Rufu îmun̄ ogwu òbomọnọ ọmọ me lek nwa uwua
3
Nomi, nga nlom kè Rufu, onenitumu inyi Rufu ibe, “Gwun̄ n̄a, îgbe ibe emi m̀week olom ǹnyi owu, ufuna owu òkaan̄ uwu ere isiki-efuuk. 2 Kpọ, Bowaji, ogwu owu ogọọkbe ebi ikwaan̄ kan̄ ebibaan̄ ikije ya, ìre ogwu otoko kiji. Me eririeen̄ cherekeyi, ọmọ mônu inigen̄ akpa balì me ere igen̄ akpa. 3 Eya orọ, week mun̄ ken, mè chiọọk aran̄ utop olu me lek, mè mọnọ ofọnti kwun̄ tap me lek, mè je si ere igen̄ akpa ya. Osire, kachieek ibe chieen̄ kan̄ irieen̄ owu me lek, mege ire mgbọ ọmọ môriebe inorie mè inwọ miin̄ isan̄a. 4 Mgbọ ọmọ isije isi isiki ilaak, tet chieen̄ me ere îlaakbe. Isilaak inwọnọ, je si, mè da ekwut san̄a me ntut agan̄ otukot kan̄, mè siki laak me ere ya. Ọmọ môtumu inyi owu inu owu môrọbe.” 5 Rufu onenitumu inyi ogwu uga-olom ibe, “Otutuuk inu otumube ibe emi ǹrọ, mârọ.” 6 Ineninan̄a ije isibi isi ere igen̄ akpa ya, mè irọ si otutuuk inu ogwu uga-olom obe ọmọ irọ.
7 Bowaji orerie inorie isan̄a, mè inwọ miin̄ isan̄a, ejit kan̄ obebele. Isisi isiki ilaak me udun̄ èdọ akpa ge me ere ya. Rufu onwenween̄ lek ije isi, mè ida ekwut isan̄a me agan̄ otukot kan̄, mè isiki ilaak. 8 Me ejit eririeen̄, Bowaji oririki, mè itọp lek ikana, mè ibolo chieen̄. Kpọ, enenwaan̄ ge ire eya me ntut agan̄ ukot kan̄ olaakbe!
9 Idodo ibe, “Owu ìre ekene?” Ogwu enenwaan̄ ya ofọfọọk ibe, “Îre emi Rufu gwun̄ ikwaan̄ kwun̄ enenwaan̄ ke îre. Wele otu utọn̄ ofọnti kwun̄ sa chit emi,b ke owu ìre ogwu uwu ogwu isi àkpa inyi eji.”
10 Bowaji ofọfọọk ibe, “Okumugwem igbana owu gwun̄ n̄a enenwaan̄. Ata ejit eyi mgburudun̄ owu okaan̄be îgak eyi adasi mgbọ, mije, owu òkagọọk nsabọn irieen̄, mè ìre ebi ubọọn̄ mè ìyaka ire ebi ugbọọn̄. 11 Mgbọ yi, gwun̄ n̄a, kasisaak ejit kwun̄. Otutuuk inu odobe, mârọ isan̄a inyi owu. Mije, otutuuk ebi ama kiji mîriọọn̄ ibe ke owu ìre atalek enenwaan̄ òsusun̄ lek itap me irek. 12 Iin̄, me atikọ, emi ìre ogwu uwu òrariaak me isi àkpa. Ire, îkaan̄ ofifi ogwu uwu ogwu òrariaak me isi àkpa igak emi. 13 Kup, mè eririeen̄ yi iraka. Me ewelegwe, ire ọmọ ichieek ibọbọkọ owu, îjaan̄. Ire ìkaneme ọmọ ibọbọkọ owu, kè lek ugwem Okumugwem, emi mâfaka owu isibi. Siki laak, mè egwe iwele.”
14 Rufu olalaak ikeya me òfo ntut agan̄ ukot kan̄ iwele egwe, mè ibolo chieen̄ me obum egwe mgbọ ene ge ìkpokọt iriọọn̄ ene ge isi, mije, Bowaji ìkaweek ibe ene geege iriọọn̄ ibe ke îkaan̄ enenwaan̄ ònunu me ere igen̄ akpa ya.
15 Bowaji onenibe ọmọ, “Sa ekwut osabe iwele ichit oguga kwun̄ ya na, mè tet kaan̄ nyi emi nu.” Isasan̄a ekwut ya isibi, mè itet ikaan̄. Bowaji otọtọ otitọc akpa balì gweregwen itap me emen ekwut ya inyi, mè ibene itoon̄, mè ije inin̄ emen ama. Rufu si ofofo igọọk ogwu uga-olom.
16 Mgbọ Rufu okabe inu me uwu igọọk ogwu uga-olom, ogwu uga-olom obebe ọmọ, “Gwun̄ n̄a, ije kwun̄ ìkukup?” Ikpakpa otutuuk inu Bowaji orọbe inyi ọmọ inyi. 17 Îkpa si ibe ke Bowaji îtọ otitọ akpa balì gweregwen inyi ọmọ, mè ibe ọmọ ikaje ukpọk ubọk ìfo ìgọọk nga nlom kan̄.
18 Ogwu uga-olom obebe “Gwun̄ n̄a susuuk lek kup mege owu môriọọn̄be ubọk inu yi oboje. Mije, ogwu enerieen̄ ya ìkposiki efuuk îtata ìrọrọ inu ya ifieek chereyi.”