4 Ikeya ke ogwu otoko kè Libai ya, nlom ogwu enenwaan̄ ekpan̄be ya, onibene ikpa ibe, “Emi melek ogwu ugan n̄a enan̄a ije inu Gibiya me Benjamin, ibenilaak iwele egwe. 5 Me ejit eririeen̄, ebirieen̄ Gibiya esisibi inu, inigban ikana uwu ere nkupbe, ikiweek ikpakpan̄ emi. Ubọk kiban̄ ìyaka inire lek ogwu ugan n̄a, ema etetet ọmọ ilaak me unye, ikwukwu. 6 Ikeya ke nniben nkwukwu ogwu ugan n̄a ibak okpọkọ okpọkọ, mè iria okpọkọ ge ge ijet otoko ebi Ijeren geelek, me ere ema elukbe. Ǹrọ ikeya, mije, inu ife chi erọbe ìre mbuban inu, mè ire si burubut inu esip, eyi kperarak ikirọ me Ijeren. 7 Mgbọ keyi, enyi otutuuk ene ìre ebi Ijeren, ìsan̄a amọn ìtumu ikọ, mè ìnyi nkeek kinyi me ere keyi.”

8 Otutuuk ene enanan̄a ikeke me ejit ge, mè isa me ida ge itumu ibe, “Ene geege ìkponan̄a ifo uwu kan̄, mè ìre uwu ọfọ, mè ìre ata uwu. 9 Inu eji eberọ ama Gibiya ìre ikeyi: Eji mêroon̄ nriroon̄ isa iriọọn̄ ike eji ebesa itim ama Gibiya akọn̄ me lek. 10 Gaalek, otoko geelek me Ijeren òsoso efit ene, inyi eji akọp ebirieen̄; otoko òsoso obop, inyi eji efit ebirieen̄; otoko òsoso akọp obop, inyi eji obop ebirieen̄. Ebibi ebekisa inorie mè inu òkup me uyọt ijet ebi akọn̄. Mgbọ ebi akọn̄ isinire Gibiya^a me Benjamin, mêrọ ebi Gibiya inu ògbegbe ema, mije inu ikpak keyi ema erọbe me Ijeren.” 11 Otutuuk ebirieen̄ Ijeren enenigbaan̄ ititiin̄ me ida ge, mè otu ge, mè itumu ifieek ibe ke mêsi itim akọn̄ me lek ama Gibiya ya.

12 Otutuuk otoko ebi Ijeren eraria ebi ene ikana otutuuk ama ebi otoko kè Benjamin, ibe esi edo ema ibe, “Ìre kpasi ikpak ikpak nlilọ inu ke enyi ekirọ ikeyi me etete kinyi? 13 Mgbọ keyi, ìsan̄a ikpak ikpak ebirieen̄ ama Gibiya cha ìsibi, inyi eji echo ema efiin̄, inyi ukot ojelek ijo inu òkup ikeyi ikayaka ìkup me Ijeren ofifi.”

Ire, ebi otoko kè Benjamin kpechieek igbagban̄ ida ebi ngwan̄ kiban̄ ebi Ijeren. 14 Kpan̄asi ikeya, ema egbugbuku inan̄a me otutuuk ama kiban̄ isibi inu inititiin̄ me Gibiya, mè ibem lek ititim akọn̄ me lek ebi Ijeren. 15 Me usen ya, ema etititiin̄ akọp obop ebi usọ akọn̄ iba mè obop gweregwen ìnan̄a me asabọn ama kiban̄, otutuuk kiban̄ ebi ìrọriọọn̄ ifiala oge akọn̄, igbaalek efit ebi usọ akọn̄ jaaba ebi ama Gibiya. 16 Me etete ebi akọn̄ Benjamin chi, efit ene jaaba me lek kiban̄ ìre ujit ubọk, ebi usọ olik mgbọlọ ìrọriọọn̄ ikitọbọ mgbọlọ, ikerere ukut ijeek ge, kpekitọbọ ilọ.

17 Ebi Ijeren kechilọ (isan̄a me lek ebi otoko kè Benjamin) enenititiin̄ efit obop ebi usọ akọn̄ ini, ebi ìriọọn̄ ukot akọn̄, mè iriọọn̄ ifiala oge akọn̄ enenen.

18 Ebi Ijeren enenisi Uwu Mbuban Awaji me Beten, isi ido ida Awaji. Ema edo ibe, “Ìre ekene me etete kiji oboje me isi akọn̄ yi, isi itim akọn̄ me lek ebi otoko kè Benjamin?”

Okumugwem ofọfọọk ema ibe, “Juda ije me isi.”

19 Me ofit iwele kan̄, ebi akọn̄ Ijeren ebebem lek akọn̄, mè isi irieen̄ akọn̄ me agba lek ama Gibiya. 20 Ema enenijibi akọn̄ isi lek ebi otoko kè Benjamin, mè imọnọ irek kiban̄, ikikpọ mgbọ akọn̄ obobene me lek ama Gibiya. 21 Ebi akọn̄ Benjamin ejijibi akọn̄ isibi me Gibiya initim me lek ebi Ijeren, mè ikpan̄ akọp obop ebi akọn̄ Ijeren iba mè obop iba me isi akọn̄ me usen ya. 22 Ire, ebi Ijeren kpechieek ibe efuuk ita ema me emen, ge okekitap ge efuuk me emen. Ema kpejibi inan̄a me akpat, ekekeke inye me irek ema emọnọbe bene me adasi usen. 23 Ebi Ijeren enenichak lek inyi udun̄ isi lek Okumugwem, mè isi ito ito me isi kan̄ mege ifit egwe usen ya, mè inido Okumugwem ibe, “Ìre eji ekpọk esi etim akọn̄ me lek ebi otoko kè Benjamin, ebi ngwan̄ kiji?”

Okumugwem ofọfọọk ema ibe, “Iin̄, ìsi ìtim ema akọn̄ me lek.”

24 Ebi Ijeren enenikpọk isi itim akọn̄ me lek ebi otoko kè Benjamin òso usen iba. 25 Ebi otoko kè Benjamin esisibi me Gibiya initim ebi Ijeren akọn̄ me lek me òso usen iba ya, mè ikpan̄ ebi Ijeren akọp mè obop ebi akọn̄ jeeta ebi ìriọọn̄ ukot akọn̄.

26 Otutuuk ebi Ijeren eneninan̄a igbuku isi Beten, ene geege ìkasik, mè isiki ikweek me ijọn̄, mè ikito ito inyi Okumugwem otuuk kè usen ya, kperie inorie geege mege ifit egwe usen ya, mè inigwa ngwugwa ewọwọp iriọk melek ngwugwa esuuk inyi Okumugwem. 27 Ebi Ijeren enenido ida Okumugwem. (Me ukot mgbọ cha, okop inyan̄a-ibot Awaji òwa me ere ya okupbe. 28 Fineyas gwun̄ kè Elieja gwun̄ kè Erọn okiban okop inyan̄a-ibot ya me ukot mgbọ ya.) Ebi Ijeren enenisi ido ibe, “Ìre eji ekpọk esi etim akọn̄ me lek ebi otoko kè Benjamin, ebi ngwan̄ kiji, sà ìre eji ekasi?”

Okumugwem ofọfọọk ibe, “Ìsi, ke mâkana ema itap enyi me ubọk iyakwut.”

29 Ebi Ijeren enenikpa mbin akọn̄ ikana ama Gibiya, 30 mè inijibi akọn̄ inin̄ lek ebi otoko kè Benjamin me òso usen ita, mè ikeke ikana Gibiya me irek ema ewuukbe lek ikikeke me mgbọ òraraka cha. 31 Ebi otoko kè Benjamin ejijibi akọn̄ isibi inikweek ema. Ema echachak lek ikpebe, mè ileke ema isibi me emen ama Gibiya. Ebi otoko kè Benjamin ebebene ikikpan̄ usini ebi Ijeren kubọk mgbọ òraraka cha, mè ikpan̄ akọp ebi akọn̄ Ijeren ita igwook me emen uko melek ejit oniin̄ òkisi Beten mè eyi òkisi Gibiya.

32 Ebi otoko kè Benjamin ekekibe, “Akọn̄ okirie ema kubọk adasi mgbọ.” Ebi Ijeren ekekibe, “Eji echak ekpebe, mè eleke ema esibi me ama etap me oniin̄.”

33 Otutuuk ebi akọn̄ ebi Ijeren enenitele ere ema ekekebe me Gibiya, mè inichak lek inyi udun̄ isi ire Baali-Tema. Ebi akọn̄ Ijeren ebi ìlileek me udun̄ ama Gibiya, me agan̄ ichep-ura, enanan̄a isibi, mè ijibi akọn̄ inin̄ ama Gibiya ya. 34 Akọp obop ebi usọ akọn̄ Ijeren, ebi egogobo isibi, ebi ìrọriọọn̄ ukot akọn̄ ichit me Ijeren, enenijibi uga akọn̄ inin̄ ama Gibiya isi mè isi. Akọn̄ ya onyenye enenen, ire, ebi otoko kè Benjamin kperiọọn̄ ibe ke ùrioon̄ òkinu ibonirie ema. 35 Okumugwem onenitim ebi otoko kè Benjamin akọn̄ me lek inyi ebi Ijeren, ebi Ijeren ekpakpan̄ akọp obop ene iba mè obop go mè efit ene ebi ìriọọn̄ ukot akọn̄ me Benjamin, me usen ya gaalek. 36 Ebi otoko kè Benjamin enenimun̄ ibe ke ebi Ijeren mîtim ikpan̄ ema.

Sabum mgbọ ya, ebi akọn̄ ebi Ijeren mîtoon̄ ejit me lek ebi akọn̄ kiban̄ ebi ema elileekbe ikana ama Gibiya, mè inichak lek inyi udun̄, ikirọ kubọk ema ekililibi inan̄a me isi ebi akọn̄ ebi otoko kè Benjamin. 37 Ebi akọn̄ Ijeren ebi ìlilileek cha eneninan̄a isibi wap me ere ema ekupbe, mè igwat lek igbuku mgbọ yaage inin̄ ama Gibiya, mè iche lek ikana ama ya, mè isa oge akọn̄ ikpan̄ otutuuk ene isan̄a me emen ama ya. 38 Sabum mgbọ keyi, ebi isi akọn̄ Ijeren mè ebi akọn̄ ìlilileek me oron mîwuuk lek itọt ibe, ebi ìlilileek me oron isinin̄ ama ya, etap ukan̄, inyi uga oduku ikibumu inan̄a me ama ya ifo inyọn̄. 39 Ebi isi akọn̄ isimun̄ oduku ya, ema mênenigwu ikom inin̄ lek ebi otoko kè Benjamin.

Sabum ebi ìlet me oron eninan̄a isibi inu, ebi otoko kè Benjamin mîbene ikikpan̄ ebi Ijeren, mè ikpan̄ iso akọp ene ita, mè ikitumu ibe, “Me atikọ, eji ba mêkitim ikpan̄ ema mgbọ keyi si kubọk adasi usen akọn̄ ya.” 40 Ire, mgbọ uga oduku ya okibumu inan̄a me emen ama ya ifo inyọn̄, ebi otoko kè Benjamin ekakana chieen̄, mè imun̄ uga oduku okibumu inan̄a me otutuuk agan̄ geelek me otutuuk emen ama kiban̄ ikiduku ichit akpa isinyọn̄. 41 Ebi Ijeren cha ìkililibi inan̄a, egwugwu isi ikom, mè inikana ubọk igwook ema me lek. Ukpook oninin̄ ijot emen ebi otoko kè Benjamin, mije, ema mînimun̄ ibe ke ijo ùrioon̄ mkpa îkana itoon̄ ema. 42 Ema enenikilibi inan̄a me isi ebi Ijeren, ikifo agan̄ emen èwê. Ire, ema kpekọt ilibi inwọnọ me ubọk akọn̄ ya. Ebi Ijeren ìlilileek cha enanan̄a me agan̄ emen ama inu, mè inigwuk ikwek ebi otoko kè Benjamin cha me etete kiban̄ agan̄ iba, mè ichon ema igwook me ere ya. 43 Ebi Ijeren ewawak ikana ebi otoko kè Benjamin me agan̄ geelek, mè ikpan̄ ema igwook, me kpunube ufialek, ibene me agan̄ mbum-ura inigwook me isi ama Gibiya. 44 Ebi Ijeren ekpakpan̄ akọp mè obop ene jeeta ebi akọn̄ otoko kè Benjamin, otutuuk kiban̄ ebi ìrọriọọn̄ ukot akọn̄, mè inye lek. 45 Usini ebi akọn̄ otoko kè Benjamin ekekililiin̄ ifon emen èwê, ikisi lek ewuuk Rimọn. Ebi Ijeren ekwekwek ema, mè ikpan̄ obop ene go. Ebi Ijeren ekpọkpọ ikigọọk si ebi otoko kè Benjamin mege isi ire Gidọm, mè ikpan̄ si obop ene iba igbaalek.

46 Me usen ya, ebi Ijeren ekpakpan̄ akọp obop ene iba mè go ebi isi akọn̄ Benjamin, otutuuk kiban̄ ebi ìrọriọọn̄ ifiala oge akọn̄, mè iriọọn̄ si ukot akọn̄ ijaan̄. 47 Ire, efit ebi akọn̄ gweregwen ebi otoko kè Benjamin elilibi ifo emen èwê, isi ire lek ewuuk Rimọn, mè ikup me ere ya onyan̄ ini. 48 Ebi Ijeren enenigwu ikom isi ijọn̄ ebi otoko kè Benjamin, mè isi inin̄ otutuuk ama kiban̄, mè ikpan̄ otutuuk ebi geelek ema emun̄be me emen ama cha, igbaalek ebi kè anam uwu, mè inu geelek chieen̄ kiban̄ orieen̄be me lek me emen ama cha, kpunu inu geege etelebe. Ama ebi otoko kè Benjamin geelek ema enin̄be, ekitatap ukan̄ iwọp.