 Ire, ogwu enenwaan̄ ya okekije oyet ikana ere, mè itele ọmọ, mè igwu ikom ifo uwu ogwu ute me Beteleyem me Juda. Mgbọ îkupbe me ere ya onyan̄ ini, 3 ogwu olom onanan̄a ije isi Beteleyem, ọmọ melek gwun̄ uwu kan̄, melek inyinya akpan iba, ibosi iriaak ogwu enenwaan̄ ya ibe igwu ikom ika. Mgbọ îrebe, ogwu enenwaan̄ ya obọbọkọ ọmọ itap me uwu ogwu ute. Mgbọ ogwu ute omun̄be ọmọ, isasa me ubelejit ibọkọ ọmọ itap. 4 Nte ogwu enenwaan̄ ya, òrere ogwu ute-nwa, otetet ọmọ ikaan̄ ibe igọọk ema ikup sọnja mgbọ. Ichechieek, mè igọọk ema ikup otuuk kè egwe ita, mè ikirie mè ikinwọ.

5 Me òso egwe ini, ema ebobolo chieen̄ me ata otu ewelegwe, ogwu enerieen̄ ya okekibem lek ifofo. Ire, nte ogwu nwa ya onenitumu inyi òyet ogwu gwun̄ ibe, “Kakpọkpọ ìnan̄a ìje ikeya. Bọkọ sọn̄ inorie rie sa tet owot, sabum onan̄a oje.” 6 Ema, ute nwa mè òyet gwun̄, enenigbaan̄ isiki ikweek irek irie inorie, mè inwọ miin̄. Ogwu ute-nwa onenibe ọmọ, “Nye lek gọọk eji laak wele egwe eririeen̄ keyi gaalek, mè nwọọn̄ lek kwun̄.” 7 Ogwu enerieen̄ ya oneninan̄a iboje, ire, ogwu ute-nwa otutumu ikọ inwene ọmọ ejit, igọgọọk ema ilaak iwele egwe. 8 Me ofit iwele kan̄, òrere òso egwe go, ogwu enerieen̄ ya onanan̄a ikeke ibonifo, nte ogwu ugan obebe ọmọ, “Tap efuuk nu, mè bọkọ sọn̄ inorie rie sa tet owot, mè gọọk eji kup re ejit ikarek sabum onan̄a oje.” Ema ene iba esisiki ikweek igbaan̄ irie inorie.

9 Me ejit ikarek, ogwu enerieen̄ ya oneninan̄a ikeke ibofo, ọmọ mè ogwu ugan, mè gwun̄ uwu kan̄. Ire, ogwu ute-nwa, òrere nte ogwu enenwaan̄ ya, otutumu inyi ọmọ ibe, “Kpọ, egwe îjọkọ enenen, mônire agan̄ ikakwun̄, egwe mônifit. Ìlaak ìwele egwe, soso. Gọọk eji laak wele egwe, mè nwọọn̄ lek kwun̄. Enyi mêkọt inan̄a ata otu ewelegwe iyakwut ije ifon.” 10 Ire, ogwu enerieen̄ ya ìkayaka ìweek ikpọkpọk ilaak me ere ya, inanan̄a itele ema, mè ikije inyi agan̄ ama Jebus (òrere Jeruselem), ọmọ melek ogwu ugan, mè gwun̄ uwu kan̄, mè inyinya akpan iba kan̄.

11 Mgbọ ema ejebe igbet Jebus, egwe onenikifit, gwun̄ uwu kan̄ ya onenitumu inyi ogwu ute-uwu ibe, “Eji enegba Jebus, mè elaak ewele egwe.”

12 Ogwu ute-uwu obebe ọmọ, “In̄-in̄, eji ekagba ama ebi ichen, ebi kpere bọn owot Ijeren, ìsi ìgọọk ìlaak. Eji eje esi Gibiya.” 13 Inenitumu inyi gwun̄ uwu kan̄ ya ibe, “Eji eneje esi Gibiya, mè ìyaka ire Rama, mè egba egọọk elaak ewele egwe me ama ge me lek ama kecha.” 14 Ema enenikije inyi isi. Mgbọ ema ejebe igbet Gibiya me Benjamin, ura oninim. 15 Ema egwagwaka, ibesi iweek ere ilaak iwele egwe. Mgbọ ema erebe ama ya, ema eraka isi oyet ama isi isiki ikweek, ire, kpunu ene geege òbọbọkọ ema itap me uwu ibe enegọọk elaak ewele egwe.

16 Ogwu enerieen̄ ge, ugane, oneninan̄a me oron uko ika me ikakwun̄ ya. Ogwu ugane enerieen̄ ya ìre ogwu agan̄ ijọn̄ ogoon̄ ogoon̄ ebi otoko kè Iferem, ire, ìkiluk me Gibiya. Ama Gibiya ya ìre ama ebi otoko kè Benjamin. 17 Mgbọ ogwu ugane enerieen̄ ya ojebe ire oyet ama, mè inibene chieen̄ imun̄ ogwu ije ya, idodo ibe, “Ònan̄a me owa? Ìre owa ke obosi?”

18 Ogwu ije ya ofọfọọk ibe, “Eji enan̄a me Beteleyem me Juda ibesi udun̄ udun̄ ama ge me inyọn̄ ijọn̄ ogoon̄ ogoon̄ ebi otoko kè Iferem. Emi ìre ogwu ama ya. Ǹsi Beteleyem me Juda, mè ikika, ire, mgbọ keyi, m̀basi Uwu Mbuban Okumugwem. Kpunu ogwu òbọbọkọ emi itap me uwu me ama keyi. 19 Eji mîkaan̄ mbubet mè inorie anam òboso inyinya akpan iba kiji, mè ikaan̄ si inorie mè miin̄ òboso emi ogwu usun̄ kwun̄, mè ogwu usun̄ kwun̄ enenwaan̄, mè gwun̄ melek kiji. Inu geege ìkanan eji.”

20 Ogwu ugane enerieen̄ ya onenibe, “Esuuk ikup melek kwun̄! Na me uwu n̄a, ke mânyi owu otutuuk inu geelek òkup owu me uyọt. Gaalek, kalaak me oyet ama ìwele egwe!” 21 Ogwu ugane ya onenibọkọ ogwu ije ya itap me uwu kan̄, mè ininyi inyinya akpan cha inorie. Mgbọ ema egwọkbe ukot kiban̄ isan̄a, enenirie inorie, mè inwọ miin̄.

22 Mgbọ ema ekinwọọn̄ lek kiban̄, usini ikpak ikpak ebirieen̄ ama ya ekakana isibi, mè inigban ikana uwu ya, mè ikigon ubọk unye unye me lek afọn̄, mè ikitaan̄ ukpo itumu inyi ogwu ugane, ogwukaan̄ uwu ya, ibe, “San̄a ogwu enerieen̄ ya ònunu me uwu kwun̄ sibi, inyi eji egọọk elaak.”

23 Ogwukaan̄ uwu ya onanan̄a isibi, mè ikitumu inyi ema ibe, “In̄-in̄, ebi ngwan̄ n̄a, ikarọ ijo inu òkup ikeyi ma! Ogwu enerieen̄ yi ìre ogwu ichen n̄a, enyi ebejeje inirọ burubut inu esip òkup ikeyi me lek kan̄! 24 Kpọ, gwun̄ n̄a enenwaan̄ ikariọọn̄ge enerieen̄ ire eyi, ọmọ melek ogwu ugan ogwu enerieen̄ ya, mâsan̄a ema isibi inyi enyi, inyi enyi esa ema erọ inu geelek òneme enyi. Ire me lek ogwu enerieen̄ yi, ikalululuk ìrọ burubut inu esip òkup ikeyi me lek.”

25 Ire, ebirieen̄ cha kpeweek inọnọ ikọ kan̄. Ogwu otoko kè Libai ya osasan̄a ogwu ugan kan̄ isibi ito me oyet inyi ema. Ema etetet ogwu enenwaan̄ ya ilaak me unye, mè iwọlọ ọmọ idek otuuk eririeen̄ ya mege ire agan̄ egwe, mè initele ibe ifo. 26 Mgbọ egwe okimumọọn̄ lek, ogwu enenwaan̄ ya ojeje ifo uwu ogwu enerieen̄ ya ere ogwu nte uwu okupbe, mè irọn̄ me otu isotu uwu ya, mè inyana ikeya mege egwe owelebe itoon̄.

27 Me ewelegwe, mgbọ ogwu nte uwu ogwukube isotu iboje iraka isibi, ìyaka initoon̄ me lek ogwu ugan kan̄ onyanabe me ijọn̄ me otu isotu uwu ya, mè inyana ubọk iba itoon̄ me inyọn̄ otu isotu. 28 Ogwu enerieen̄ ya onenibe ogwu ugan, “Nan̄a keke, mè eji enefo.” Ire, ìkafọọk ọmọ otu. Ogwu enerieen̄ ya onenibene ogwu enenwaan̄ ya itoon̄ me inyọn̄ inyinya akpan kan̄, mè isa ifo.

29 Mgbọ îfobe isi ire uwu kan̄, iwọwọọk oge isibi, mè inibak ogwu ugan, me usọk me usọk, isibi akọp mè irek iba, mè iniria okpọkọ ge ge ijet otutuuk otoko ebi Ijeren. 30 Ene geelek òmumun̄ anam akpalek ogwu enenwaan̄ ya îra ikijiin̄ lek ibe, “Eyi ye? Ojelek inu òkup ikeyi ìkararak ìrọ, kperarak ìmun̄, karake Ijeren onan̄abe me Ijipiti isibi mege inire ukot keyi! Mbuban îchaka! Ìkeek-nu! Ìnyi nkeek! Ìtumu ikọ ofolek!”