Uriaak kè Ana
2
Ana oneniriaak uriaak ibe,“Ejit n̄a ìkinwọọn̄ unwọọn̄ me emen Okumugwem.
Mije ọmọ îrọ inyi ǹkaan̄ umin!
Mgbọ keyi, otu n̄a ìchichili
ibook itutumu ikọ inyi ebi ochicha n̄a,
mije, unyan̄a onyan̄abe emi
isibi îtap emi ubelejit me emen!
2 “Kpunu ogwu òkup
mbuban kubọk kwun̄ Okumugwem;
mije, ilọ me lek kwun̄, kpunu ofifi.
Kpunu si ewuuk òkichit ene lek kubọk Awaji kiji.
3 “Ikakpọkpọ ìkitumu ikọ ubene ubene;
ikatele ibe ikọ gogolek
ikinan̄a me otu kinyi isibi;
mije, Okumugwem ìre Awaji òrọriọọn̄ inu geelek;
me isi kan̄, ekiwọwọlọ otutuuk
ubọk ikwaan̄ ene geelek ikpọ.
4 “Mîfaan̄ ogbaan̄ ebi unye;
ire, ebi ukot ìkanye me ijọn̄, ebiba ke enyi unye-lek.
5 Ebi ìkaan̄ inorie irie ijot owot
mîsa lek kiban̄ iweek ikwaan̄,
inyi ema ekaan̄ inorie erie;
ire, ebi ìkup me uraafiọọn̄
kpeyaka iran̄ ọfiọọn̄.
Ikerere ogwu enenwaan̄ òra, îman ibot bọn jaaba;
sà ogwu òkaan̄ ogbogbo bọn oyaka inirak ebek bọn.
6 “Okumugwem ìkekirọ inyi ene ikwu,
mè orọ si inyi ene igat ugwem;
ìkekisa ene itap me ama ekwukwu,
mè òsan̄a si ene me ama ekwukwu.
7 Okumugwem ìkekirọ inyi ene inin̄ ugbọọri,
mè orọ si inyi ene inin̄ ubọọn̄;
ìkekigele ene isiki me ijọn̄,
mè òbene si ene ofo inyọn̄.
8 Îre Okumugwem okisan̄a ebi ugbọọn̄ ukot me ntọn̄,
mè ikitaba ebi una isan̄a me inyọn̄ otiton;
mè ikisa ema inu, inyi enegbaan̄
ekweek irek melek ebi ubọọn̄;
mè igbaan̄ inyi otutuuk kiban̄
ogboon̄ ubọọn̄ eyi umin me ìrot.
“Mije, îre Okumugwem ogwuun̄
otutuuk atà òkibeme linyọn̄;
mè iben linyọn̄ iyik me inyọn̄ atà cha.
9 Okumugwem ìkibem ukot ije ebi ata irọrọ kan̄;
mè òkocho ebi ikpak ofiin̄ me emen udun;
mije, ìkare sa me unye oguga ke ene obokọt itim ikpan̄.
10 Okumugwem môjijaka ebi ìkije ikeme ọmọ isan̄a kpai;
ìbokup me emen inyọn̄
ikisook isinyọn̄ isa ijijaka ema isan̄a.
Okumugwem môsibi oyerebet me ibot otutuuk ebi linyọn̄,
mege ire okputut linyọn̄.
“Ọmọ mônyi ogwu ubọọn̄ kan̄ unye,
mè inyi ogwu ubọọn̄ kan̄
ogwu îtọkọbe aran̄ me ibot ntim-mkpan̄.”
11 Elikana onenigwu ikom ika inu uwu kan̄ me ama Rama. Ire, sọn̄ gwun̄ ya, Samien, okukup me irak ubọk kè Ilai ogwu ngwugwa ikisi ikwaan̄ inyi Okumugwem.
Ijo ugwem bọn kè Ilai
12 Bọn ebirieen̄ kè Ilai mîfieek ugwem enenen, ema kperiọọn̄ Okumugwem. 13 Me mgbọ ya, îkaan̄ orọmijọn̄ ge ebi ngwugwa ekirọ me lek ebi geelek ìbenigwa ngwugwa. Mgbọ geelek ebi ene isisa inu ngwugwa inu, mè ikitem, bọn uwu ogwu ngwugwa mîra isa nkọm-ochichim otu ita ikaan̄ me ubọk ije inu, 14 mè iniben ikeme itap me emen otin̄ ya, mè ìre otin̄ okwukwut mè ìre otin̄ ibat. Otutuuk anam geelek ònwaan̄ me otu nkọm-ochichim ya ìbore eyi ogwu ngwugwa. Ikeya ke ema ekirọ me lek otutuuk ebi Ijeren ebi ìkinu inigwa ngwugwa me Silo. 15 Ofifi si, sabum ebenitap ukan̄ iwọp okpọn̄ anam ngwugwa, gwun̄ uwu ogwu ngwugwa îra inu initumu inyi ogwu òbonigwa ngwugwa ibe, “Nyi anam, inyi ewọp enyi ogwu ngwugwa, ke ìkpobọkọ owu anam etetem me ubọk. Eyi njijoon̄ gaalek ke ìbobọkọ.”
16 Ire ogwukaan̄ ngwugwa ya ifọọk ibe, “Gele lek nu, inyi edasi ewọp okpọn̄ ya esan̄a, sabum owu omọnọ ike geelek oweekbe,” gwun̄ uwu ogwu ngwugwa ya îra ifọọk ibe, “In̄-in̄, ìkare ikeya. Nyi emi mgbọ keyi. Ire òkanyi, mâsa ubọk n̄a gaalek imọnọ me unye.”
17 Ijo inu bọn ebirieen̄ kè Ilai cha onenimin enenen me isi Okumugwem, mije, ema ekikpọ chieen̄ isiki me lek ngwugwa ekigwa inyi Okumugwem.
Samien îsi ikwaan̄ me Silo
18 Me ike mgbọ ya, Samien òwa me Silo okupbe ikisi ikwaan̄ inyi Okumugwem. Ọmọ ìre sọn̄ gwun̄, mè ikitap mgbidim ofọnti ikwaan̄ ebi ngwugwa eyi esabe atalek ekwut lilin̄ ichim. 19 Me acha me acha, nga kè Samien îra ikichim sọntiik ofọnti awudu isa inikinyi Samien mgbọ geelek ọmọ mè ogwu olom ekinu Silo inigwa ngwugwa ibot mgbọ. 20 Ema isinu, Ilai îra igbana Elikana mè ogwu nwa ibe, “Kè Okumugwem inyi owu bọn inan̄a me owot ogwu enenwaan̄ yi, me useen̄ eyi îbeekbe, mè isa iyaka inyi Okumugwem.” Elikana mè ogwu nwa mîra igwu ikom ifo ama kiban̄. 21 Sa me ikeya, Okumugwem onenikaan̄ ejit nsan me lek kè Ana. Ana omamaan̄ ibot bọn ebirieen̄ ita, mè ibot bọn ebibaan̄ iba igọọk Samien. Sọn̄ gwun̄ enerieen̄ ya, Samien, okpọkpọ ikimin me isi Okumugwem.
Ilai mè ebi bọn
22 Me ike mgbọ yi, Ilai îkan enenen, mè ikinọ si otutuuk inu bọn kan̄ ekirọ me lek otutuuk ebi Ijeren. Îkinọ si ibe ke bọn kan̄ mîkitet ebibaan̄ ebi ìkisi ikwaan̄ me otu isotu Atanga Chinichini ikigọọk ilaak. 23 Inenitumu inyi ema ibe, “Ìre keke orọ enyi ekirọ ojelek inu òkup ikechi? Emi me lek n̄a nkinọ otutuuk inu ikpak enyi ekirọ me otu otutuuk ebi ene. 24 In̄-in̄, nsabọn n̄a! Ukpatu ijo ugwem kinyi, eyi òkitaan̄ ikana me etete ebi eyi Okumugwem, ìkanwọn kubọk ge. 25 Ire ogwu ebilene irọ ogwu ebilene ogbo kan̄ ilọ, îre Awaji okifieek oyerebet inyi ene ya. Ire, ire ogwu ebilene irọ Okumugwem ilọ, ìre ekene obonibeek mbeek me ibot ene ya?” Ire, ebi bọn cha kpegban̄ ida nte kiban̄, mije, Okumugwem îwuuk lek iben me ejit ikpakpan̄ ema.
26 Sọn̄ gwun̄ enerieen̄ ya, Samien, okpọkpọ ikimin, mè inwọn isi melek Okumugwem, mè inwọn si isi melek ebilene.
Mîben nriran ikeme uwu kè Ilai
27 Ogwu nriran Awaji ge oneninu me lek kè Ilai, mè inilook ọmọ etip ibe ke Okumugwem ìbe, “Ìre ǹkafat ìsa lek n̄a ìjeen̄ ebi uwu nte kwun̄ me atikọ mgbọ ema ekupbe me usun̄ inyi uwu ogwu Fero me ido Ijipiti? 28 Me atikọ, ǹgogobo nte nte kwun̄ me etete otutuuk otoko ebi Ijeren, inyi inire ogwu ngwugwa inyi emi, mè ikinene ntook ngwugwa n̄a isi ikiwọp nsensi, mè ikitap mgbidim ofọnti ikwaan̄ me isi n̄a. Îre ebi uwu nte kwun̄ si ke emi nche otutuuk anam ngwugwa ewọwọp geelek ebi Ijeren esabe ikinu inyi. 29 Mgbọ keyi, ìre keke orọ enyi ekikpọ chieen̄ isiki me lek ngwugwa n̄a mè inyinyi n̄a echi emi nnyibe ida ibe ekesa enu me uwu n̄a? Ìre owu òjeje ikimin bọn kwun̄ ebirieen̄ igak emi? Enyi ejeje ikigobo okpọkọ echi ònwọnwọn ichit me lek otutuuk anam ngwugwa ebi n̄a, ebi Ijeren, ekisa ijet emi, mè ikitaka isa ikimiin̄ ufuk?
30 “Eya orọ, emi Okumugwem, Awaji ebi Ijeren nkitumu ibe, me atikọ, me mgbọ òraraka, emi nchieek use ibe ke uwu kwun̄ mè uwu nte kwun̄ ebekinin̄ inu me isi n̄a inikigwa ngwugwa mege ire mgbọ geelek. Ire, me mgbọ keyi, me atikọ, ìkpoyaka ikup ikeya. Ebi ìkimin emi ke emi mbamin! Ebi ìkikpọ emi isiki chieen̄ ke emi si mbakpọ isiki chieen̄! Emi Okumugwem ntumu. 31 Kpọ! Mgbọ òkinu mgbọ mâfieekbe usen ugwem kwun̄ mè usen ugwem ebi uwu nte kwun̄ igbidim, inyi ebi oka ugane ekayaka ìkup me uwu kinyi. 32 Owu môsa chieen̄ kwun̄ imun̄ inu ufieejit me uwu n̄a. Ofifi si, me emen otutuuk inu geelek òbokije ijaan̄ me lek ebi Ijeren, ìkakaan̄ mgbọ geege ogwu ugane obokup me uwu kwun̄. 33 Ebi uwu kwun̄ geelek ebi nkakpan̄ge me agba lek ntook ngwugwa n̄a, m̀batele, inyi mun̄ ito itap owu ǹnàan̄, mè itap owu ikpele ufieejit me ejit. Ofifi si, otutuuk ebi owot iman kwun̄ kechilọ ebekikwaan̄ mkpa nsek.
34 “Inu òborọ bọn ebirieen̄ iba kwun̄, Ofini mè Fineyas, ìbore inu ijejeen̄ isa inyi owu ibe ke otutuuk inu chi ntumube ìborọrọ iso. Bọn ebirieen̄ iba kwun̄ chi ebegbaan̄ ikwaan̄ usen yaage! 35 Emi mânenisan̄a ogwu ngwugwa ògbegbe utoon̄-ejit isibi inyi lek n̄a, ogwu òbokirọ otutuuk inu òkup emi me ejit mè otutuuk inu geelek òkup me nkeek n̄a. Mârọ uwu kan̄ isibi, mè ikeke inye. Îre bọn kan̄ ebekije ikana ikisi ikwaan̄ me isi ebi ubọọn̄ n̄a ebi ntọkọbe aran̄ me ibot mgbọ geelek. 36 Mgbọ ya, ebi geelek ìsisik me uwu kwun̄ mênenikinu inikitọbọ ibot me ijọn̄ me isi kan̄, inyi ikinyi ema sọntiik ikpoko, mè ikibeek ibe iweek sọntiik ikwaan̄ ebi ngwugwa inyi ema erọ, inyi ema ekọt ekekaan̄ sọntiik inorie erie.”