Bowaji îmọnọ Rufu me lek nwa uwu
4
Bowaji onenije isi otunchit ama ya, mè ikweek irek. Me ekakpọge chieen̄, ogwu uwu ogwu isi àkpa îtumube ikọ ibak ya onunu ibonije iraka. Bowaji ogwegwen ibe, “Ngwan̄ kwun̄, je gba-nu na kweek irek me ere keyi.” Ene ya ojeje igba, mè isiki ikweek irek. 2 Ikeya ke Bowaji ogwen si akọp ene me lek ebi ugane ama ito me ere ya ibe ekweek irek. Ife cha si ekwekweek irek. 3 Inenitumu inyi ogwu uwu ogwu isi àkpa ya ibe, “Okike ijọn̄ eyi ogwu ngwan̄ kiji Elimelek okaan̄be, ogwu nwa Nomi, ogwu ònanan̄a me ido Mowabu ika, ìkiweek ogwu uwu ogwu môkpebe ikpoko ibọkọ ijọn̄ ya me ubọk ogwu ekanabe itap me ubọk. 4 Îre mije keya ke mbe mârọkọ utọn̄ inyi owu. Ire owu môbọkọ ijọn̄ ya. Bọkọ mgbọ keyi me isi otutuuk ebi ìkwekweek me ere yi, mè isi ebi ugane ama kiji chi. Ire oweek ibọbọkọ, bọkọ. Ire, ire owu òkpobọkọ, tumu nyi emi, inyi ǹriọọn̄. Mije, kpunu ofifi ene geege òkakaan̄ unen me lek ijọn̄ ya igak owu.”5 Bowaji onenitumu inyi ogwu enerieen̄ ya ibe, “Usen osibọkọ ijọn̄ ya me ubọk kè Nomi, îre Rufu ogwu Mowabu nwa ogwu òkwu mkpa ore ya owu obọkọbe igbaalek, inyi owu òsan̄a erieen̄ ogwu òkwu mkpa òsibi, mè ìrot kan̄ ikup me irek.”
6 Ogwu isi àkpa ya ofọfọọk ọmọ ibe, “Ire ikeya, emi m̀kpakọt ibọkọ, inyi ìrot eyi n̄a ikajijaka. Mâyaka unen n̄a inyi owu. Owu bọkọ nyi lek kwun̄, ke emi m̀kpakọt ibọkọ.”
7 Me mgbọ òraraka me ido ebi Ijeren, isibeyaka unen inyi ofifi ene, mè ìre isibeyaka inu ene okaan̄be inyi ofifi ene, ogwu òboyaka unen mè ìre inu kan̄ inyi ofifi ene môwọọk ikpukot me ukot kan̄ isa inyi ogwu òbobọbọkọ. Eya mônenire inu ata-ikọ me Ijeren.
8 Eya orọ, ogwu uwu ogwu isi àkpa ya obebe Bowaji, “Owu bọkọ ijọn̄ ya nyi lek kwun̄.” Itutumu ikeya, iwọwọọk ikpukot òkup ọmọ me ukot isa inyi Bowaji.
9 Bowaji otutumu inyi ebi ugane cha, mè otutuuk ebi ìtititiin̄ me ere ya ibe, “Enyi ìre ebi ata-ikọ me chereyi, ibe ke emi mbọkọ otutuuk inu Elimelek okaan̄be, mè echi kè Kiliyọn mè echi kè Malọn, me ubọk kè Nomi. 10 Enyi ìre si ebi ata-ikọ ibe ke emi mbọkọ si Rufu ogwu Mowabu, nwa kè Malọn, me nwa uwu, ufuna ǹsan̄a erieen̄ ogwu òkwukwu ǹsibi, mè ìrot kan̄ ikup me irek, inyi erieen̄ ogwu òkwu mkpa ikachep me etete ebi ngwan̄ kan̄, mè emen ama kan̄.”
11 Otutuuk ebi ìkup me otunchit ya mè ebi ugane cha, echechieek igwook ibe, “Iin̄, eji ìre ebi ata-ikọ. Kè Okumugwem irọ inyi ogwu enenwaan̄ ya òboninin̄ uwu kwun̄ ikaan̄ ata owot bọn kubọk Rechen mè Lia ekaan̄be, mè isan̄a ido ebi Ijeren isibi. Kè Okumugwem irọ si inyi owu òre ogwu òsibi isi me Efarata, mè erieen̄ kwun̄ itaan̄ etip me Beteleyem. 12 Inan̄a me lek mfut Okumugwem obonyi owu me owot ogwu enenwaan̄ yi, owot iman kwun̄ ibọọn̄ ubọọn̄ kubọk owot iman kè Pereji, ogwu Tema omanbe inyi Juda, obọọn̄be.”
Owot iman kè Bowaji
13 Bowaji onenimọnọ Rufu, ikakana nwa kan̄. Ikaka inu inigọọk ọmọ iluk. Okumugwem orọrọ, ininin̄ owot, mè iman gwun̄ enerieen̄. 14 Ebibaan̄ ebi ìnikpọ ogwu òman gwun̄ enenitumu inyi Nomi ibe, “Itọn̄ ikup inyi Okumugwem ogwu ikawuukge owu. Me cherekeyi, înyi owu ene ogwu òbonikpọ owu chieen̄ me lek. Kè erieen̄ gwun̄ yi itaan̄ etip me Ijeren. 15 Gwun̄ yi mônyi owu ayaya ugwem, mè isan̄a owu ukot me ntọn̄ mgbọ owu mônin̄be ugane. Mije, îre nwa gwun̄ kwun̄, ogwu òmama owu, oman gwun̄ yi. Gwun̄ enenwaan̄ yi înwọn me lek kwun̄ igak bọn ebirieen̄ jaaba.”
16 Nomi obeben gwun̄ ya ikọọk me ejit kan̄, mè ikana ogwu òkikpukpo gwun̄ ya. 17 Ebibaan̄, ebi melek kiban̄ elukbe iriaak, ekekitumu ibe ke mîman gwun̄ inyi Nomi. Ebibaan̄ cha enyinyi gwun̄ ya erieen̄, Obedi. Îre Obedi yi ore nte kè Jesi ogwu òrere nte kè Debit.